COVID-19
អន្តរជាតិ
ថៃ អនុញ្ញាតឲ្យទេសចរមកពីគ្រប់ប្រទេសចូលទឹកដីខ្លួន តែត្រូវធ្វើចត្តាឡីស័ក១៤ថ្ងៃដាច់ខាត រូបភាព Xinhua
× ទេសចរទាំងអស់ នឹងត្រូវអនុញ្ញាតឲ្យធ្វើដំណើរទៅកាន់ប្រទេសថៃ ទោះបីជាពួកគេមកពីប្រទេសមានហានិភ័យជំងឺកូវីដ-១៩ ខ្ពស់ក៏ដោយ ក្រោមកម្មវិធីទិដ្ឋាការពិសេស។ នេះជាការផ្លាស់ប្ដូរគោលនយោបាយរបស់ប្រទេសមួយនេះ ដែលមន្ត្រីរដ្ឋាភិបាលអះអាងថា ដើម្បីទាក់ទាញភ្ញៀវទេសចរបរទេសដើម្បីជំរុញកំណើនសេដ្ឋកិច្ចដែលកំពុងរងផលប៉ះពាល់ខ្លាំង។ ទោះជាយ៉ាងណា ទេសចរទាំងអស់ត្រូវអនុវត្តការធ្វើចត្តាឡីស័កសិន។
គណៈរដ្ឋមន្ត្រីថៃ នៅថ្ងៃទី៨ ខែធ្នូ បានយល់ព្រមលើការកែប្រែកម្មវិធីទិដ្ឋាទេសចរណ៍ពិសេស ដែលនឹងអនុញ្ញាតឲ្យអ្នកទេសចរមកពីគ្រប់ប្រទេសអាចចូលទឹកដីថៃបាន ទោះជាស្ថានភាពជំងឺកូវីដ-១៩ ក្នុងប្រទេសរបស់ពួកគេអាក្រក់ ឬធូរស្រាលក្ដី។ មុននេះ ក្រោមកម្មវីពិសេសនេះ មានតែអ្នកទេសចរមកពីប្រទេសមានហានិភ័យទាបប៉ុណ្ណោះដែលអាចទៅថៃបាន។
អ្នកនាំពាក្យរងរដ្ឋាភិបាលថៃ លោកស្រី Ratchada Dhnadirek និយាយថា ការសម្រេចចិត្តថ្មីនេះ ធ្វើឡើងក្រោយការសង្កេតឃើញមានអ្នកទេសចរតិចតួចដែលធ្វើដំណើរទៅថៃតាមរយៈកម្មវិធីខាងលើ។ បើតាមមន្ត្រីរូបនេះ តាំងពីការចូលធរមាននៅចុងខែតុលា មានអ្នកទេសចរ២៩សញ្ជាតិស្មើនឹង៨២៥នាក់ បានទៅថៃ បូកផ្សំនាវាកម្សាន្តឯកជន៨ប៉ុណ្ណោះ។ ដូចនេះ ការកែប្រែកម្មវិធីថ្មី នឹងជួយទាក់ទាញភ្ញៀវកាន់តែច្រើនដើម្បីជួយវិស័យទេសចរក្នុងស្រុក។
ទោះជាយ៉ាងណា រដ្ឋាភិបាលក្រុងបាងកក ក៏មិនបន្ធូរដៃក្នុងការទប់ស្កាត់ការចម្លងជំងឺកូវីដ-១៩ ដោយអ្នកទេសចរទាំងអស់ ត្រូវតែធ្វើចត្តាឡីស័ក១៤ថ្ងៃដាច់ខាតពេលទៅដល់ថៃ តែទិដ្ឋាការរបស់ពួកគេ នឹងត្រូវពង្រីកយូរជាងមុនដែរ។ នេះបើតាមការផ្សាយរបស់កាសែតបាងកកប៉ុស្តិ៍។
ស្ថានភាពជំងឺកូវីដ-១៩ នៅថៃ ហាក់មានភាពប្រសើរឡើងនៅរយៈពេលចុងក្រោយ ដោយករណីឆ្លងពីខាងក្រៅប្រទេស មិនចោទជាបញ្ហាឡើយ។ ប៉ុន្តែករណីឆ្លងនៅខេត្តភាគខាងជើង ដែលរកឃើញក្នុងចំណោមពលរដ្ឋថៃត្រឡប់ចូលប្រទេសដោយខុសច្បាប់ពីមីយ៉ាន់ម៉ា កំពុងក្លាយជាក្ដីបារម្ភសម្រាប់វិស័យទេសចរក្នុងស្រុក។
នាយករដ្ឋមន្ត្រីថៃ ប្រាយុទ្ធ ចន្ទអូចា អះអាងនៅថ្ងៃទី៨ ខែធ្នូ ថា ថៃមិនទាន់រងរលកទីពីរឡើយ។ លោកប្រាប់ឲ្យប្រជាជនថៃ កុំជ្រួលច្របល់ ព្រោះវានឹងធ្វើឲ្យស្ថានការណ៍កាន់តែអាក្រក់។ លោកក៏រិះគន់ការផ្សព្វផ្សាយព័ត៌មានពីករណីនៅខេត្តឈៀងរ៉ៃ ដែលធ្វើឲ្យការកក់បន្ទប់សណ្ឋាគារ ត្រូវលុបចោលវិញ៕
© រក្សាសិទ្ធិដោយ thmeythmey.com