ជាតិ
ត្រីប្រហុកឆ្នាំនេះ ថ្លៃជាងឆ្នាំមុន
× ភ្នំពេញ៖ រដូវធ្វើត្រីប្រហុក និងផ្អក បានមកដល់ មានប្រជាពលរដ្ឋជាច្រើន បានរង់ចាំទិញត្រី ដើម្បីធ្វើប្រហុក នៅទីតាំងសង្កាត់ច្រាំងចំរេះ១ ខណ្ឌឫស្សីកែវ រាជធានីភ្នំពេញ។ ប៉ុន្តែផលត្រីប្រហុក នៅឆ្នាំនេះ ហាក់មិនសូវសម្បូរ បើប្រៀបទៅនឹងឆ្នាំមុន ថែមទាំងមានតម្លៃថ្លៃផងដែរ។
ដើម្បីជ្រាបច្បាស់សូមលោកអ្នកនាង ទស្សនាបទសម្ភាស របស់ កញ្ញា ខន ណារី អ្នកសារព័ត៌មាន ThmeyThmey25 ដូចតទៅ៖
ថ្ងៃទី២១ ធ្នូនេះ ជាថ្ងៃទី២ នៃរដូវធ្វើត្រីប្រហុក និង ផ្អក ដូចដែលរដ្ឋបាលជលផល បានជូនដំណឹង ដល់ពលរដ្ឋេ អាចចាប់ផ្ដើម មកទិញត្រីប្រហុក ចាប់ពីថ្ងៃទី ២០ខែធ្នូ ដល់ថ្ងៃទី ២៦ ខែធ្នូ ពោលមានរយៈពេល មួយសប្ដាហ៍។ នៅថ្ងៃនេះយើងសង្កេត ឃើញថា មានពលរដ្ឋ ជាច្រើន មកពីតាមបណ្ដាខេត្តនានា បានរង់ចាំ ទិញត្រី ដើម្បីទុកធ្វើប្រហុក ផ្អក។ មានអ្នកខ្លះ មកចាំរយៈពេល ២ថ្ងៃ ទម្រាំបានត្រី ហើយអ្នកខ្លះទៀត មិនទាន់បានត្រីផង ព្រោះមិនសូវសម្បូរ និងមានតម្លៃថ្លៃពេក។
ពលរដ្ឋដែលបានអង្គុយចាំ ទិញត្រីប្រហុក នៅទីតាំងនោះ បានរអ៊ូរទាំ ពីតម្លៃកើនឡើង នៃត្រីប្រហុកនៅឆ្នាំនេះ ដោយមួយគីឡូ តម្លៃ ៧ ០០០រៀល (ទិញនៅច្រាំងទន្លេ ហើយមិនទាន់កាត់ក្បាល) ខណៈតម្លៃ ៥ ០០០រៀល (ទៅទិញដល់កន្លែងលើកដាយផ្ទាល់ ហើយមិនទាន់កាត់ក្បាល) ដោយឆ្នាំមុន តម្លៃត្រីប្រហុក ពី ៣ ០០០រៀល ទៅ ៤ ០០០រៀល ប៉ុណ្ណោះ ក្នុងមួយគីឡូក្រាម។
បើតាមមន្ត្រីជលផល ប្រចាំការនៅដាយ ៤អេ ប្រាប់សារព័ត៌មានThmeyThmey25 យ៉ាងដូច្នេះ៖«ឆ្នាំនេះ យើងមិនទាន់ សង្មត់បាននោះទេ ថាឆ្នាំនេះត្រីសម្បូរ ជាងឆ្នាំមុន ឬយ៉ាងណា ប៉ុន្តែបើតាមការង្កេត ត្រីប្រហុក នៅបរិមាណមធ្យមនៅឡើយ (ព្រឹកថ្ងៃទី២ នៃរដូវត្រីប្រហុក) តែចាប់ពីស្អែក(ថ្ងៃទី៣) ត្រីអាចសម្បូរជាងនេះ» ។ សម្រាប់ដាយ ៤អេ ផ្ទាល់ ក្នុងរយៈពេលកន្លះម៉ោង លើកគេលើកម្ដង ហើយម្ដងៗ ទទួលបានទិន្នផលត្រីពី ១៥០គីឡូក្រាមទៅ ២៥០គីឡូក្រាម»៕
© រក្សាសិទ្ធិដោយ thmeythmey.com