កីឡាអន្តរជាតិ
រថយន្ត
អន្តរជាតិ
Bottas ជួយក្រុម Mercedes ឈ្នះការប្រណាំងបើកឆាក F1នៅទីលានអូទ្រីស
× Valtteri Bottas បានឈ្នះការប្រណាំងរថយន្ត Formula One នៅទីលានដំបូងសម្រាប់ឆ្នាំ ២០២០ ក្នុងប្រទេសអូទ្រីស Austrian Grand Prix នៅថ្ងៃទី៥ ខែកក្កដា។ នេះជាការវិលត្រឡប់ចូលការប្រណាំងរដូវកាលថ្មី ក្រោយផ្អាកជិត៥ខែ ដោយសារជំងឺ COVID-19។
រយៈពេល ៧ ខែបន្ទាប់ពីការប្រណាំង F1 ចុងក្រោយនៃរដូវកាល ២០១៩ Bottas កីឡាករសញ្ជាតិហ្វាំងឡង់បានបើកការនាំមុខតាំងពីចាប់ផ្តើម រហូតដល់បញ្ចប់ជុំចុងក្រោយដោយប្រើថេរវេលា ១ម៉ោង ៣០នាទី និង៥៥វិនាទី ដើម្បីទទួលបាន២៥ពិន្ទុពេញពីការប្រកួតបើកឆាកនេះ។ Lewis Hamilton ម្ចាស់ការពារជើងឯករដូវកាលមុននិងជាដៃគូរបស់ Bottas សម្រាប់ក្រុម Mercedes បញ្ចប់ទៅក្នុងចំណាត់ថ្នាក់ទី៤។
Hamilton ម្ចាស់ជើងឯក F1 ៦ជំនាន់ បានរងការពិន័យសម្រាប់ការប្រណាំងនេះ ដែលធ្វើឲ្យរូបគេត្រូវធ្លាក់ពីលេខ ២ ទៅលេខ ៥ ក្រោយប៉ះទង្គិចគ្នាជាមួយកីឡាករថៃ Alex Albon របស់ក្រុម Red Bull។ Charles Leclerc ដែលបើកបរឲ្យក្រុម Ferrari បញ្ចប់ទៅក្នុងចំណាត់ថ្នាក់ទី២ ហើយ Lando Norris របស់ក្រុមប្រណាំង Mclaren Renault ទទួលបានចំណាត់ថ្នាក់ទី៣ ខណៈ Sebastian Vettel របស់ Ferrari បញ្ចប់ត្រឹមលេងរៀងទី១០។
ព្រឹត្តិការណ៍ប្រណាំងរថយន្តពិភពលោក ឬកាំជ្រួចលើផ្ទៃរាបមានកីឡាករចូលរួមប្រណាំង២០រូប ដែលមកពីក្រុមចំនួន១០។ កីឡាករដែលបញ្ចប់ទៅពីចំណាត់ថ្នាក់ទី១ ដល់ទី១០ សុទ្ធតែបានពិន្ទុរៀងខ្លួន ដោយក្នុងនោះលេខ១ (២៥ពិន្ទុ) លេខ២ (១៨ពិន្ទុ) លេខ៣ (១៦ពិន្ទុ) លេខ៤ (១២ពិន្ទុ) លេខ៥ (១០ពិន្ទុ) លេខ៦ (៩ពិន្ទុ) លេខ៧ (៦ពិន្ទុ) លេខ៨ (៤ពិន្ទុ) លេខ៩ (២ពិន្ទុ) និងលេខ១០ (១ពិន្ទុ)។
តាមពិតទៅ Formula One រដូកាល ២០២០ ត្រូវចាប់ផ្តើមរដូវកាលថ្មីរបស់ខ្លួននៅក្នុងខែមិនាម្លេះ ប៉ុន្តែដោយសារតែការរាតត្បាតនៃជំងឺរលាកសួតបង្កដោយកូរ៉ូណាវីរុសប្រភេទថ្មី ទើបធ្វើឲ្យការប្រណាំងនេះត្រូវពន្យាពេលរហូតដល់ខែកក្កដា។ បើទោះជាបានចាប់ផ្តើមការប្រណាំងឡើងវិញក្តី ប៉ុន្តែរដូវកាលថ្មីនេះមានទីលានប្រកួតប្រជែងតែចំនួន៨ប៉ុណ្ណោះ ក្នុងប្រទេសចំនួន៦ ដោយក្នុងនោះ អូទ្រីសត្រូវដឹកនាំការប្រណាំងពីរលើក (Austrian Grand Prix និង Styrian Grand Prix), ចក្រភពអង់គ្លេសពីរលើក (British Grand Prix និង 70th Anniversary Grand Prix), ហុងគ្រី (Hungarian Grand Prix), អេស្ប៉ាញ (Spanish Grand Prix), ប៊ែលហ្ស៊ិក (Belgian Grand Prix) និង អ៊ីតាលី (Italian Grand Prix)។ ដោយឡែកប្រទេសចំនួន១៦ទៀត បានលុបការដឹកនាំប្រណាំងទៅហើយដោយសារនៅបារម្ភពីជំងឺ COVID-19។
ការប្រកួតបន្ទាប់ នឹងធ្វើឡើងនៅទឹកដីនៃប្រទេសអូទ្រីសដដែល នៅលើទីលានប្រណាំង Styrian Grand Prix នៅថ្ងៃទី១០-១២ ខែកក្កដា៕
Tag:
Mercedes
Formula One
Valtteri Bottas
© រក្សាសិទ្ធិដោយ thmeythmey.com