អន្តរជាតិ
លោក មូន ប្តេជ្ញាបន្តកិច្ចសហប្រតិបត្តិការសម្ព័ន្ធមិត្តកូរ៉េខាងត្បូង-អាមេរិក ក្រោមរដ្ឋបាលលោក បៃឌិន
ប្រធានាធិបតីកូរ៉េខាងត្បូង លោក មូន ចេអ៊ីន។ រូបភាព៖ AFP
×![]()
ដោយ: ធៀន ភារិន្ទ
ប្រធានាធិបតីកូរ៉េខាងត្បូង លោកមូន ចេអ៊ីន នៅថ្ងៃទី៩ ខែវិច្ឆិកា បានសន្យាថា នឹងពង្រឹងទំនាក់ទំនងទ្វេភាគីបន្ថែមទៀតជាមួយប្រធានាធិបតីអាមេរិកថ្មី ដែលគ្រោងនឹងចូលកាន់តំណែងចាប់ពីខែមករា ឆ្នាំ២០២១ តទៅ។ ក្នុងកិច្ចសហប្រតិបត្តិការនេះ លោកប្រធានាធិបតីកូរ៉េខាងត្បូង បានប្តេជាការពារមិនឲ្យមានចន្លោះប្រហោងឡើងក្នុងសម្ព័ន្ធមិត្តទាំងពីរ។ 
នៅក្នុងកិច្ចប្រជុំជាមួយជំនួយការជាន់ខ្ពស់របស់វិមានប្រធានាធិបតីកូរ៉េខាងត្បូង Cheong Wa Dae ប្រមុខរដ្ឋកូរ៉េខាងត្បូង លោកមូន ចេអ៊ីន បានលើកឡើងថា៖ « កូរ៉េខាងត្បូង នឹងធានាថា នឹងមិនមានភាពខ្វះចន្លោះណាមួយក្នុងការពង្រឹងកិច្ចសហប្រតិបត្តិការសម្ព័ន្ធមិត្តអាមេរិក-កូរ៉េខាងត្បូង និងដំណើរការសន្តិភាពលើឧបទ្វីបឡើយ»។
ក្នុងន័យនេះ កូរ៉េខាងត្បូង នឹងបង្កើនទំនាក់ទំនងពហុវិស័យជាមួយអាមេរិក ក្នុងរដ្ឋបាលរបស់លោក ចូ បៃឌិន ដែលគ្រោងចូលកាន់តំណែងនៅខែមករា ឆ្នាំ២០២១ខាងមុខនេះ។ បន្ថែមពីលើនេះ លោក មូន ក៏បានប្តេជ្ញាជំរុញទំនាក់ទំនងកូរ៉េខាងត្បូង-អាមេរិក ឲ្យមានកាន់តែរឹងមាំ និងបន្តអភិវឌ្ឍការផ្សារភ្ជាប់ប្រជាជននៃប្រជាជាតិទាំងពីរផងដែរ។
តាមការចុះផ្សាយរបស់ទីភ្នាក់ងារព័ត៌មាន Yonhap កូរ៉េខាងត្បូង នឹងសហការជាមួយរដ្ឋបាលប្រធានាធិបតីទី៤៦ របស់អាមេរិកលើគុណតម្លៃរួមគ្នា ដូចជាលទ្ធិប្រជាធិបតេយ្យ សន្តិភាព សិទ្ធិមនុស្ស កិច្ចសហប្រតិបត្តិការពហុភាគី ការរួបរួមជាអន្តរជាតិ និងជាពិសេសការប្រយុទ្ធប្រឆាំងCOVID-19 និងការបម្រែបម្រួលអាកាសធាតុជាដើម។
ចំណែកក្នុងវិស័យសេដ្ឋកិច្ចវិញ លោក មូន បានលើកឡើងថា កូរ៉េខាងត្បូង នឹងស្វែងរកកិច្ចសហប្រតិបត្តិការទ្វេភាគីលើសេដ្ឋកិច្ចរវាងក្រុងសេអ៊ូល និងក្រុងវ៉ាស៊ីនតោន ឲ្យកាន់តែធំជាងមុន នៅក្នុងអាណត្តិរបស់លោក បៃឌិន ផងដែរ។
នៅថ្ងៃទី៧ ខែវិច្ឆិកាកន្លងទៅ ប្រធានាធិបតីកូរ៉េខាងត្បូងរូបនេះ ក៏បានចេញសារអបអរសាទរលោក បៃឌិន បេក្ខជនប្រធានាធិបតីបក្សប្រជាធិបតេយ្យផងដែរ បន្ទាប់ពីលោក ត្រូវបានបោះឆ្នោតឲ្យជាប់ជាប្រធានាធិបតីទី៤៦របស់អាមេរិក។ ប្រសិនគ្មានការប្រែប្រួលទេ ពិធីប្រគល់តំណែងប្រធានាធិបតីអាមេរិក នឹងធ្វើឡើងនៅចុងខែមករា ឆ្នាំ២០២១ ខាងមុខនេះ៕
Tag:
កូរ៉េខាងត្បូង
អាមេរិក
© រក្សាសិទ្ធិដោយ thmeythmey.com
