ជាតិ
កសិករប្រមូលផលស្រូវវស្សាបានជាង៥.៦លានតោន លើផ្ទៃដីស្រែជាង១.៧លានហិកតា
រូបភាពពីហ្វេកប៊ុក លោក វេង សាខុន រដ្ឋមន្រ្តីក្រសួងកសិកម្ម
×![]()
ដោយ: សារព័ត៌មានថ្មីៗ
ប្រជាកសិករ នៅទូទាំងប្រទេស បាន និងកំពុងមមាញឹក ក្នុងការប្រមូលផលស្រូវវស្សារបស់។ តាមលោក វេង សាខុន រដ្ឋមន្ត្រីក្រសួងកសិកម្ម គិតត្រឹមថ្ងៃទី៧ ខែធ្នូ មានផ្ទៃដីស្រែវស្សាជាង១.៧លានហិកតា ស្មើនឹង៦៤.១០ភាគរយ ដែលត្រូវបានប្រមូលផលរួច ក្នុងនោះទិដ្ឋផលស្រូវសរុបមានចំនួន ៥,៦៥២,២៩៧តោន។ ទិន្នផលជាមធ្យមក្នុងមួយហិកតា បានចំនួន ៣.១៦តោន។ លោក វេង សាខុន រដ្ឋមន្ត្រីក្រសួងកសិកម្ម បញ្ជាក់បន្ថែមនៅលើគណនីហ្វេសប៊ុកផ្ទាល់ខ្លួនដូច្នេះ។
លោករដ្ឋមន្ត្រីកសិកម្ម ក៏បានបង្ហាញរបាយការណ៍នៃការងារប្រមូលផលស្រូវវស្សានៅតាមបណ្តាខេត្តនីមួយៗ ដែលរៀបចំដោយនាយកដ្ឋានដំណាំស្រូវ នៃអគ្គនាយកដ្ឋានកសិកម្មដែរ។ តាមរបាយការណ៍ ខេត្តកោះកុង ក្រចេះ រតនគិរី និងស្ទឹងត្រែង ប្រមូលផលស្រូវវស្សាបានជាង៩០ភាគរយ នៃផ្ទៃដីដាំដុះសរុប។ រីឯខេត្តកំពត ពោធិ៍សាត់ សៀមរាប ស្វាយរៀង និងខេត្តឧត្តរមានជ័យ ប្រមូលផលបានប្រមាណ៧០ ទៅ៨០ភាគរយ នៃផ្ទៃដាំដុះសរុប។
របាយការណ៍ដដែល ឲ្យដឹងទៀតថាខេត្តបន្ទាយមានជ័យ កំពង់ចាម កំពង់ឆ្នាំង កណ្ដាល មណ្ឌលគិរី ភ្នំពេញ ព្រះវិហារ ព្រៃវែង តាកែវ កែប ប៉ៃលិន និងខេត្តត្បូងឃ្មុំ ទើបប្រមូលផលបានពី៥០ទៅ៦០ភាគរយ ប៉ុណ្ណោះ ខណៈខេត្តបាត់ដំបង កំពង់ស្ពឺ និងខេត្តកំពង់ធំ ប្រមូលផលបានក្រោម៥០ភាគរយ។ ដោយឡែក ខេត្តព្រះសីហនុប្រមូលបានតិចជាងគេ គឺទើបតែបាន២០ភាគរយទេ លើផ្ទៃដីដាំសរុប។
សូមរំឭកថា ដើម្បីស្តារដំណាំស្រូវ និងដំណាំរួមផ្សំ ដែលរងផលប៉ះពាល់ដោយសារទឹកជំនន់ ក្រសួងកសិកម្ម បានចែកពូជស្រូវចំនួន ៦,៤៣៤តោន និងពូជបន្លែជិត ៥៦ម៉ឺនកញ្ចប់ ទៅដល់កសិករ ដែលរងគ្រោះដោយទឹកជំនន់កន្លងមក។ គ្រោះទឹកជំនន់កន្លងមក បានប៉ះពាល់នៅរាជធានី-ខេត្តចំនួន២០ ក្នុងនោះមានពលរដ្ឋប្រមាណ ៦០ម៉ឺននាក់ រងផលប៉ះពាល់, មនុស្ស៤៤នាក់ បានបាត់បង់ជីវិត និងដំណាំកសិកម្មប្រមាណ ៣៨ម៉ឺនហិកតាត្រូវបានជន់លិច៕
Tag:
ប្រមូលផលស្រូវ
ផលស្រូវវស្សា
© រក្សាសិទ្ធិដោយ thmeythmey.com
«ប្រទានកម្ម»មានន័យដូចម្តេច?
2 ម៉ោង
