COVID-19
អន្តរជាតិ
កូវីដ-១៩៖ ចិនធ្វើតេស្តមនុស្ស២៥ម៉ឺននាក់ ក្រោយមានករណីឆ្លងជាចង្កោមនៅក្រុងឆឹងទូ
ការធ្វើតេស្តលើប្រជាជនចិន។ រូបភាព Xinhua
×![]()
អាជ្ងាធរចិននៅថ្ងៃទី៩ ធ្នូ បានធ្វើតេស្តមនុស្សចំនួន២សែន៥ម៉ឺននាក់ ក្រោយពេលរកឃើញករណីកូវីដ-១៩ ជាច្រើនករណីនៅភាគខាងត្បូងទីក្រុងឆឹងទូ ខេត្តស៊ីឈួន។ ការធ្វើតេស្តទ្រង់ទ្រាយធំនេះ ធ្វើឡើងបន្ទាប់ពីប្តីប្រពន្ធចំណាស់មួយគូមានផ្ទុកជំងឺកូវីដ-១៩។
ករណីដំបូងដែលឈានទៅដល់ការធ្វើតេស្តទ្រង់ទ្រាយធំនៅ គឺនៅក្រោយពេលប្តីប្រពន្ធមួយគូត្រូវបានអាជ្ញាធរសុខាភិបាលរកឃើញថាផ្ទុកជំងឺកូវីដ-១៩ នៅថ្ងៃទី៧ ធ្នូកន្លងទៅ។ ក្រោយមក មន្ត្រីសុខាភិបាលបានស្វែងរកអ្នកដែលប៉ះពាល់ជាមួយបុគ្គលខាងលើ ក៏ដូចជាយកម្ហូបអាហារទៅធ្វើតេស្ត។ មន្ត្រីសុខាភិបាលក្រុងឆឹងទូ អះអាងថា ខ្លួនរកឃើញវត្តមានវីរុសជំងឺកូវីដ-១៩ នៅម្ហូបដែលដាក់ក្នុងទូទឹកកក ក៏ដូចជាលើជ្រុញហាន់របស់អ្នកទាំពីរ។
នៅថ្ងៃទី៨ ធ្នូមន្ត្រីទីក្រុងឆឹងទូ បានធ្វើតេស្តកូវីដ-១៩លើមនុស្សចំនួន២៥៥,២០០នាក់ ដោយរកឃើញមនុស្សចំនួន៦នាក់ផ្ទុកជំងឺកូវីដ-១៩ ដែលក្នុងនោះមានមួយករណីដែលមិនបញ្ចេញរោគសញ្ញា។ ក្រោយមានករណីថ្មីនេះភ្លាម សាលារៀន និងមត្តេយ្យក្នុងសង្កាត់ដែលអ្នកឆ្លងជំងឺរស់នៅត្រូវបិទទ្វា ខណៈសិស្ស និងគ្រូបង្រៀនត្រូវនៅដាច់ដោយឡែកផងដែរ។ នេះបើយោងតាមទីភ្នាក់ងារព័ត៌មានAFP។
កាលពីខែដើមខែតុលាកន្លងទៅ អាជ្ញាធរសុខាភិបាលក្នុងក្រុងឈីងតៅ ក៏បានធ្វើតេស្តមនុស្សចំនួនជាង៩លាននាក់ ក្នុងរយៈពេល៥ថ្ងៃ ក្រោយមានការផ្ទុះករណីឆ្លងនៅក្នុងមន្ទីរពេទ្យមួយ។ ចំណែកឯកាលពីចុងខែតុលាវិញ ចិនក៏បានធ្វើតេស្តប្រជាជនចំនួន៤,៧លាននាក់ផងដែរក្រោយស្ត្រីម្នាក់ឆ្លងជំងឺនេះ និងបានធ្វើការក្នុងរោងចក្រកាត់ដេរនៅឯក្រុង Kashgar ខេត្តស៊ីនជាំង។
ជំងឺកូវីដ-១៩ ចាប់ផ្តើមផ្ទុះដំបូងក្នុងក្រុងវូហាន ប្រទេសចិន។ក្នុងរយៈពេលប៉ុន្មានខែចុងក្រោយនេះ ចិនគ្រប់គ្រងករណីឆ្លងជំងឺកូវីដ-១៩បានយ៉ាងល្អ ដោយមិនមាននដល់២០ករណីផងក្នុងមួយថ្ងៃ។អ្វីដែលគួរឲ្យកត់សម្គាល់ក្នុងរយៈពេលថ្មីៗនះ អាជ្ញារធរ ក៏ដូចជាប្រព័ន្ធផ្សព្វផ្សាយចិន តែងអះអាងថាប្រជាជនខ្លួនឆ្លងជំងឺកូវីដ-១៩ពីអាហារវេចខ្ចប់ដែលនាំចូលពីបរទេស។
ជាក់ស្តែងមន្ត្រីក្រុងធៀនជីន កាលពីខែវិច្ឆិកាបានបញ្ជាក់ថា ករណីឆ្លងក្នុងទីក្រុងមានប្រភពមកពីអាហារដែលនាំចូលពីតំបន់អាមេរិកខាងជើង ដោយអះអាងថា ប្រភេទជំងឺកូវីដ-១៩នេះស្រដៀងទៅនឹងប្រភេទនៅតំបន់អឺរ៉ុប និងអាមេរិក។ ចំពោះរឿងនេះអង្គការសុខភាពពិភពលោក (WHO) អះអាងថា មិនទាន់មានភស្តុតាងដែលមនុស្សអាចឆ្លងជំងឺនេះពីអាហារ ឬអាហារវេចខ្ចប់ឡើយ។
គិតត្រឹមថ្ងៃទី៨ ធ្នូ ចិនមានករណីឆ្លងសរុបចំនួន៨៦,៦៦១ករណី ជាសះស្បើយចំនួន៨១,៧៤៣ករណី និងស្លាប់ចំនួន៤,៦៣៤នាក់៕
Tag:
ចិន
កូវីដ-១៩
© រក្សាសិទ្ធិដោយ thmeythmey.com
