អន្តរជាតិ
ភ្លើងឆេះបណ្ដាលមកពីរន្ទះបាញ់ បង្ខំឲ្យប្រជាជននៅរដ្ឋកាលីហ្វ័រនីញ៉ាភៀសខ្លួន
×![]()
នៅថ្ងៃទី ២០ សីហា ភ្លើងឆេះបណ្តាលមកពីរន្ទះបាញ់នៅរដ្ឋកាលីហ្វ័រញ៉ា បានរីករាលដាលយ៉ាងឆាប់រហ័ស។ ភ្លើងឆេះនេះ បានបង្ខំឲ្យមនុស្សរាប់ម៉ឺននាក់ ត្រូវជម្លៀសចេញពីតំបន់ San Francisco Bay Area ដែលជាតំបន់មានមនុស្សរស់នៅយ៉ាងច្រើនកុះករ។
រដ្ឋកាលីហ្វ័រញ៉ា កំពុងទទួលរងព្យុះរន្ទះយ៉ាងអាក្រក់បំផុតក្នុងរយៈពេល២០ឆ្នាំចុងក្រោយនេះ។ គិតត្រឹមសប្តាហ៍នេះ រន្ទះបាញ់បានកើតឡើងចំនួន១សែន១ម៉ឺនដង ដែលបណ្តាលឲ្យមានភ្លើងឆេះចំនួន៣៧០ កន្លែង។ យោងតាមអាជ្ញាធរ ភ្លើងឆេះព្រៃបានបំពុលខ្យល់ ក៏ដូចជាដាក់បន្ទុកដល់ក្រុមអ្នកពន្លត់អគ្គីភ័យផងដែរ។ នេះបើតាមការផ្សាយរបស់ទីភ្នាក់ងារព័ត៌មាន Reuters ។
នៅខាងត្បូងរដ្ឋកាលីហ្វ័រញ៉ា បណ្តុំនៃភ្លើងឆេះបង្កដោយព្យុះរន្ទះ បានបង្ខំឲ្យមនុស្ស២ម៉ឹន២ពាន់នាក់ជម្លៀសខ្លួនចេញពីលំនៅឋាន និងសំណង់ចំនួន២០ផ្សេងទៀត។ រីឯសាកលវិទ្យាល័យ California Santa Cruz បានអំពាវនាវឲ្យសិស្សស្ម័គ្រចិត្តជម្លៀសខ្លួនចេញពីបរិវេណសាកលវិទ្យាល័យផងដែរ។ នៅឯខាងជើងរដ្ឋកាលីហ្វ័រញ៉ាវិញ ភ្លើងឆេះព្រៃមាននៅ៩កន្លែង ហើយបំផ្លាញផ្ទះចំនួន១០៥ខ្នង។
ភ្លើងឆេះព្រៃដែលបណ្តាលមកពីរន្ទះនេះ ត្រូវបានគេឲ្យឈ្មោះថា LNU Complex Fire បានពង្រីកទំហំដល់ទៅ ៥ម៉ឺន៣ពាន់ ហិកតា ដែលមានទំហំ១០ដងធំជាងកោះ Manhattan នៅទីក្រុងញ៉ូវយក។ ចំណែកឯភ្លើងឆេះព្រៃ ២០កន្លែងទៀតបានពង្រីកខ្លួនមួយទ្វេជា៣ ដោយគ្របដណ្តប់ផ្ទៃដី៥ម៉ឺន៦ពាន់ហិកតាឯណោះ។
អាកាសធាតុកាន់តែក្តៅឡើងនៅរដ្ឋកាលីហ្វ័រញ៉ា ធ្វើឲ្យភ្លើងឆេះព្រៃបន្តឆេះកាន់តែយូរ និងខ្លាំងជាងមុន។ កត្តានេះហើយដែលបណ្តាលឲ្យរដ្ឋនេះជួបភ្លើងឆេះព្រៃដ៏ធំជាច្រើនក្នុងរយៈពេល១៥ឆ្នាំចុងក្រោយ។
ក្រៅតែពីបំផ្លាញផ្ទះសម្បែង និងអាគារ ដោយសារអណ្តាតភ្លើង សមាគមសួតអាមេរិកវិញ បានព្រមានថា ផ្សែងពីភ្លើងឆេះព្រៃ នឹងធ្វើឲ្យស្ថានភាពអ្នកជំងឺ COVID-19 កាន់តែធ្ងន់ធ្ងរបន្ថែមទៀត។ អ្នកនាំពាក្យសមាគមនេះ អះអាងថា ការស្រូបយកផ្សែង និងធូលី នឹងធ្វើឲ្យសួតអ្នកមានជំងឺ COVID-19 ចុះខ្សោយ ហើយអ្នកដែលមានសុខភាពល្អ នឹងមានបញ្ហាប្រព័ន្ធការពារ។
ក្នុងការឆ្លើយតបទៅនឹងគ្រោះមហន្តរាយនេះ អភិបាលរដ្ឋកាលីហ្វ័រញ៉ា លោក Garvin Newsom បានស្នើររកអ្នកពន្លត់អគ្គីភ័យ៣៧៥នាក់បន្ថែមពីរដ្ឋផ្សេងទៀត៕
© រក្សាសិទ្ធិដោយ thmeythmey.com
