អន្តរជាតិ
កីឡាអន្តរជាតិ
Manny Pacquiao កំពុងហ្វឹកហាត់សំរាប់ការប្រកួតទល់នឹង Brandon Rios
× អ្នកលេងកណ្ដាប់សញ្ជាតិហ្វីលីពីន Manny Pacquiao បានបន្តហ្វឹកហាត់យ៉ាងសស្រាក់សស្រាំ មុនការឡើងសង្វៀនរបស់គេទល់នឹងអ្នកប្រដាល់អាមេរិក Brandon Rios នៅក្រុងម៉ាកាវចូលមកដល់នៅថ្ងៃទី២៣ ខែវិច្ឆិកា ខាងមុខ។ ការខិតខំប្រឹងប្រែងមិនលុះពេលរបស់បុរសវ័យ៣៤ឆ្នាំរូបនេះ ធ្វើឡើងដើម្បីលុបលាងភាពអាម៉ាសក្រោយបរាជ័យពីរប្រកួតជាប់ៗគ្នា ពោលគឺចាញ់ Timothy Bradley ដោយពិន្ទុយ៉ាងចម្រូងចម្រាស និង ចុងក្រោយត្រូវសន្លប់ក្រោមដៃខ្លាចាស់ Juan Manuel Marquez។
គ្រូបង្វឹករបស់អ្នកប្រដាល់នយោបាយរូបនេះ គឺលោក Freddie Roach បានព្រលយឲ្យដឹងថា ប្រសិនបើ Pac-Man បរាជ័យជាលើកទីបី រូបគេប្រហែលជាត្រូវព្យួរហ្គង់តែម្ដង។
ឆ្លងកាត់ការឡើងសង្វៀន៦១ដង Pacquiao ឈ្នះ៥៤ដង ចាញ់៥ដង និង ស្មើពីរដង។ ក្នុងនោះផ្ដួលគូប្រកួតឲ្យងើបលែងរួចបាន៣៨លើក។ ចំណែកគូប្រជែងវ័យ២៧ឆ្នាំ Brandon Rios ធ្លាប់ឡើងសង្វៀន ៣៣ដង ឈ្នះ៣១ដង ចាញ់១ និង ស្មើ១ ហើយមាន២៣ដង ដែលរូបគេបានផ្ដួលដៃគូឲ្យសន្លប់។
ដោយឡែកទីតាំងហ្វឹកហាត់របស់ Manny Pacquiao មានមូលដ្ឋាននៅភាគខាងត្បូងប្រទេសហ្វីលីពីន ដែលមិនត្រូវបានប៉ះពាល់ដោយព្យុះហៃយ៉ាននោះទេ៕
ប្រែសម្រួលដោយ ទិត្យ សុវណ្ណ © រក្សាសិទ្ធិដោយ thmeythmey.com