និស្សិតកម្ពុជាថ្នាក់វេជ្ជបណ្ឌិតឯកទេសចំនួន៧២នាក់ត្រូវបានជ្រើសរើសដើម្បីទៅបន្តការសិក្សានៅប្រទេសបារាំង ដោយរយៈពេលពេញមួយឆ្នាំ ពួកគេត្រូវសិក្សាទាំងទ្រឹស្តី និងចុះកម្មសិក្សាអនុវត្តផ្ទាល់នៅតាមបណ្តាមន្ទីរពេទ្យសាកលវិទ្យាល័យនានានៅបារាំង។ យោងតាមស្ថានទូតបារាំងនៅកម្ពុជា និស្សិតខ្មែរជាង៨០០នាក់ហើយដែលបានចេញទៅសិក្សាជំនាញវេជ្ជសាស្ត្រនៅបារាំង ដោយគិតចាប់តាំងពីឆ្នាំ១៩៩៦មក។
ក្រោមភាពជាដៃគូក្នុងវិស័យសុខាភិបាលរវាងបារាំង និងកម្ពុជា និស្សិតវេជ្ជសាស្ត្រខ្មែរ៧២នាក់បន្ថែមទៀត ត្រូវចេញទៅបន្តការសិក្សារយៈពេលមួយឆ្នាំនៅបារាំង ទាំងទ្រឹស្តី និងការចុះកម្មសិក្សាអនុវត្តផ្ទាល់។ ក្រោយ បញ្ចប់កម្មសិក្សា ពួកគេនឹងទទួលបានសញ្ញាប័ត្របណ្តុះបណ្តាលវេជ្ជសាស្ត្រជំនាញ DFMS ឬសញ្ញាប័ត្របណ្តុះបណ្តាលវេជ្ជសាស្ត្រជំនាញជាន់ខ្ពស់ DFMSA។
និស្សិតខ្មែរទាំង៧២រូបទៅបំពេញការសិក្សាបន្ថែមនៅមន្ទីរពេទ្យសាកលវិទ្យាល័យផ្សេងៗគ្នានៅបារាំង ដែលក្នុងនោះមាន២០នាក់នៅប៉ារីស, ១១នាក់នៅ Rouen, ១០នាក់នៅ Amiens, ៧នាក់នៅ Tours, ៣នាក់នៅ Strasbourg និង១នាក់ៗនៅ Aix-Marseille, Angers, Bordeaux, Clermont-Ferrand, Grenoble, Lille, Lyon, Nice, Potiers និង Pointe-à-Pitre។
លោកស្រី អេវ៉ា ង្វៀនប៊ិញ ឯកអគ្គរដ្ឋទូតបារាំងប្រចាំកម្ពុជា កាលពីថ្ងៃទី២៦ ខែតុលា បានជួបសំណេះសំណាលជាមួយនិស្សិតទាំងនោះនៅសាកលវិទ្យាល័យវិទ្យាសាស្ត្រសុខាភិបាល ដោយមានវត្តមានលោក អេង ហួត រដ្ឋលេខាធិការក្រសួងសុខាភិបាល និងលោក សាផុន វឌ្ឍនៈ សាកលវិទ្យាធិការនៃសាកលវិទ្យាល័យវិទ្យាសាស្ត្រសុខាភិបាល។
«ឆ្នាំនេះការចេញដំណើរទៅបារាំងរបស់ពួកគេធ្វើឡើងក្នុងលក្ខខណ្ឌពិសេស ដោយហេតុថាក្រៅពីភាពខុសគ្នាផ្នែកវប្បធម៌នៅក្នុងប្រទេសថ្មីមួយ ពួកគេនឹងប្រឈមនឹងការគ្រប់គ្រងវិបត្តិជំងឺកូវីដ-១៩»។ នេះជាការលើកឡើងរបស់លោកស្រីឯកអគ្គរដ្ឋទូតបារាំងដោយមានជំនឿថា និស្សិតកម្ពុជាទាំងអាចជម្នះឧបសគ្គដ៏លំបាកនានា។
យោងតាមស្ថានទូតបារាំងនៅកម្ពុជា នារយៈពេលប្រមាណ២៤ឆ្នាំចុងក្រោយនេះ និស្សិតកម្ពុជាផ្នែកវេជ្ជសាស្ត្រ និងឱសថសាស្ត្រ ប្រមាណជាង៨០០នាក់ហើយ ដែលបានចេញទៅទទួលការបណ្តុះបណ្តាលនៅប្រទេសបារាំងលើជំនាញឯកទេសវេជ្ជសាស្ត្រផ្សេងៗគ្នានៅបារាំង។
«កិច្ចសហប្រតិបត្តិការនេះកាន់តែមានអត្ថន័យថែមទៀតនៅក្នុងបរិបទបច្ចុប្បន្ន»។ លោកស្រី អេវ៉ា ង្វៀនប៊ិញ បានអះអាងយ៉ាងដូច្នេះ នាពិធីជូនដំណើរនិស្សិតទាំង៧២រូប៕