COVID-19
ជាតិ
សង្គមជាតិ
នារីខ្មែរម្នាក់មានវិជ្ជមាន COVID-19 នៅថ្ងៃទី១៣ នៃការធ្វើចត្តាឡីស័ក
×![]()
ភ្នំពេញ៖ ស្ត្រីជនជាតិខ្មែរម្នាក់ទៀត ដែលបានដំណើរមកពីប្រទេសជប៉ុន មានផ្ទុកនូវជំងឺកូវីដ-១៩ បន្ទាប់ពីក្រសួងសុខាភិបាលធ្វើតេស្តលើកទីពីរ ចំថ្ងៃទី១៣នៃការធ្វើចត្តាឡីស័ក។ នេះបើយោងតាមសេចក្តីប្រកាសព័ត៌មានរបស់ក្រសួងសុខាភិបាល នាព្រឹកថ្ងៃទី២វិច្ឆិកានេះ ដោយបញ្ជាក់ថា ការរកឃើញវិជ្ជមាននៃជំងឺកូវីដ-១៩លើស្ត្រីរូបនេះ គឺបានស្ថិតនៅក្នុងយន្តហោះតែមួយ ជាមួយបុរសជនជាតិប៉ូឡូញ ដែលក្រសួងធ្វើតេស្តលើកទី១រកឃើញកូវីដ-១៩ កាលពីថ្ងៃទី១៩តុលាកន្លងមក។ 
ស្ត្រីដែលមានជំងឺកូវីដ-១៩ខាងលើនេះ មានអាសយដ្ឋាននៅស្រុកចិត្តបុរី ខេត្តក្រចេះ ហើយបច្ចុប្បន្នកំពុងសម្រាកព្យាបាលនៅមន្ទីរពេទ្យមិត្តភាពខ្មែរ-សូវៀត។ ការរកឃើញវិជ្ជមាននៃជំងឺកូវីដ-១៩លើនារីវ័យ៣១ឆ្នាំរូបនេះ បានធ្វើឱ្យកម្ពុជាកើននូវចំនួនអ្នកឆ្លងជំងឺនេះ ២៩២នាក់ហើយ។ បើតាមក្រសួងសុខាភិបាល ស្រី្តរូបនេះ គឺបានធ្វើដំណើរមកពីប្រទេសជប៉ុន ដោយបន្តជើងហោះហើរនៅ កូរ៉េខាងត្បូង ហើយមកដល់កម្ពុជា កាលពីថ្ងៃទី១៩តុលា ឆ្នាំ២០២០។
ជាមួយគ្នានេះ ក្រសួងសុខាភិបាលបានអះអាងថា មនុស្សទាំង៥២នាក់ទៀតដែលជាអ្នកធ្វើដំណើរជាស្ត្រីខាងលើនោះ គឺសុទ្ធសឹងតែធ្វើតេស្តរកកូវីដ-១៩ ដោយលទ្ធភាពបង្ហាញអវិជ្ជមានទាំងអស់។ អ្នកធ្វើទាំង៥២នាក់នោះ ក្រសួងសុខាភិបាលតម្រូវឱ្យធ្វើចត្តាឡីស័ក១៤ថ្ងៃទៀត នៅតាមសណ្ឋាគារ៣កន្លែងនៅរាជធានីភ្នំពេញចំនួណ២៦នាក់ នៅមណ្ឌលទ័ពអាកាស២៦នាក់ ដើម្បីបង្ការហានិភ័យកូវីដ-១៩ ពីស្រី្តខាងលើនេះ។
គិតត្រឹមថ្ងៃទី២វិច្ឆិកា ឆ្នាំ២០២០ កម្ពុជារកឃើញអ្នកឆ្លងកូវីដ-១៩ ចំនួន២៩២នាក់។ ក្នុងនោះ ជាសះស្បើយ២៨៣នាក់ និង៩នាក់ទៀត កំពុងសម្រាកព្យាបាលជំងឺនៅមន្ទីរពេទ្យមិត្តភាពខ្មែរ-សូវៀត រាជធានីភ្នំពេញ៕
Tag:
COVID-19
ក្រចេះ
© រក្សាសិទ្ធិដោយ thmeythmey.com
