អន្តរជាតិ
ការសិក្សា៖ កាកសំណល់ប្លាស្ទិកតូចៗនៅបាតសមុទ្រមាន១៤លានតោន រូបភាព AFP
×
ដោយ៖កង ម៉េងហុង
ទីភ្នាក់ងារវិទ្យាសាស្ត្រជាតិអូស្ត្រាលី បានប្រកាសថា បាតសមុទ្ររបស់ពិភពលោក ត្រូវបានគ្របដណ្ដប់ដោយសំណល់បា្លស្ទិកតូចៗប្រមាណ១៤លានតោន។ សំណល់ប្លាស្ទិកនេះ បានបំបែកចេញពីគំនរសំរាមមានទំហំដែលហូរចូលមហាសមុទ្រជារៀងរាល់ឆ្នាំ។
បើតាមទីភ្នាក់ងារព័ត៌មាន AFP នៅថ្ងៃទី៧ ខែតុលាថា ទីភ្នាក់ងារវិទ្យាសាស្ត្រជាតិអូស្ត្រាលីបានបញ្ជាក់ថា បរិមាណនៃកម្ទេចសំរាមតូចៗសព្វថ្ងៃមាន១៤លានតោន ដែលច្រើនជាង ២៥ ដងលើសការសិក្សាដោយទីភ្នាក់ងារតំបន់។ ទំហំនេះ ជាការប៉ាន់ស្មានជាសកលលើកដំបូងនៃចំនួនកាកសំណល់ប្លាស្ទិកតូចៗនៅបាតសមុទ្រ។
ក្រុមអ្នកស្រាវជ្រាវនៅទីភ្នាក់ងារ CSIRO របស់អូស្ត្រាលី បានប្រើននាវាមុជទឹកដើម្បីប្រមូលយកគំរូពីកន្លែងដែលមានជម្រៅរហូតដល់៣,០០០ម៉ែត្រនៅឆ្នេរភាគខាងត្បូង។ អ្នកវិទ្យាសាស្ត្រប្រចាំ CSIRO លោកស្រី Denise Hardesty និយាយថា ការស្រាវជ្រាវបានរកឃើញថានៅកន្លែងដ៏ជ្រៅនៃមហាសមុទ្រ ក៏មានកាកសំណល់បា្លស្ទិកតូចៗដែរ។ លោក បានបង្ហាញការភ្ញាក់ផ្អើលចំពោះការរកឃើញកាកសំណល់ផ្លាស្ទិកតូចៗយ៉ាងច្រើននៅក្នុងទីតាំងដ៏ជ្រៅបែបនេះ។
ក្នុងការស្រាវជ្រាវដែលកំពុងត្រូវត្រួតពិនិត្យឡើងវិញដោយទស្សនាវដ្ដី Marince Science នៅតំបន់ដែលមានសំរាមអណ្ដែតត្រៀបត្រានៅផ្ទៃខាងលើ ជាទូទៅនឹងមានបំណែកសំរាមតូចៗនៅបាតខាងក្រោមច្រើនដែរ។ លោក Justine Barrett ដែលដឹកនាំការសិក្សានេះ បាននិយាយថា៖ «កាកសំណល់ ដែលហូរដល់សមុទ្រ នឹងខូចខាតទ្រង់ទ្រាយ ហើយចុងបញ្ចប់វានឹងទៅជាកាកសំណល់ប្លាស្ទិកតូចៗលទ្ធផលបង្ហាញថា កាកសំណល់បា្លស្ទិកតូចៗពិតជាកំពុងលិចទៅក្នុងបាតមហាសមុទ្រ»។
លោកស្រី Hardesty ក៏បានអំពាវនាវឱ្យមានវិធានការបន្ទាន់ដើម្បីរកដំណោះស្រាយចំពោះការបំពុលប្លាស្ទិកសមុទ្រនេះដែលបានធ្វើឲ្យប៉ះពាល់ដល់ប្រព័ន្ធអេកូឡូស៊ី សត្វ និងសុខភាពមនុស្ស។ បើតាមលោកស្រី រដ្ឋាភិបាល វិស័យឯកជន និងសហគមន៍ទាំងឡាយ ចាំបាច់ត្រូវធ្វើការរួមគ្នាដើម្បីកាត់បន្ថយបរិមាណសំរាមនៅតាមឆ្នេរសមុទ្រ និងក្នុងមហាសមុទ្រ៕
© រក្សាសិទ្ធិដោយ thmeythmey.com