ក្រសួងបរិស្ថានដាក់ម៉ាស៊ីនតាមដានគុណភាពខ្យល់៤៩កន្លែងទូទាំងប្រទេស

ជាតិ

ក្រសួងបរិស្ថានដាក់ម៉ាស៊ីនតាមដានគុណភាពខ្យល់៤៩កន្លែងទូទាំងប្រទេស

04, Nov 2020 , 9:32 am

រូបភាព

លោក នេត្រ ភក្ត្រា រដ្ឋលេខាធិការ និងជាអ្នកនាំពាក្យក្រសួងបរិស្ថាន កំពុងផ្តល់បទសម្ភាសឱ្យអ្នកសារព័ត៌មានក្រោយបញ្ចប់ពិធីបើកសន្និបាតបូកសរុបលទ្ធផលការងារបរិស្ថានឆ្នាំ២០២០ នៅទីស្តីការក្រសួង កាលពីថ្ងៃទី៣វិច្ឆិកា។ រូបថត៖ ក្រសួងបរិស្ថាន

ដោយ: អ៊ូ សុខមាន (OU Sokmean)

ក្រសួងបរិស្ថាន បានដាក់ម៉ាស៊ីនតាមដានខ្យល់នៅកម្ពុជា ចំនួន៤៩កន្លែង នៅរាជធានី-ខេត្តទាំង២៥។ នេះបើតាមលើកឡើងរបស់លោក នេត្រ ភក្ត្រា រដ្ឋលេខាធិការក្រសួងបរិស្ថាន ដោយបញ្ជាក់ថា ក្នុងចំណោមម៉ាស៊ីនតាមដានគុណភាពខ្យល់ទាំងនោះ មាន១១កន្លែងនៅរាជធានីភ្នំពេញ និង៣៨កន្លែងទៀត នៅគ្រប់បណ្តាខេត្តនានា។

លោក នេត្រ ភក្ត្រា ប្រាប់ដល់អ្នកសារព័ត៌មានក្រោយបញ្ចប់ពិធីបើកសន្និបាតបូកសរុបលទ្ធផលការងារបរិស្ថានឆ្នាំ២០២០ និងលើកទិសដៅការងារឆ្នាំ២០២១ នៅទីស្តីការក្រសួង កាលពីថ្ងៃទី៣វិច្ឆិកា ថា ការដាក់ម៉ាស៊ីនតាមដានខ្យល់ទាំងនេះ គឺដើម្បីតាមដានគុណភាពខ្យល់ឬពិនិត្យគុណភាពខ្យល់នៅកម្ពុជា។

បើតាមរដ្ឋលេខាធិការ និងជាអ្នកនាំពាក្យក្រសួងបរិស្ថានរូបនេះ តាមរយៈការដាក់ម៉ាស៊ីនតាមដានគុណភាពខ្យល់ទាំងនេះបានបង្ហាញថា ខ្យល់អាកាសនៅកម្ពុជា មានគុណភាពល្អប្រសើរ ពោលគឺបញ្ហាខ្យល់បានស្ថិតនៅក្រោមកម្រិត៥០ដែលក្រសួងបរិស្ថានបានកំណត់។ លោកប្រសាសន៍ដូច្នេះ៖«យើងឃើញថា នៅរាជធានីភ្នំពេញ នៅតាមបណ្តាខេត្ត គុណភាពខ្យល់គឺស្ថិតនៅក្រោមស្តង់ដារដែលក្រសួងបរិស្ថានបានកំណត់ក្នុងកម្រិត៥០។ អ៊ីចឹង គឺ[ខ្យល់]នៅប្រែប្រួលចន្លោះ ពី១៥ទៅ ៣០ អាចឈានទៅដល់៤០ ប៉ុណ្ណោះ ដោយមិនបានឡើងដល់៥០ទេ។ ដូច្នេះ ខ្យល់ក្នុងប្រទេសកម្ពុជា មានគុណភាពល្អប្រសើរ»។

ក្រសួងបរិស្ថានប្រារព្ធសន្និបាតបូកសរុបលទ្ធផលការងារបរិស្ថានឆ្នាំ២០២០ និងលើកទិសដៅការងារឆ្នាំ២០២១ នៅទីស្តីការក្រសួង កាលពីថ្ងៃទី៣វិច្ឆិកា។ រូបថត៖ ក្រសួងបរិស្ថាន

បើទោះបីជា គុណភាពខ្យល់នៅកម្ពុជា មានគុណភាពល្អក៏ដោយ លោក នេត្រ ភក្ត្រា បានបញ្ជាក់ថា រដ្ឋាភិបាលកម្ពុជា ដែលមានក្រសួងបរិស្ថាន ជាសេនាធិការ បានដាក់ចេញនូវវិធានការមួយចំនួន ដើម្បីទប់ស្កាត់ការបំពុលខ្យល់។ វិធានការទាំងនោះមាន៖ ការដាក់ឱ្យអនុវត្តអនុក្រឹត្យការគ្រប់គ្រងការបំពុលខ្យល់ ដោយនៅក្នុងនោះ មានទាំងការគ្រប់គ្រងការដ្ឋានសាងសង់ ព្រមទាំងតម្រូវឱ្យស្ថានីយប្រេងសាំង កំណត់ប្រេងសាំង, មានគុណភាពខ្ពស់ និងកម្រិតស្ព័នធរទាប ដើម្បីកុំឱ្យបញ្ចេញចំហេះចេញមកក្រៅបំពុលបរិយាកាសច្រើន ជាដើម។

ជាមួយគ្នានេះ ក្រសួងបរិស្ថាន ក៏បានអប់រំប្រជាពលរដ្ឋកុំឱ្យដុតសំរាមពាសវាល ពាសកាល ព្រមទាំងណែនាំកុំឱ្យជញ្ជ្រាំងស្រូវ និងកាប់ឆ្ការ ដុតចំការរបស់ពួកគាត់នៅក្នុងរដូវប្រាំង ដែលជាផ្នែកមួយបំពុលដល់បរិយាកាស ផងដែរ៕