បទយកការណ៍ / បទសម្ភាសន៍
ជាតិ
នយោបាយជាតិ
លោក ញឹក ប៊ុនឆៃ៖ បើមានអ្នកជំនួស ខ្ញុំនឹងសម្រាកពីឆាកនយោបាយ
× ចាប់ផ្តើមជីវិតតស៊ូនៅក្នុងឆាកនយោបាយតាំងពីអាយុ១៩ឆ្នាំរហូតមកទល់នឹងអាយុជិត៦០ ឆ្នាំហើយ លោក ញឹក ប៊ុនឆៃ ដែលបច្ចុប្បន្នជាអគ្គលេខាធិការគណបក្សហ្វ៊ុនស៊ិនប៉ិច បានសម្តែងការហត់នឿយក្នុងជីវិតជាអ្នកនយោបាយជិតបួនទសវត្សរ៍កន្លងមកនេះ។ លោក បានថ្លែងនៅក្នុងបទសម្ភាសជាមួយគេហទំព័រថ្មីៗថា លោកចង់ចូលនិវត្តន៍ដែរ ប្រសិនបើមានក្មេងជំនាន់ក្រោយមានសមត្ថភាពអាចជំនួសតំណែងលោកបាន។
ខាងក្រោមនេះ ជាបទសម្ភាសរវាងលោក ជា ធីរិទ្ធ អ្នកយកព័ត៌មានគេហទំព័រថ្មីៗ ជាមួយ លោក ញឹក ប៊ុនឆៃ អគ្គលេខាធិការគណបក្សហ្វ៊ុនស៊ិនប៉ិច។
ថ្មីៗ ៖ អស់រយៈពេលជាច្រើនទសវត្សរ៍មកហើយ ដែលលោកឈានប្រឡូកក្នុងឆាកនយោបាយ។ ឆ្លងកាត់ស្ថានភាពនយោបាយពីមួយអណត្តិទៅមួយអណត្តិ តើលោកមានដែលគិតថា ធុញទ្រាន់នឹងរឿងនយោបាយទេ?
ញឹក ប៊ុនឆៃ៖ ខ្ញុំមានពេលខ្លះធុញទ្រាន់ម្តងម្កាលដែរហ្នឹង តែធ្វើម្តេចបើ សង្គម ប្រទេសជាតិ គណបក្ស ត្រូវការយកខ្ញុំទៅប្រើ ប្រហែលជាគេគិតថា ខ្ញុំនៅមានប្រយោជន៍សម្រាប់ជាតិ សម្រាប់គណបក្សហ្វ៊ុនស៊ិនប៉ិច ហើយមើលទៅ ។ ហើយម្យ៉ាងទៀត ខ្ញុំក៏ពេញចិត្តនឹងជួយ ជាពិសេសបណ្តុះបណ្តាលក្មេងជំនាន់ក្រោយដែរ។
ថ្មីៗ ៖ ទស្សនៈមួយគេនិយាយថា អ្នកធ្វើនយោបាយគឺញៀននឹងធ្វើនយោបាយ ចង់តែប្រឡូកក្នុងឆាកនយោបាយតែម្តង មិនចង់ទៅឆ្ញាយទេ។ សម្រាប់លោកយល់យ៉ាងម៉េចដែរ ចំពោះទស្សនៈនេះ?
ញឹក ប៊ុនឆៃ៖ សម្រាប់ខ្ញុំមិនញៀននោះទេ ធាតុពិតទៅខ្ញុំចង់ចូលនិវត្តន៍ណាស់ ព្រោះខ្ញុំប្រឡូកក្នុងឆាកនយោបាយតាំងពីអាយុ១៩ ឆ្នាំ ឥឡូវជិត៦០ ហើយ វាល្មមនិងគ្រប់គ្រាន់ហើយសម្រាប់ខ្ញុំក្នុងការសម្រាកពីជីវិតនយោបាយនោះ។ តែខាងថ្នាក់ដឹកនាំ និងមន្ត្រីសមាជិកគណបក្សហ្វ៊ុនស៊ុនប៉ិច នៅតែត្រូវការខ្ញុំខ្លាំងណាស់ ព្រោះអត់ខ្ញុំវាលំបាកណាស់សម្រាប់គណបក្សនេះ។
ថ្មីៗ ៖ និយាយដល់ជីវិតនយោបាយរបស់លោកជាមួយគណបក្សហ្វ៊ុនស៊ុនប៉ិច មើលទៅគ្មានអ្វីទៅមុខសោះ មានតែថយក្រោយវិញ។ ជាក់ស្តែងដូចជាលទ្ធផលនៃការបោះឆ្នោតអាណត្តិទី៥ កន្លងទៅជាដើម។ បើរីកចម្រើនគ្មាន មានតែចុះខ្សោយ ហេតុអ្វីលោកមិនឈប់តែម្តងទៅ?
ញឹក ប៊ុនឆៃ៖ (សើច) វាគ្មានអ្វីទេ គណបក្សហ្វ៊ុនស៊ិនប៉ិចនៅតែមានការគាំទ្រ ហើយខ្ញុំសង្ឃឹមថា គណបក្សហ្វ៊ុនស៊ិនប៉ិច នៅអណត្តិក្រោយនេះ នឹងទទួលបានសំឡេងគាំទ្រខ្លាំងដូចមុន។ ម្យ៉ាងទៀតខ្ញុំបន្តជីវិតនយោបាយ ដើម្បីជួយបង្ហាត់បង្រៀនក្មេងជំនាន់ក្រោយឲ្យមានសមត្ថភាពអាចធ្វើការជំនួសខ្ញុំបាន។
ថ្មីៗ ៖ ត្រង់នេះ លោកចង់មានន័យថា បើមានអ្នកសមត្ថភាពអាចធ្វើការជំនួសបាន លោក នឹងចូលនិវត្តន៍ឬ?
ញឹក ប៊ុនឆៃ៖ ជាការពិតហើយ បើមានអ្នកមានសមត្ថភាពអាចជំនួសខ្ញុំបាន ខ្ញុំនឹងសម្រាកពីនយោបាយ ទុកឲ្យក្មេងជំនាន់ក្រោយគេធ្វើម្តង ខ្ញុំចាស់ហើយ ចង់ជួយប្រាប់គេនៅពីក្រោយវិញ៕
© រក្សាសិទ្ធិដោយ thmeythmey.com