ជាតិ
សេដ្ឋកិច្ច
សមាគមវារីវប្បករកម្ពុជា អាចផ្គតផ្គង់ត្រីបានជាង២,៣ម៉ឺនតោន ក្នុងរយៈពេល៣ខែ ដើម្បីប្រជែងការនាំចូលពីវៀតណាម
×![]()
ភ្នំពេញ៖ កសិករចិញ្ចឹមត្រីជាង២០០គ្រួសារ ជាសមាជិកសមាគមវារីប្បករកម្ពុជា មានត្រីគ្រប់ប្រភេទចំនួន២៣,៥២០តោន សម្រាប់ផ្គត់ផ្គង់នៅលើទីផ្សារ។ លោកសុខ រ៉ាដែន ប្រធានសហគមវារីវប្បករកម្ពុជា បានប្រាប់សារព័ត៌មានថ្មីៗ(ThmeyThmey)ថា បរិមាណត្រីរបស់ប្រជាកសិករទាំងនេះ អាចផ្គត់ផ្គង់តម្រូវការនៅលើទីផ្សារបានក្នុងរយៈពេល៣ខែ (ពោលចាប់ពីធ្នូ ឆ្នាំ២០២០ តទៅ) ខណៈតម្លៃត្រីក្នុងស្រុកពិបាកប្រកួតប្រជែងនឹងត្រីនាំចូលពីវៀតណាម។
លោក សុខ រ៉ាដែន បានបញ្ជាក់ថា កសិករចិញ្ចឹមត្រី ដែលបានចូលជាសមាជិករបស់សមាគមវារីវប្បករកម្ពុជា មាននៅតាមបណ្តាខេត្តនានា ដូចជាកណ្តាល កំពង់ចាម ពោធិ៍សាត់ បាត់ដំបង សៀមរាប កំពង់ធំ កំពង់ឆ្នាំ ព្រៃវែង និងខេត្តតាកែវ។
លោក សុខ រ៉ាដែន ប្រធានសមាគមវារីវប្បករកម្ពុជា
លោក សុខ រ៉ាដែន បានបញ្ជាក់ថា ការបង្កើតសមាគមនេះឡើង គឺដើម្បីប្រមូលផ្តុំនៃអ្នកចិញ្ចឹមត្រីនៅកម្ពុជា ក្នុងគោលដៅចែករំលែកបទនូវពិសោធន៍នានាក្នុងវិស័យវារីវប្បកម្ម។ ជាពិសេសដោះស្រាយបញ្ហាទីផ្សារ និងបញ្ហាប្រឈមនានាទៀត។ លោក សុខ រ៉ាដែន បាននិយាយដូច្នេះ៖«ជាពិសេស គឺយើងចង់ដឹងពីបរិមាណនៃប្រភេទត្រីនីមួយៗឱ្យបានច្បាស់លាស់ដែលប្រជាកសិករយើងផលិតបាន សម្រាប់ផ្គត់ផ្គង់ទីផ្សារយើង»។
លោក ជា រ៉ាដែន បន្តលើកឡើងថា បច្ចុប្បន្នសមាគមវារីវប្បករកម្ពុជា កំពុងសហការជាមួយរដ្ឋបាលជលផល ក្នុងការប្រមូលទិន្នន័យឬស្រង់ស្ថិតិកសិដ្ឋានចិញ្ចឹមត្រី, កន្លែងចិញ្ចឹម និងបណ្តុំអាជីវកម្មផ្សេងៗទៀត ដើម្បីដឹងអំពីបរិមាណផ្គត់ផ្គង់ត្រីនៅក្នុងស្រុក ដើម្បីឆ្លើយតបនឹងតម្រូវការទីផ្សារឱ្យមានតុល្យភាពគ្នានៃការនាំចូលត្រីពីវៀតណាម។
ក្រោយកិច្ចប្រជុំបន្ទាន់ជាមួយខាងវារីវប្បករកម្ពុជាពីការត្អូញត្អែរលើការនាំចូលត្រីពីវៀតណាមដ៏ច្រើនលើសលុប កាលពីថ្ងៃទី១៤ធ្នូ ឆ្នាំ២០២០នោះ លោក វេង សាខុន រដ្ឋមន្ត្រីកសិកម្ម រុក្ខាប្រមាញ់ និងនេសាទ បានបញ្ជាឱ្យមន្ត្រីពាក់ព័ន្ធទាំងអស់ ពិសេសខាងរដ្ឋបាលជលឱ្យតាមដានត្រួតពិនិត្យឱ្យច្បាស់លាស់ និងទប់ស្កាត់ បទល្មើសការនាំចូលផលវារីវប្បកម្មពីប្រទេសវៀតណាម។ លើសពីនេះ រដ្ឋមន្ត្រីកសិកម្ម ក៏បានបង្កើតគណៈកម្មការជំរុញវារីវប្បកម្មកម្ពុជាឡើង ក្នុងការពិនិត្យពិភាក្សាឱ្យបានស៊ីជម្រៅលើដំណើរការផលិតកម្មអាជីវកម្ម និងដោះស្រាយបញ្ហាប្រឈមនានាឱ្យមានប្រសិទ្ធភាពខ្ពស់ ដើម្បីជួយសម្របសម្រួលក្នុងកិច្ចការផលិតកម្មអាជីវកម្មរបស់សមាគមវារីវប្បករ សំដៅបង្កើនសមត្ថភាពផលិត ផ្គត់ផ្គង់ក្នុងស្រុក និងនាំចេញផងដែរ។
សារព័ត៌មានថ្មីៗ ពុំអាចសុំការបញ្ជាក់ទិន្នន័យណាមួយពីលោកអេង ជាសាន ប្រតិភូរាជរដ្ឋាភិបាលកម្ពុជាទទួលបន្ទុកជាប្រធានរដ្ឋបាលជលផល និងជាអនុប្រធានគណៈកម្មការ ជុំវិញវារីវប្បកម្មកម្ពុជា និងការនាំចូលត្រីពីប្រទេសជិតខាងបានឡើយ ដោយទូរសព្ទលោកហៅចូល ប៉ុន្តែគ្មានអ្នកទទួល។
ពាក់ព័ន្ធនឹងបញ្ហាការហូរចូលត្រីរបស់វៀតណាមដ៏ច្រើនលើសលុបនៅលើទីផ្សារកម្ពុជាបច្ចុប្បន្ន លោកស្រី វុឌ្ឍី អ្នកនាំពាក្យក្រសួងកសិកម្ម បានអះអាងថា ក្រសួងកសិកម្ម មិនបានអនុញ្ញាតឱ្យនាំចូលឡើយ។ លោក បន្តបញ្ជាក់ប្រាប់សារព័ត៌មានថ្មីៗនាព្រឹកថ្ងៃទី២១ធ្នូ តាមប្រព័ន្ធទំនាក់ទំនងសង្គមតេលេក្រាម(telegram)លើបញ្ហាត្រីរបស់វៀតណាមហូរចូលទីផ្សារកម្ពុជាយ៉ាងខ្លីដូច្នេះ៖«[យើង] កំពុងទប់ការនាំចូលហើយ ប៉ុន្តែទាមទារការចូលរួមពីសមត្ថកិច្ចពាក់ព័ន្ធ»។
បើតាមអ្នកនាំពាក្យក្រសួងកសិកម្ម និងជាអនុប្រធានគណៈកម្មការវារីវប្បករកម្ពុជា នៅព្រឹកថ្ងៃសុក្រទី២៥ធ្នូ ខាងមុននេះ គណៈកម្មការវារីវប្បករកម្ពុជា នឹងប្រជុំជាមួយសមាជិក និងភាគីពាក់ព័ន្ធដើម្បីជំរុញការងារ ក្នុងការទប់ស្កាត់ ឬកាត់បន្ថយការនាំត្រីចូលពីរៀតណាម។
បើតាមរបាយការណ៍បូកសរុបការងារកសិកម្ម រុក្ខាប្រមាញ់និងនេសាទប្រចាំឆ្នាំ២០១៩-២០២០ លើវិស័យជលផលឆ្នាំ២០១៩ ផលនេសាទ និងវារីវប្បកម្មសរុបមានចំនួន ៩០៨ ៥០៨តោន ក្នុងនោះផលនេសាទទឹកសាបមាន ៤៧៨ ៨៥០ តោន ផលនេសាទសមុទ្រមាន ១២២ ៥៥០តោន និងផលវារីវប្បកម្មមាន ៣០៧ ៤០៨តោន៕
Tag:
កសិកម្ម
វារីវប្បករ
ត្រី
© រក្សាសិទ្ធិដោយ thmeythmey.com
