កីឡាអន្តរជាតិ
អន្តរជាតិ
Man Utd ឡើងទៅជួបMan City រីឯSpurs ត្រូវប៉ះBrentford នៅវគ្គ១/២ នៃពានLeague Cup
× Manchester United ត្រូវឡើងទៅជួប Manchester City រីឯTottenham hotspur ត្រូវប៉ះជាមួយក្រុម Brentford នៅវគ្គពាក់កណ្ដាលផ្ដាច់ព្រ័ត្រ នៃពានរង្វាន់ League Cup ក្រោយទម្លាក់គូប្រកួតរៀងខ្លួន។
ក្រុមបិសាចក្រហម Man Utd បានយកឈ្នះក្រុម Everton ដោយលទ្ធផល២ទល់០ នាទឹកដី Goodison Park ។ ២គ្រាប់របស់ Man Utd នេះ រកបានដោយខ្សែប្រយុទ្ធសញ្ជាតិអ៊ុយរ៉ាហ្គាយ Edinson Cavani ដោយការស៊ុតពីក្រៅប្រអប់គ្រោះថ្នាក់ នៅនាទី៨៨ ក្រោយពីការបញ្ជូនបាល់របស់ Anthony Martial ។ ឈានដល់នាទី៩០បូក៥ទៅហើយ ខ្សែប្រយុទ្ធសញ្ជាតិបារាំង Anthony Martial បានបន្ថែមមួយគ្រាប់ទៀត ក្រោយពីការបញ្ជូនបាល់របស់ Marcus Rashford ។
ចំណែកជំនួបមួយគូទៀត គឺក្រុម Tottenham hotspur បានយកឈ្នះ Stoke City ដោយលទ្ធផល៣ទល់១។ ការប្រកួតសម្រុកគ្នាទៅវិញទៅមកនៅនាទី២២ ទើបខ្សែប្រយុទ្ធសញ្ជាតិវ៉េល Gareth Bale ស៊ុតនាំឲ្យមុខឲ្យ Spurs ១ទល់០ នៅតង់ទី១។ លុះមកដល់តង់ទី២ កីឡាករ Jordan Thompson រកបានមួយគ្រាប់ឲ្យStoke Cityតាមស្មើ ១ទល់១ នៅនាទី៥៣។ ប៉ុន្តែ១៧នាទីក្រោយមក កីឡាករ Ben Davies បានស៊ុតបញ្ចូលទី១គ្រាប់នៅនាទី៧០ មុននឹងខ្សែប្រយុទ្ធសញ្ជាតិអង់គ្លេស Harry Kane បន្ថែម១គ្រាប់ទៀត នៅនាទី៨១ ដែលជាគ្រាប់បាល់ជ័យជម្នះរបស់Spurs។
ក្រោយជ័យជម្នះនេះ spurs ត្រូវឡើងទៅជួបក្រុម Brentford ដែលមកក្របខណ្ឌChampionship លីគទី២នៅអង់គ្លេស ខណៈMan Utd ត្រូវជួប Man City ដែលជាម្ចាស់ជើងឯកចាស់ នៅវគ្គពាក់កណ្ដាលផ្ដាច់ព្រ័ត្រនៃពានរង្វាន់ League Cup នាម៉ោង១២៖០០ យប់រំលងអធ្រាតឈានចូលថ្ងៃទី៥ មករា ឆ្នាំ២០២១៕
© រក្សាសិទ្ធិដោយ thmeythmey.com