អន្តរជាតិ
បក្សសម្ព័ន្ធជាតិដើម្បីប្រជាធិបតេយ្យ ប្រកាសពីជ័យជម្នះ ខណៈលទ្ធផលផ្លូវការមិនទាន់ប្រកាស
រូបភាព៖ Reuters
×![]()
ដោយ: ធៀន ភារិន្ទ
បក្សសម្ព័ន្ធជាតិដើម្បីប្រជាធិបតេយ្យ (NLD) នៅថ្ងៃទី៩ ខែវិច្ឆិកា បានអះអាងថា ខ្លួនបានឈ្នះកៅអីគ្រប់គ្រាន់នៅក្នុងសភាដើម្បីបង្កើតរដ្ឋាភិបាលថ្មី។ យ៉ាងណាក៏ដោយ គណៈកម្មការរៀបចំការបោះឆ្នោតសហព័ន្ធមីយ៉ាន់ម៉ា មិនទាន់ប្រកាសលទ្ធផលផ្លូវការនៅឡើយទេ។ 
ថ្លែងប្រាប់ទីភ្នាក់ងារព័ត៌មានReuters លោកMyo Myunt អ្នកនាំពាក្យបក្ស សម្ព័ន្ធជាតិដើម្បីប្រជាធិបតេយ្យ ដែលជាបក្សកាន់អំណាចរបស់មីយ៉ាន់ម៉ា បានអះអាងថា បក្សរបស់លោក បានកាន់កាប់កៅអី៣២២ នៅក្នុងសភាសហព័ន្ធហើយ។ លោកបញ្ជាក់បែបនេះដោយយោងតាមលទ្ធផលបថម។ គណៈកម្មការរៀបចំការបោះឆ្នោតមិនទាន់បានប្រកាសលទ្ធផលសរុបផ្លូវការនៅឡើយទេ។
ប៉ុន្តែបើតាមទិន្នន័យរបស់សារព័ត៌មានក្នុងស្រុក The Irrawaddy គិតត្រឹមម៉ោង ៥ល្ងាច បក្សកាន់អំណាចរបស់លោកស្រី អ៊ុនសាន ស៊ូជី ដែលជារដ្ឋមន្ត្រីការបរទេសមីយ៉ាន់ម៉ា បានទទួលអាសនៈសភាជាន់ទាប ៤៨កៅអី សភាជាន់ខ្ពស់ ២កៅអី, សភារដ្ឋ និងតំបន់ ទទួលបានចំនួន ៩៣កៅអីហើយ។ ចំនួនកៅអីសភានេះ នឹងកើនឡើងបន្តទៀត។
លទ្ធផលសរុបផ្លូវការ ត្រូវរំពឹងថា អាចប្រកាសនៅថ្ងៃទី៩ ខែវិច្ឆិកា។ នៅក្នុងឆ្នាំ២០១៥កន្លងទៅ បក្សNLD ទទួលបានកៅអីសភាសហព័ន្ធរហូតដល់៣៩០ឯណោះ។ សភាសហព័ន្ធ រួមមានសភាជាន់ទាប និងសភាជាន់ខ្ពស់បញ្ជូលគ្នា និងអាចជ្រើសរើសប្រធានាធិបតី។ ក្នុងនីតិវិធីរើសប្រធានាធិបតីនេះ សភាជាន់ទាប ត្រូវដាក់បេក្ខជនឈរឈ្មោះម្នាក់ សភាជាន់ខ្ពស់ ត្រូវដាក់បេក្ខជនដូចគ្នា ខណៈបេក្ខជនប្រធានាធិបតីមួយរូបទៀត គឺតំណាងដោយយោធា។
ប្រសិនបើបេក្ខជនរូបណា ទទួលបានសំឡេងច្រើនជាងគេនៅក្នុងសភាសហព័ន្ធ អ្នកនោះ នឹងក្លាយជាប្រធានាធិបតី ចំណែកអ្នកទទួលបានសំឡេងបន្ទាប់ពីនោះ នឹងធ្វើជាអនុប្រធានាធិបតីទី១ និងទី២ ទៅតាមលំដាប់នៃសំឡេងទទួលបាន។
បក្សសាមគ្គីនិងអភិវឌ្ឍសហភាព ដែលជាបក្សប្រឆាំងធំជាងគេរបស់មីយ៉ាន់ម៉ា និងមានយោធានៅពីក្រោយ មិនទាន់មានប្រតិកម្មអ្វីនៅឡើយទេ ជុំវិញការលើកឡើងរបស់បក្សសម្ព័ន្ធជាតិដើម្បីប្រជាធិបតេយ្យ។
សូមបញ្ជាក់ថា ក្នុងការបោះឆ្នោតមីយ៉ាន់ម៉ាឆ្នាំ២០២០ មានប្រជាជនប្រមាណ ៣៨លាននាក់ មានសិទ្ធិបោះឆ្នោត។ ចំណែកបក្សនយោបាយមានជិត៩០ ឈរឈ្នោះ ដើម្បីដណ្តើមកៅអីសភាជាន់ខ្ពស់ចំនួន ១៦១ កៅអីជាន់ទាប់ចំនួន ៣១៥ កៅអីសភាតំបន់ចំនួន ៦១២ និងតំណែងរដ្ឋមន្ត្រីទទួលបន្ទុកកិច្ចការជនជាតិភាគតិចចំនួន ២៩កន្លែង៕
Tag:
មីយ៉ាន់ម៉ា
© រក្សាសិទ្ធិដោយ thmeythmey.com
