COVID-19
អន្តរជាតិ
អ្នកដំណើរលើនាវា Quantum ដែលមានផ្ទុកកូវីដ-១៩ ត្រលប់មកអវិជ្ជមានវិញហើយ
×![]()
ដោយ: ធៀន ភារិន្ទ
ក្រសួងសុខាភិបាលសិង្ហបុរី នៅថ្ងៃទី៩ ខែធ្នូ បានអះអាងថា អ្នកដំណើរលើនាវាកម្សាន្ត Quantum of the Seas វ័យ ៨៣ឆ្នាំ ដែលរកឃើញថាមានផ្ទុកវិជ្ជមាននៃកូវីដ-១៩ មានលទ្ធផលអវិជ្ជមានវិញ បន្ទាប់ពីធ្វើតេស្តចំនួនពីរលើកពេលទៅដល់សិង្ហបុរីវិញ។ 
នាវា Quantum of the Seas របស់ក្រុមហ៊ុន Royal Caribbean International ត្រូវត្រលប់បកក្រោយវិញ បន្ទាប់ពីរកឃើញថា បុរសវ័យ ៨៣ឆ្នាំម្នាក់មានផ្ទុកកូវីដ-១៩ បន្ទាប់ពីប្រតិបត្តិការលើសមុទ្របានជាច្រើនថ្ងៃ។
បន្ទាប់ពីត្រលប់មកសិង្ហបុរីវិញ បុរសរូបនេះ ត្រូវធ្វើតេស្តសារជាថ្មីពីរលើកទៀត ដោយយកសំណាកចាស់ដែលធ្វើតេស្តលើនាវា និងសំណាកថ្មីមួយទៀត។ លទ្ធផលចេញពីមន្ទីរពិសោធន៍សុខភាពសាធារណៈសិង្ហបុរី (NPHL) បង្ហាញថា អវិជ្ជមានទាំងពីរលើក។ នេះបើតាមការចុះផ្សាយរបស់ទូរទស្សន៍ Channel News Asia។
យ៉ាងណាក៏ដោយ បុរសវ័យ ៨៣ឆ្នាំរូបនេះ នឹងត្រូវធ្វើតេស្តម្តងទៀត នៅថ្ងៃទី១០ ខែធ្នូ ដើម្បីបញ្ជាក់ ថាតើលោកមានផ្ទុកកូវីដ-១៩ ឬក៏អត់។ ចំណែកអ្នកពាក់ព័ន្ធ ដូចជាអ្នកដំណើរលើនាវា និងបុគ្គលិកបម្រើការលើនាវា ក៏ត្រូវបានដាក់ឲ្យនៅដាច់ដោយឡែកផងដែរ។
យ៉ាងណាមិញ ក្រុមហ៊ុន Royal Caribbean បានអះអាងថា ក្រុមហ៊ុនខ្លួន នឹងអនុញ្ញាតឲ្យនាវាធ្វើប្រតិបត្តិការជាថ្មី នៅថ្ងៃទី១៤ ខែធ្នូ ខាងមុខ ដោយមានការត្រួតពិនិត្យសុខភាពអ្នកដំណើរយ៉ាងត្រឹមត្រូវ គោរពវិធានអនាម័យ ការរក្សាគម្លាតសុវត្ថិភាព និងតាមការណែនាំរបស់ក្រសួងសុខាភិបាលសិង្ហបុរី។
គួររំលឹកថា សិង្ហបុរី បានអនុញ្ញាតឲ្យនាវាទេសចរណ៍ចំនួន ពីរខ្សែប្រតិបត្តិឡើងវិញនៅក្នុងខែវិច្ឆិកា ដោយមានភ្ជាប់ជាមួយវិធានការទប់ស្កាត់កូវីដ-១៩ មួយចំនួន។ រាល់នាវាទេសចរណ៍ ដែលប្រតិបត្តិការនៅលើផ្ទៃសមុទ្រ ត្រូវទាមទារឲ្យមានប្រព័ន្ធបន្សុទ្ធខ្យល់ចេញចូលត្រឹមត្រូវ និងមានឧបករណ៍ជំនួយផ្លូវដង្ហើម សម្រាប់អ្នកជំងឺលើនាវាជាដើម។
គិតមកត្រឹមថ្ងៃទី៩ ខែធ្នូ សិង្ហបុរី មានករណីឆ្លងសរុបចំនួន ៥៨២៩១ករណី អ្នកស្លាប់មានចំនួន ២៩នាក់។ ចំណែកអ្នកជាសះស្បើយមានចំនួន ៥៨១៨២នាក់៕
Tag:
សិង្ហបុរី
កូវីដ-១៩
© រក្សាសិទ្ធិដោយ thmeythmey.com
«ស្មើរនេះ», «ថ្មើរនេះ» និង«ថ្មារនេះ» មួយណាត្រូវ?
ភ្នំពេញ 2 ថ្ងៃ
