PSG ជើងឯកពីបារាំង ឈានដល់វគ្គផ្តាច់ព្រ័ត្រនៃក្របខណ្ឌកំពូលអឺរ៉ុបជាលើកដំបូង ក្រោយបានលេខ១ក្នុងពូល A ហើយបន្តយកឈ្នះ Borussia Dortmund ៣-២ ក្នុងលទ្ធផលសរុបទាំងពីរជើងនៅវគ្គ១៦ក្រុមចុងក្រោយ ទម្លាក់ Atalanta ២-១ នៅវគ្គ១/៤ និងយកឈ្នះ RB Leipzig ៣-០ នៅវគ្គពាក់កណ្តាលផ្តាច់ព្រ័ត្រ។

 

Bayern Munich ឈានដល់វគ្គនេះ ជាលើកទី១១ ហើយធ្លាប់ឈ្នះពាន៥លើក ក្នុងឆ្នាំ១៩៧៤, ឆ្នាំ១៩៧៥, ឆ្នាំ១៩៧៦, ឆ្នាំ២០០១ និងឆ្នាំ២០១៣។ Bayern ជាក្រុមលេខ១ពូល B ហើយបន្តយកឈ្នះ Chelsea ៧-១ ទាំងពីរជើងនៅវគ្គ១៦ក្រុមចុងក្រោយ ទម្លាក់ Barcelona ៨-២ ជាប្រវត្តិសាស្ត្រនៅវគ្គ១/៤ ហើយបន្តឲ្យ Lyon ខកឱកាសឡើងវគ្គផ្តាច់ព្រ័ត្រជាមួយលទ្ធផល ៣-០។

 

បើទោះបីជាក្រុមទាំងពីរទើបប៉ះគ្នាលើកដំបូងនៅវគ្គផ្តាច់ព្រ័ត្រ Champions League ក៏ដោយ ប៉ុន្តែពួកគេធ្លាប់តទល់គ្នា៨លើកហើយក្នុងព្រឹត្តិការណ៍នេះ ជាពិសេសវគ្គជម្រុះក្នុងពូល។ PSG ឈ្នះ៥លើក និង Bayern ឈ្នះ៣លើក។ 

 

ជំនួបចុងក្រោយកាលពីឆ្នាំ២០១៧ Dani Alves, Edinson Cavani និង Neymar ជួយឲ្យ PSG ឈ្នះ ៣-០ នៅជើងទីមួយ តែ Bayern យកឈ្នះ ៣-១ វិញនៅជើងទីពីរ ដែលសម្រេចបានដោយ Robert Lewandowski និង Corentin Tolisso ២គ្រាប់ ខណៈ១គ្រាប់របស់ PSG រកបានដោយ Kylian Mbappe៕