១០ម៉ឺននាក់ទៅកម្សាន្តតាមបណ្តាសហគមន៍ទេសចរណ៍ធម្មជាតិ នាឱកាសឈប់សម្រាកកន្លងមក

ជាតិ

១០ម៉ឺននាក់ទៅកម្សាន្តតាមបណ្តាសហគមន៍ទេសចរណ៍ធម្មជាតិ នាឱកាសឈប់សម្រាកកន្លងមក

24, Aug 2020 , 9:59 pm

រូបភាព

ដោយ:

បច្ចុប្បន្នទេសចរជាច្រើនបានងាកមកដើរកម្សាន្តបែបលក្ខណៈធម្មជាតិ នៅតាមសហគមន៍ទេសចរណ៍ធម្មជាតិក្នុងប្រទេសកម្ពុជាវិញ។ ជាក់ស្ដែកក្នុងអំឡុងពេលឈប់សម្រាកជំនួសថ្ងៃចូលឆ្នាំចំនួន៥ថ្ងៃ គឺថ្ងៃទី១៧ ដល់២១ខែសីហា ឆ្នាំ២០២០ មានទេសចរប្រមាណ ១០ម៉ឺននាក់បានដើរកម្សាន្តតាមសហគមន៍ការពារធម្មជាតិ។ នេះបើតាមការវាយតម្លៃរបស់ក្រសួងបរិស្ថាន ក្នុងទំព័រហ្វេសប៊ុកក្រសួងបរិស្ថាន។

លោក ឃិត ម៉េងឃាង ប្រធាននាយកដ្ឋានទេសចរណ៍ធម្មជាតិ បានលើកឡើងក្នុងទំព័រហ្វេសប៊ុកក្រសួងបរិស្ថានដូច្នេះថា៖ «កំណើនភ្ញៀវទេសចរដើរកម្សាន្តក្នុងអំឡុងពេលសម្រាកសងចូលឆ្នាំ ជាក្ដីសង្ឃឹមរបស់ប្រជាសហគមន៍ទេសចរណ៍ធម្មជាតិ»។ បើតាម លោក ឃិត ម៉េងឃៀង សហគមន៍តំបន់ការពារធម្មជាតិ និងសហគមន៍ដែលមានសក្តានុពលទេសចរណ៍បានរៀបចំ ពង្រឹងសេវាកម្មទេសចរណ៍សំខាន់ៗដូចជា សេវាកម្មស្នាក់នៅ សេវាកម្មម្ហូបអាហារ សេវាកម្មនាំភ្ញៀវដើរកម្សាន្ត និងការសម្ដែងសិល្បៈ វប្បធម៌ ដើម្បីទាក់ទាញភ្ញៀវទេសចរឲ្យទៅកម្សាន្តក្នុងសហគមន៍របស់ខ្លួន។

តាមការអង្កេតរបស់ក្រសួងបរិស្ថាន ទេសចរទាំង១០ម៉ឺននាក់នេះ បានដើរកម្សាន្តនៅតាមសហគមន៍ការពារធម្មជាតិដូចជា សហគមន៍ទេសចរណ៍បឹងយក្សឡោម សហគមន៍ទេសចរណ៍ពាមក្រសោប សហគមន៍ទេសចរណ៍ទឹកធ្លាក់ច្រកល្អៀង សហគមន៍ទេសចរណ៍ស្រែអំបិល សហគមន៍ទេសចរណ៍បឹងលំកុដ សហគមន៍ទេសចរណ៍ទឹកធ្លាក់ភ្នំជ្រាវ សហគមន៍ទេសចរណ៍ថ្មរូង សហគមន៍ទេសចរព្រែកត្នោត និងសហគមន៍ទេសចរណ៍អូរជាំ។

និន្នាការកើនឡើង នូវភ្ញៀវទេសចរទៅកាន់តំបន់ការពារធម្មជាតិ គឺជាសញ្ញាណថ្មីបង្ហាញថា ប្រជាជនកម្ពុជា កាន់តែបណ្តុះ គំនិតស្រលាញ់ធម្មជាតិ និងចូលរួមថែរក្សា ស្តារ និងអភិរក្សជីវៈចម្រុះ និងធនធានធម្មជាតិ ក៏ដូចជាការរួមចំណែកលើកកម្ពស់ជីវភាពរស់នៅរបស់សហគមន៍មូលដ្ឋាន។ នេះជាការលើកឡើងរបស់ប្រធាននាយកដ្ឋានទេសចរណ៍ធម្មជាតិ ក្នុងទំព័រហ្វេសប៊ុកក្រសួងបរិស្ថាន៕