វៀតណាម ជម្លៀសមនុស្ស៨ម៉ឺននាក់ចេញពីក្រុងដាណាង ដោយបារម្ភការរាលដាល COVID-19

COVID-19

អន្តរជាតិ

វៀតណាម ជម្លៀសមនុស្ស៨ម៉ឺននាក់ចេញពីក្រុងដាណាង ដោយបារម្ភការរាលដាល COVID-19

27, Jul 2020 , 4:28 pm

រូបភាព

ឧបនាយករដ្ឋមន្រ្តីវៀតណាម លោក Vu Duc Dam ប្រធានគណៈកម្មាធិការទប់ស្កាត់ និងបង្ការ COVID-19 ដឹកនាំកិច្ចប្រជុំស្តីពី COVID-19 នៅថ្ងៃទី២៧ ខែកក្កដា ឆ្នាំ ២០២០។ រូបភាព៖ VGP

ដោយ: ធៀន ភារិន្ទ

វៀតណាម នឹងជម្លៀសមនុស្សប្រមាណ៨ម៉ឺននាក់ ដែលភាគច្រើនជាភ្ញៀវទេសចរក្នុងស្រុកចេញពីទីក្រុងដាណាង។ នេះបើតាមការអះអាងរបស់រដ្ឋាភិបាលវៀតណាម នៅថ្ងៃទី២៧ ខែកក្កដា។ ការជម្លៀសប្រជាជន ធ្វើឡើងបន្ទាប់ពីទីក្រុងទេសចរណ៍មួយនេះ បានរាយការណ៍ពីករណីឆ្លង COVID-19 ថ្មីនៅចុងសប្ដាហ៍កន្លងទៅ។

អត្ថបទទាក់ទង

វៀតណាម ហាមជនបរទេសចូលក្រុងដាណាង បន្ទាប់ពីមានករណីឆ្លង COVID-19 ក្នុងស្រុកថ្មី

រដ្ឋាភិបាល បានសម្រេចជម្លៀសភ្ញៀវទេសចរប្រមាណ ៨ម៉ឺននាក់ចេញពីក្រុងដាណាង បន្ទាប់ពីរកឃើញករណីCOVID-19 ថ្មីចំនួន ៣ករណី និងតំបន់ក្បែរនោះ ១ករណី។ តាមរយៈសេចក្តីថ្លែងការណ៍ថ្ងៃទី២៩ ខែកក្ការ រដ្ឋាភិបាលវៀតណាមប្រកាស ការជម្លៀសនេះ ត្រូវបានប្រើពេល ៤ថ្ងៃ ដោយមានជើងហោះហើរដឹកជញ្ជូនចំនួន១០០ជើងក្នុងមួយថ្ងៃ។ ប្រសិនគ្មានការប្រែប្រួលទេ វៀតណាមនឹងជម្លៀសភ្ញៀវទេសចរទៅកាន់ក្រុង ១១ផ្សេងទៀត។

ការជម្លៀសនេះ ធ្វើឡើងដើម្បីបង្ការ និងទប់ស្កាត់ការរាតត្បាតកូរ៉ូណាវីរុស នៅក្នុងទីក្រុងទេសចរណ៍មួយនេះ។

នៅក្នុងថ្ងៃដដែលនេះ រដ្ឋាភិបាលវៀតណាម បានចេញសេចក្តីថ្លែងការណ៍ដាច់ដោយឡែកមួយទៀតពាក់ព័ន្ធការស៊ើបអង្កេតករណីឆ្លងថ្មី។ នៅក្នុងសេចក្តីថ្លែងការណ៍ថ្មីនេះ ការស៊ើបអង្កេតលើការឆ្លងជាបឋម បានបង្ហាញថា ករណីឆ្លងក្នុងស្រុកទាំង៤របស់វៀតណាម គឺមានពាក់ព័ន្ធនឹងមន្ទីរពេទ្យចំនួន ៣នៅក្នុងទីក្រុងដាណាង។ រដ្ឋមន្ត្រីស្ដីទីសុខាភិបាល លោក Nguyen Thanh Long បានអះអាងថា តាមការវិភាគលើហ្សែន COVID-19 នេះ គឺជាកូរ៉ូណាវីរុសប្រភេទថ្មី ដែលឆ្លងខ្លាំងជាងមុន។

យ៉ាងណាក៏ដោយ ក្រសួងសុខាភិបាលវៀតណាម នឹងបញ្ជូនអ្នកជំនាញមកជួយទប់ស្កាត់ការរាតត្បាត និងស្វែងរកប្រភពចម្លងឲ្យកាន់តែឆាប់បំផុត។ ជាមួយគ្នានេះ ក្រសួងសុខាភិបាល ក៏បានស្នើឲ្យប្រជាជនវៀតណាម ដែលទើបតែត្រលប់មកពីដាណាងដាក់ចត្តាឡីស័ករយៈពេល ១៤ថ្ងៃផងដែរ។

បន្ទាប់ពីស្ងាត់រយៈពេល ៩៩ថ្ងៃ វៀតណាម បានរាយការណ៍ករណីឆ្លងក្នុងស្រុកថ្មីមួយនៅថ្ងៃទី២៥ ខែកក្កដា និងបីទៀតនៅថ្ងៃទី២៦ ខែកក្កដា។ ទាក់ទិននឹងបញ្ហានេះ អាជ្ញាធរ បានបញ្ជាឲ្យផ្អាកសកម្មភាពមួយចំនួន ដូចជាព្រឹត្តិការណ៍កីឡា សាសនាជាដើម។ ចំណែកភ្ញៀវទេសចរ ក៏ត្រូវហាមមិនឲ្យចូលក្រុងនេះដែរ។

គិតមកត្រឹមថ្ងៃទី២៦ ខែកក្កដា វៀតណាមមានករណី COVID-19 សរុបចំនួន ៤២០ករណី និងមិនមានករណីស្លាប់ឡើយ។ ចំណែកករណីជាសះស្បើយនៅវៀតណាមមានចំនួន ៣៦៥នាក់៕