COVID-19
ជាតិ
លោក វេង សាខុន នឹងធ្វើចត្តាឡីស័ក ក្រោយជួបប្រមុខការទូតហុងគ្រី ដែលទើបរកឃើញCOVID-19
លោក Peter Szijjarto រដ្ឋមន្ត្រីការបរទេសហុងគ្រី ចាប់ដៃជាមួយលោក វេង សាខុន រដ្ឋមន្រ្តីក្រសួងកសិកម្ម ក្រោយចុះហត្ថលេខាលើកិច្ចកិច្ចព្រមព្រៀង និងអនុស្សារណៈយោគយល់គ្នា នៅវិមានសន្តិភាព កាលពីថ្ងៃទី៣វិច្ឆិកា ម្សិលមិញ។
×![]()
ភ្នំពេញ៖ រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ លោក វេង សាខុន ប្រកាសធ្វើចត្តាឡីស័កខ្លួនឯង ក្រោយជួបលោក Peter Szijjarto រដ្ឋមន្ត្រីការបរទេសហុងគ្រី ដែលត្រូវបានគេរកឃើញជំងឺកូវីដ-១៩ ។
ថ្លែងប្រាប់សារព័ត៌មានថ្មីៗ នៅថ្ងៃទី៤ វិច្ឆិកា រដ្ឋមន្ត្រីកសិកម្មរូបនេះ បានបញ្ជាក់ថា លោកនិងមន្ត្រីជាន់ខ្ពស់៧នាក់ទៀត នឹងអនុវត្តតាមវិធានការរបស់ក្រសួងសុខាភិបាល។ បើតាមលោក វេង សាខុន ក្នុងជំនួបពិភាក្សាជាមួយរដ្ឋមន្ត្រីការបរទេសហុងគ្រី កាលពីថ្ងៃទី៣ វិច្ឆិកានោះ ក៏មានអ្នកកាសែតរបស់ទូរទស្សន៍ជាតិ (ទទក) ម្នាក់ ចុះផ្ដិតយករូបភាពដែរ។
លោករដ្ឋមន្ត្រីកសិកម្ម ដែលកំពុងស្ថិតនៅខេត្តពោធិ៍សាត់ បាននិយាយដូច្នេះថា៖«ប្រាកដណាស់ នៅពេលមានសភាពការណ៍មិនស្រួលកើតឡើង យើងនឹងធ្វើ(ចត្តាឡីស័ក) ព្រោះវាជាកាតព្វកិច្ចរបស់យើង តាមវិធានការរបស់ក្រសួងសុខាភិបាល»។
លោក Peter Szijjarto រដ្ឋមន្ត្រីការបរទេសហុងគ្រី ដែលទើបតែបញ្ចប់ដំណើរទស្សនកិច្ចនៅកម្ពុជានេះ ត្រូវបានរកឃើញថា មានផ្ទុកកូរ៉ូណាវីរុស ក្នុងអំឡុងពេលដាក់ចត្តាឡីស័កពេលទៅដល់ប្រទេសថៃ។ បញ្ហានេះ បានធ្វើឲ្យជំនួបរវាងលោករដ្ឋមន្ត្រីការបរទេសហុងគ្រី និងនាយករដ្ឋមន្ត្រីថៃ លោកប្រយុទ្ធ ចាន់អូចា ត្រូវលុបចោល។
អត្ថបទទាក់ទង
ក្រៅពីជួបលោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទនេះ លោក Peter Szijjarto រដ្ឋមន្ត្រីការបរទេសហុងគ្រី ក៏បានជួបជាមួយសម្ដេចនាយករដ្ឋមន្ត្រី ហ៊ុន សែន និងថ្នាក់ដឹកនាំកម្ពុជាផ្សេងទៀត រួមមានលោក ប្រាក់ សុខុន រដ្ឋមន្ត្រីការបរទេស និងសហប្រតិបត្តិការអន្តរជាតិ , លោក ប៉ាន សូរស័ក្ដិ រដ្ឋមន្ត្រីក្រសួងពាណិជ្ជកម្ម និងលោក សួស យ៉ារ៉ា សមាជិកសភាកម្ពុជា។ ចំណែកលោក លឹម គានហោ រដ្ឋមន្ត្រីក្រសួងធនធានទឹក និងឧត្តុនិយម និងលោក ម៉ៅ ហាវណ្ណាល់ រដ្ឋមន្ត្រីទទួលបន្ទុករដ្ឋលេខាធិការដ្ឋានអាកាសចរស៊ីវិល ក៏បានជួបលោក Peter Szijjarto រដ្ឋមន្ត្រីការបរទេសហុងគ្រី នៅក្នុងពិធីចុះហត្ថលេខាកិច្ចព្រមព្រៀងរវាងភាគីទាំងពីរ៕
Tag:
វេង សាខុន
COVID-19
© រក្សាសិទ្ធិដោយ thmeythmey.com
