អន្តរជាតិ
បច្ចេកវិទ្យា
ខួប៧ឆ្នាំ៖ Telegram ដាក់ឲ្យប្រើមុខងារ Video Call ទាំងលើ Android និង IOS
×![]()
កម្មវិធីផ្ញើសារលើទូរសព្ទ Telegram បានដាក់ឲ្យប្រើប្រាស់នូវមុខងារ ប្រព័ន្ធវីដេអូសន្ទនាមួយទល់មួយ (One-on-one video Call) ទាំងលើប្រព័ន្ធប្រតិបត្តិការ Android និង IOS ។ ក្រុមហ៊ុននេះ បានប្រកាសបែបនេះ ដោយអះអាងថា ឆ្នាំ២០២០នេះបង្ហាញពីតម្រូវការការប្រាស្រ័យទាក់ទងមើលមុខគ្នា (Face-to-face)។
ក្នុងការបង្ហោះដើម្បីសាទរខួប៧ឆ្នាំរបស់ខ្លួនកាលពីថ្ងៃទី១៤ ខែសីហា Telegram បានពិពណ៌នាពីដំណើរការសម្រាប់ចាប់ផ្ដើម Video Call ដោយការចុចលើរូបភាព (Profile) របស់បុគ្គលដែលអ្នកចង់ទាក់ទងទៅ។ អ្នកប្រើប្រាស់ អាចបិទ ឬបើកវីដេអូគ្រប់ពេលអំឡុងពេលសន្ទនា។
ខណៈមុខងារថ្មីនេះនៅមានកម្រិត ក្នុងខែមេសាកន្លងទៅ Telegram បានប្រកាសថាខ្លួននឹងដាក់ឲ្យប្រើប្រាស់ប្រព័ន្ធវីដេអូសន្ទនាជាក្រុម (Group Video Call) នាពេលក្រោយក្នុងឆ្នាំ២០២០នេះ ហើយក៏សន្យាពង្រឹងគុណភាពវាជាបន្តបន្ទាប់ផងដែរ។
សូមបញ្ជាក់ថា កម្មវិធី Telegram ត្រូវបានដាក់ដំណើរការដំបូង ក្នុងថ្ងៃទី ១៤ ខែសីហា ឆ្នាំ២០១៣ ដោយសហគ្រិនបងប្អូនប្រុសជនជាតិរុស្ស៊ីពីរនាក់ ឈ្មោះថា Nikolai និង Pavel Durov ។ ក្នុងខែមេសា Telegram បានប្រកាសថា ខ្លួនមានអ្នកប្រើប្រាស់សកម្មរហូតដល់៤០០លាននាក់ប្រចាំខែ៕
© រក្សាសិទ្ធិដោយ thmeythmey.com
