ជាតិ
រដ្ឋមន្ត្រីបរិស្ថាន ខកចិត្តពេលឃើញទីស្នាក់ការបរិស្ថានខ្លះបែរជាគគ្រិច គ្មានអនាម័យ... លោក សាយ សំអាល់ រដ្ឋមន្ត្រីក្រសួងបរិស្ថាន ក្នុងពិធីបើកសន្និបាតបូកសរុបលទ្ធផលការងារបរិស្ថានប្រចាំឆ្នាំ២០២០ នៅទីស្តីការក្រសួងនាព្រឹកថ្ងៃទី៣វិច្ឆិកា។ រូបថត៖ ក្រសួងបរិស្ថាន
× ភ្នំពេញ៖ «យើងអ្នកបរិស្ថាន កន្លែងធ្វើការយើងឱ្យវាស្អាតបន្តិចទៀតទៅលោក!»។ នេះជាការទាមទាររបស់លោក សាយ សំអាល់ រដ្ឋមន្ត្រីក្រសួងបរិស្ថាន ពីមន្ត្រីក្រោមឱវាទរបស់ខ្លួន ជាពិសេសមន្ត្រីធ្វើការនៅតាមទីស្នាក់បរិស្ថាននីមួយៗក្នុងខេត្តនានា។ លោក សាយ សំអាល់ បានកត់សម្គាល់ឃើញថា ទីស្នាក់ការបរិស្ថានមួយចំនួន មានកន្លែងធ្វើការស្អាត មានការិយាល័យស្អាតហើយ ប៉ុន្តែទីធ្លានៃបរិវេណទីស្នាក់ការវិញ គឺគ្មានការរៀបចំឱ្យស្អាតត្រឹមត្រូវ រីឯបន្ទប់ទឹកវិញ គឺគគ្រិច និងក្លិនមិនល្អ ជាដើម ។
សូមស្តាប់ប្រសាសន៍របស់លោកសាយ សំអាល់ រដ្ឋមន្ត្រីបរិស្ថាន ខាងក្រោមនេះដូចតទៅ៖
បើតាមលោក សាយ សំអាល់ ក្នុងពិធីបើកសន្និបាតបូកសរុបលទ្ធផលការងារបរិស្ថានប្រចាំឆ្នាំ២០២០ នៅទីស្តីការក្រសួងនាព្រឹកថ្ងៃទី៣វិច្ឆិកា ទីស្នាក់បរិស្ថាននីមួយៗនៅតាមជម្រកសត្វព្រៃនានា គឺជាកន្លែងផ្តល់ព័ត៌មាន ជាកន្លែងផ្តល់សុវត្ថិភាពជូនប្រជាពលរដ្ឋ ជាពិសេសដល់អ្នកដំណើរឬភ្ញៀវទេសចរដែលមកលេងកម្សាន្តក្នុងព្រៃដើម្បីស្វែងយល់អំពីជីវៈចម្រុះនានា។ ដូច្នេះ ទីស្នាក់បរិស្ថាននីមួយៗត្រូវតែសម្អាត និងរៀបចំទីធ្លាឱ្យបានស្អាត សាកសមជាអ្នកគំរូក្នុងវិស័យបរិស្ថាន។
រដ្ឋមន្ត្រីបរិស្ថានរូបនេះបានសង្កត់ធ្ងន់ដូច្នេះ៖«តែកន្លែងធ្វើការងារគគ្រិចហើយ គេវាយតម្លៃការដឹកនាំរបស់យើងគឺមិនសូវល្អប៉ុន្មានទេ។ ជាពិសេសបន្ទប់ទឹក បើបន្ទប់យើងដេកមិនបានទេ [គឺ]មែនយើងអ្នកបរិស្ថានទេ [រាប់តាំងពីបន្ទប់ទឹកក្នុងក្រសួងបរិស្ថាន រហូតដល់បន្ទប់ទឹក នៅក្នុងដែនជម្រកសត្វព្រៃ]»។
លោក សាយ សំអាល់ ថ្លែងសុន្ទរកថាបើកសន្និបាតបូកសរុបលទ្ធផលការងារបរិស្ថានប្រចាំឆ្នាំ២០២០ នៅទីស្តីការក្រសួងនាព្រឹកថ្ងៃទី៣វិច្ឆិកា។ រូបថត៖ ក្រសួងបរិស្ថាន
ជាមួយគ្នានេះលោក ក៏បានស្នើឱ្យអ្នកគ្រប់គ្រងទីស្នាក់ការបរិស្ថាននីមួយៗ ដែលមានរថយន្ត ម៉ូតូ ឬឈើនានាដែលរឹបអូសបានពីជនល្មើសព្រៃឈើឬសត្វព្រៃកន្លងមក ត្រូវតែរៀបចំទុកដាក់ឱ្យបានត្រឹមត្រូវ ឬក៏លក់ចោលតែម្តង កុំទុកឱ្យខូចខាតចោលនៅពាសវាលពាសកាលនៃបរិវេណទីស្នាក់បរិស្ថានក្នុងតំបន់នានា ដែលធ្វើឱ្យបាត់បង់សោភ័ណភាពបរិស្ថាន និងមានការវាយតម្លៃមិនល្អឬទាបពីមជ្ឈដ្ឋានខាងក្រៅ។
ឡានចាស់ៗអស់ទាំងហ្នឹង លក់ឡៃឡុងចេញឱ្យអស់ទៅ។ បើទុក ក៏មិនដឹងទុកធ្វើអី។ នេះជាការលើកឡើងរបស់លោក សាយ សំអាល់ ដោយលោកបានមើលឃើញថា៖«កន្លែងខ្លះ ជាតំបន់បេតិកភណ្ឌរបស់ជាតិ ហើយពេលទៅដល់ឡានឡើងកន្ទ្រួក, ឈើ ម៉ូតូទុកឡើងកន្ត្រេកកន្ត្រាកនៅហ្នឹង ដែលធ្វើឱ្យខូចឈ្មោះដល់គេ ដល់ឯងនៅហ្នឹង»៕
រថយន្តជាច្រើនដែលមន្រី្តឧទ្យានុរក្សរឹបអូសបានពីជនល្មើសទុកចោលនៅដែនជម្រកសត្វព្រៃកែវសីមា ក្នុងខេត្តមណ្ឌលគិរី។ រូបថត៖ សៅ សុខអេង
ម៉ូតូជាច្រើនដែលមន្រី្តឧទ្យានុរក្សរឹបអូសបានពីជនល្មើសទុកចោលនៅដែនជម្រកសត្វព្រៃកែវសីមា ក្នុងខេត្តមណ្ឌលគិរី។ រូបថត៖ សៅ សុខអេង
Tag:
ឧទ្យាន
លោក សំអាល់
© រក្សាសិទ្ធិដោយ thmeythmey.com