ជាតិ
លោក សាយ សំអាល់ ដឹកនាំសន្និបាតបូកសរុបលទ្ធផលការងារបរិស្ថានឆ្នាំ២០២០ និងលើកទិសដៅការងារឆ្នាំ២០២១ នៅទីស្តីការក្រសួងបរិស្ថាន នាព្រឹកថ្ងៃទី៤វិច្ឆិកា ឆ្នាំ២០២០។ រូបថត៖ ក្រសួងបរិស្ថាន
×![]()
ភ្នំពេញ៖ ដើម្បីសម្រេចកិច្ចការអ្វីមួយឱ្យបានជោគជ័យក្នុងវិស័យបរិស្ថានសម្រាប់បម្រើជាឧត្តមប្រយោជន៍ ជូនប្រជាពលរដ្ឋ និងសង្គមជាតិកម្ពុជា ក្រៅពីមានការរៀបចំផែនការ ចក្ខុវិស័យ និងថវិកាហើយនោះ គឺចាំបាច់បំផុតទាមទារឱ្យមានធនធានមនុស្សសម្រាប់អនុវត្ត។ នេះបើតាមការលើកឡើងរបស់លោក សាយ សំអាល់ រដ្ឋមន្ត្រីក្រសួងបរិស្ថាន ដោយបានអះអាងយ៉ាងខ្លីដូច្នេះ៖«កត្តាស្លាប់-រស់របស់យើង និងក្រសួងរបស់យើងនេះ គឺធនធានមនុស្ស»។ 
សូមស្តាប់ប្រសាសន៍របស់លោក សាយ សំអាល់ រដ្ឋមន្ត្រីក្រសួងបរិស្ថាន ខាងក្រោមដូចតទៅ៖
បើតាមលោក សាយ សំអាល់ ថ្លែងនៅចំពោះមុខមន្ត្រីគ្រប់ជាន់ថ្នាក់របស់ខ្លួន ក្នុងពិធីបើកសន្និបាតបូកសរុបលទ្ធផលការងារបរិស្ថានប្រចាំឆ្នាំ២០២០ នៅទីស្តីការក្រសួងនាព្រឹកថ្ងៃទី៣វិច្ឆិកា គ្រប់នាយកដ្ឋាន គ្រប់មន្ទីរ និងការិយាល័យបរិស្ថានទាំងអស់ ដែលជាអ្នកដឹកនាំអនុវត្តការងារនានារបស់ក្រសួងបរិស្ថាន ពោល រាប់ចាប់ពីអ្នកដឹកនាំកិច្ចការងារនៅក្នុងក្រសួងរហូតដល់ថ្នាក់មូលដ្ឋាន ចាំបាច់ជ្រើសរើសមនុស្សឬក៏មន្ត្រី ជាពិសេសជ្រើសរើសអ្នកបន្តវេនដឹកនាំធ្វើកិច្ចការងារនានា គឺត្រូវតែរើសយកមនុស្សប្រកបដោយភាពវ៉ៃឆ្លាត រឹងមាំ មានសតិសម្បជញ្ញៈខ្ពស់ មានមនសិការខ្ពស់ និងស្នេហាជាតិ។
«បើយើងរកអ្នកទាំងហ្នឹងមិនបានទេ ជាពិសេសអ្នកបន្តវេន[នោះ] ក្រសួងរបស់យើងនឹងមានការលំបាក»។ នេះជាការលើកឡើងរបស់ លោក សាយ សំអាល់ ដោយសង្កត់ធ្ងន់ថា៖ «អ្នកបន្តវេននេះ តួនាទីនិងភារៈកិច្ចគឺអាចបាន និងទទួលយកមកហើយ ក៏ប៉ុន្តែមានមនសិការជាកម្មាភិបាលដែរឬអត់។ អ៊ីចឹង ការចាត់តាំងរបស់យើងនេះ ក៏ទាមទារឱ្យយើងយកចិត្តទុកដាក់ខ្ពស់ ហើយចាត់តាំងមនុស្សឱ្យត្រូវមកកាន់តួនាទី និងភារៈកិច្ចមួយនេះ ដែលយើងចង់ឱ្យក្រសួងរបស់យើងមានភាពរឹងមាំ ដើម្បីយើងមានលទ្ធភាពបម្រើប្រជាជនកម្ពុជា»។
ជាមួយគ្នានេះ លោករដ្ឋមន្ត្រីបរិស្ថាន បានស្នើឱ្យមន្ត្រីគ្រប់នាយកដ្ឋាន គ្រប់មន្ទីរ គ្រប់ការិយាល័យបរិស្ថានទាំងអស់ត្រូវកំណត់កិច្ចការងារក្នុងដែនសមត្ថកិច្ចរបស់ខ្លួននីមួយៗឱ្យបានច្បាស់លាស់ ក្នុងវិស័យបរិស្ថាន ដោយប្រកបតាមវិជ្ជាជីវៈ ដើម្បីកិច្ចគាំពារបរិស្ថាន ការអភិរក្សចម្រុះ ការរស់នៅប្រកបដោយចីរភាពតាមរយៈការអប់រំ។
មន្ត្រីគ្រប់ជាន់ថា្នក់របស់ក្រសួងបរិស្ថាន ចូលរួមសន្និបាតបូកសរុបលទ្ធផលការងារបរិស្ថានឆ្នាំ២០២០ និងលើកទិសដៅការងារឆ្នាំ២០២១ នៅទីស្តីការក្រសួងបរិស្ថាន កាលពីរសៀលថ្ងៃទី៣វិច្ឆិកា ឆ្នាំ២០២០។ រូបថត៖ ក្រសួងបរិស្ថាន
បើតាមលោកសាយ សំអាល់ មន្ត្រីបរិស្ថាននីមួយៗ គឺត្រូវចេះ និងកែច្នៃសម្រាប់អនុវត្តដោយបានដោយចីរភាព ទៅតាមស្ថានភាពផ្សេងៗ។ លើសពីនេះទៅទៀត លោក បានផ្តែផ្តាំដល់មន្ត្រីរបស់ខ្លួនថា មុនត្រូវធ្វើអ្វីមួយ គឺត្រូវមានចក្ខុវិស័យមួយ ត្រូវមានផែនការ និងថវិកា ជាពិសេសគឺមានធនធានមនុស្ស ដែលក្រសួងបរិស្ថានកំពុងខិតខំកសាងឬបណ្តុះបណ្តាលធនធានមនុស្សរហូតដល់សព្វថ្ងៃនេះ។
សូមជម្រាបថា ក្រសួងបរិស្ថានបានធ្វើប្រារព្ធសន្និបាតបូកសរុបលទ្ធផលការងារបរិស្ថានឆ្នាំ២០២០ និងលើកទិសដៅការងារឆ្នាំ២០២១ នៅទីស្តីការក្រសួងបរិស្ថានចំនួន២ថ្ងៃ ពោលគឺពីថ្ងៃទី៣-៤វិច្ជិកា៕
Tag:
៖ ធនធានមនុស្ស
លោកសាយ សំអាល់
© រក្សាសិទ្ធិដោយ thmeythmey.com
