ប៉េកាំង ថា ករណីស្លាប់អគ្គរដ្ឋទូតចិនប្រចាំអ៊ីស្រាអែលទំនងមកពីបញ្ហាសុខភាព

COVID-19

អន្តរជាតិ

ប៉េកាំង ថា ករណីស្លាប់អគ្គរដ្ឋទូតចិនប្រចាំអ៊ីស្រាអែលទំនងមកពីបញ្ហាសុខភាព

18, May 2020 , 11:23 am

រូបភាព

អគ្គរដ្ឋទូតចិនប្រចាំអ៊ីស្រាអែល Du Wei (Reuters)

ដោយ:

អគ្គរដ្ឋទូតចិនប្រចាំអ៊ីស្រាអែល លោក Du Wei ដែលបានទទួលមរណភាពនៅគេហដ្ឋានរបស់លោកក្នុងទីក្រុង តែលអាវីវ នៅថ្ងៃទី១៧ ខែឧសភា ទំនងបណ្ដាលមកពីបញ្ហាសុខភាព ។ រដ្ឋាភិបាលក្រុងប៉េកាំង តាមរយៈក្រសួងការបរទេសខ្លួន អះអាងបែបនេះក្នុងសេចក្តីថ្លែងការណ៍មួយ។

ប្រេសិតវ័យ៥៧ឆ្នាំរូបនេះ ដែលបានផ្លាស់ទៅកាន់តំណែងនេះកាលពីពាក់កណ្ដាលខែកុម្ភៈ ត្រូវបានរកឃើញថាស្លាប់ក្នុងផ្ទះរបស់លោកក្នុងតំបន់ Herzliya ភាគខាងជើងនៃទីក្រុង តែលអាវីវ ។ អ្នកនាំពាក្យអគ្គស្នងការប៉ូសលិសជាតិអ៊ីស្រាអែល លោក Micky Rosenfeld ប្រាប់ទីភ្នាក់ងារព័ត៌មាន AFPបែបនេះ។ លោក Rosenfeld បញ្ជាក់បន្ថែមថា មន្ត្រីប៉ូលិសបានទៅដល់កន្លែងកើតហេតុ ក៏ប៉ុន្តែប៉ូលិស ពុំបានរៀបចំការស៊ើបអង្កេតក្នុងករណីស្លាប់របស់លោកអគ្គរដ្ឋទូតចិន Du នោះឡើយ។

ទាក់ទិននឹងដំណឹងមរណភាពនេះ ក្រសួងការបរទេសចិន គូសបញ្ជាក់ក្នុងសេចក្តីថ្លែងការណ៍ដូច្នេះថា៖«សេចក្តីវិនិច្ឆយបឋម បង្ហាញថា អគ្គរដ្ឋទូត Du Wei ទទួលមរណភាពដោយមិននឹកស្មានដល់ដោយសារតែបញ្ហាសុខភាព។ ព័ត៌មានលម្អិត ត្រូវរង់ចាំការបញ្ជាក់បន្ថែមតទៀត»។

ភរិយាលោក Du និងកូនប្រុស ពុំស្នាក់នៅប្រទេសអ៊ីស្រាអែលជាមួយលោកឡើយ។ យោងតាមវេបសាយផ្លូវការរបស់ស្ថានទូតចិនប្រចាំអ៊ីស្រាអែល លោក Du ធ្លាប់កាន់តំណែងជាអគ្គរដ្ឋទូតចិនប្រចាំអ៊ុយក្រែន ចន្លោះឆ្នាំ២០១៦ និង២០១៩ មុនពេលទៅកាន់តំណែងនៅអ៊ីស្រាអែល។

សូមបញ្ជាក់ថា លោកអគ្គរដ្ឋទូតចិន Du Wei បានឆ្លងកាត់ការធ្វើចត្តាឡីស័កនៅផ្ទះ១៤ថ្ងៃ ពេលលោកទៅដល់ប្រទេសអ៊ីស្រាអែល កាលពីពាក់កណ្ដាលខែ កុម្ភៈ ព្រោះតែការរីករាលដាល COVID-19 ។ នេះបើតាមបទសម្ភាសជាមួយប្រព័ន្ធផ្សព្វផ្សាយក្នុងស្រុកអ៊ីស្រាអែលមួយក្នុងខែឧសភានេះ។

អ៊ីស្រាអែលដែលជាសម្ព័ន្ធមិត្តចាក់ទឹកមិនលិចរបស់សហរដ្ឋអាមេរិក និងចិន បានជំរុញកិច្ចសហប្រតិបត្តិការក្នុងវិស័យបច្ចេកវិទ្យាទំនើប និងវិស័យដទៃទៀត។ បញ្ហានេះ ធ្វើឲ្យក្រុងវ៉ាស៊ីនតោនទទូចឲ្យអ៊ីស្រាអែលដាក់កំហិតលើការវិនិយោគចិនក្នុងវិស័យយុទ្ធសាស្ត្រខ្លួន។ យ៉ាងណាមិញ អ្នកនាំពាក្យស្ថានទូតចិនប្រចាំអ៊ីស្រាអែល លោក Wang Yongjun ក្នុងបទវិចារណកថាឲ្យកាសែត Jerusalem Post បានច្រានចោលការអះអាងនេះ ហើយបានហៅកិច្ចសហប្រតិបត្តិការចិន-អ៊ីស្រាអែលថា «ស្ថានភាពឈ្នះឈ្នះ»៕