COVID-19
អន្តរជាតិ
ហ្វីលីពីន ហាមនាំចូលសាច់មាន់ពីប្រេស៊ីល ដោយបារម្ភផ្ទុកកូរ៉ូណាវីរុស
×![]()
រដ្ឋាភិបាលហ្វីលីពីន បានសម្រេចដាក់បម្រាមបណ្ដោះអាសន្នលើការនាំចូលសាច់មាន់ពីប្រទេស ប្រេស៊ីល នៅថ្ងៃទី១៤ ខែសីហា ។ ការសម្រេចនេះ ធ្វើឡើងក្រោយទីក្រុងចំនួន២នៅប្រទេសចិន រកឃើញកូរ៉ូណាវីរុសជាប់អាហារក្លាសេដែលនាំចូលពីបរទេស។ 
ក្នុងសេចក្តីថ្លែងការណ៍ ក្រសួងកសិកម្មហ្វីលីពីន បញ្ជាក់ថា ក្រោយមានរបាយការណ៍កាលពីថ្មីៗនេះពីប្រទេសចិន រដ្ឋាភិបាលសម្រេចឃាត់ការនាំចូលសាច់មាន់ពីប្រទេសប្រេស៊ីលជាបណ្ដោះអាសន្ន។ ក្រសួងសង្កត់ធ្ង់ថា នេះគឺអនុលោមតាមច្បាប់សុវត្ថិភាពចំណីអាហារ ដើម្បីការពារអ្នកប្រើប្រាស់និងអាជីវកហ្វីលីពីន។
យ៉ាងណាមិញ ក្រសួងពុំបានបញ្ជាក់រយៈពេលនៃការដាក់បម្រាមនេះឡើយ ហើយការនាំចូលសាច់មាត់ពីប្រទេសប្រេស៊ីល ស្មើនឹង២០ភាគរយនៃការនាំចូលសាច់ពីបរទេសសរុប។ ប្រេស៊ីល រងគ្រោះខ្លាំងលំដាប់ទី២លើពិភលោកដោយសារជំងឺរាតត្បាតសកល COVID-19 បន្ទាប់ពីសហរដ្ឋអាមេរិក ដែលមានករណីឆ្លងជាង៣,២លានករណីនិងស្លាប់ជាង១០ម៉ឺននាក់ ចាប់តាំងពីផ្ទុះដំបូងមក។
តាមការចុះផ្សាយរបស់ទីភ្នាក់ងារព័ត៌មាន Reuters ក្រសួងកសិកម្មហ្វីលីពីន បានធានាចំពោះមុខប្រជាជនហ្វីលីពីនថា ផលិតផលសាច់មាន់ក្នុងទីផ្សារហ្វីលីពីនបច្ចុប្បន្នគឺមានសុវត្ថិភាពសម្រាប់ទទួលទាន។
ការដាក់ចេញបម្រាមនេះ ធ្វើឡើងក្រោយអាជ្ញាធរក្រុងសិនជិន នៅថ្ងៃទី១៣ ខែសីហា រាយការណ៍ថា ខ្លួនបានរកឃើញកូរ៉ូណាវីរុស មានជាប់នៅស្លាបមាន់ក្លាសេ ដែលនាំចូលមកពីប្រេស៊ីល។ មុននេះមួយថ្ងៃ ទីក្រុងអ៊ូហ៊ូ ក៏ប្រកាសពីការរកឃើញកូរ៉ូណាវីរុសនៅលើកញ្ចប់បង្គានាំចូលពីអេក្វាឌ័រដែរ។
យ៉ាងណា អង្គការសុខភាពពិភពលោក(WHO) នៅថ្ងៃទី១៣ ខែសីហា បានលើកឡើងថា គ្មានភស្តុតាងណាមួយ បានបង្ហាញថា កូរ៉ូណាវីរុសអាចឆ្លងពីអាហារទៅមនុស្សបានទេ។ តាមការចុះផ្សាយរបស់ទីភ្នាក់ងារព័ត៌មាន Reuters វីរុសអាចមានជីវិតរហូតដល់ទៅ២ឆ្នាំ ក្នុងសីតុណ្ហភាព -២០អង្សាសេ ប៉ុន្តែមន្ត្រីជំនាញថា គ្មានភស្តុតាងរឹងមាំណាមួយ បង្ហាញថា កូរ៉ូណាវីរុសអាចឆ្លងពីអាហារមកមនុស្សនោះទេ។
ពាក់ព័ន្ធនឹងករណីនេះ លោក Mike Ryan ប្រធានកម្មវិធីអាសន្នរបស់ WHO បានថ្លែងនៅក្នុងសន្និសីទកាសែតមួយថា៖ « ប្រជាជន មិនគួរខ្លាចអាហារ កញ្ចប់អាហារ ឬការដឹកជញ្ជូនអាហារឡើយ»។ បើតាមប្រធានកម្មវិធីអាសន្នរបស់អង្គការសុខភាពពិភពលោករូបនេះ គ្មានឡើយភស្តុតាង ដែលបង្ហាញថា អាហារ ឬចង្វាក់ផលិតកម្ម គឺមានពាក់ព័ន្ធនឹងករណីឆ្លងនៃកូរ៉ូណាវីរុស៕
© រក្សាសិទ្ធិដោយ thmeythmey.com
