កីឡាអន្តរជាតិ
អន្តរជាតិ
ក្រោយទម្លាក់Everton ពីLeague Cup ខ្សែការពារ Maguire និយាយថា Man Utd ត្រូវតែលើកពានខ្លះ
× ខ្សែការពារតម្លៃខ្លួនខ្ពស់ Harry Maguire បាននិយាយថា Manchester United ត្រូវតែចាប់ផ្ដើមលើកពានមួយនៅរដូវកាលនេះ ក្រោយពីទម្លាក់ក្រុមEverton ពីពានរង្វាន់League Cup នៅថ្ងៃទី២៤ ធ្នូនេះ។
«ពួកយើងរំពឹងឈ្នះពាន»។ នេះជាការលើកឡើងរបស់ខ្សែការពារកណ្ដាល Maguire ដែលបានបន្ថែមថា វាពិតជាមានសារៈសំខាន់ក្នុងការប្រកួតធំៗទាំងនេះ ដែលកីឡាករទាំងអស់ត្រូវចាប់ផ្ដើមយកឈ្នះក្រុមខ្លាំងទាំងនោះ ដើម្បីលើកពានខ្លះ សម្រាប់ក្លិប Man Utd នៅរដូវកាលនេះ។
ប្រធានក្រុមMan Utd រូបនេះ ហាក់ដូចជាមានជំនឿចិត្តខ្លាំងថា Man Utd នឹងអាចលើកពានរង្វាន់បានយ៉ាងតិចមួយ ក្នុងចំណោមពានផ្សេងទៀត ដែល Man Utd នៅមានឱកាសឈរជើង។ «វាជាការបង្ហាញទម្រង់លេងមួយយ៉ាងល្អប្រសើរ ដែលយើងគួរតែសម្លឹងមើលថា យើងនៅមានឱកាស(លើកពាន) ដ៏អស្ចារ្យ ៣ទៅ៤ទៀត ។ ដូច្នេះយើងចាំបាច់ត្រូវតែថែរក្សាឱកាសទាំងនោះឲ្យបានល្អប្រសើរថែមទៀត»។ នេះបើតាមការចុះផ្សាយរបស់ BBC Sport ដែលបានស្រង់សម្តីខ្សែការពារតម្លៃខ្លួនខ្ពស់របស់ Man Utd។
ក្រុមរហស្សនាម បិសាចក្រហម Man Utd បានយកឈ្នះក្រុម Everton ដោយលទ្ធផល២ទល់០ នាទឹកដី Goodison Park នៃពានរង្វាន់ League Cup នាថ្ងៃទី២៤ ធ្នូនេះ ។ ២គ្រាប់របស់ Man Utd រកបានដោយខ្សែប្រយុទ្ធសញ្ជាតិអ៊ុយរ៉ាហ្គាយ Edinson Cavani ដោយការស៊ុតពីក្រៅប្រអប់គ្រោះថ្នាក់ នៅនាទី៨៨ ក្រោយពីការបញ្ជូនបាល់របស់ Anthony Martial ។ ឈានដល់នាទី៩០បូក៥ទៅហើយ ខ្សែប្រយុទ្ធសញ្ជាតិបារាំង Anthony Martial បានបន្ថែមមួយគ្រាប់ទៀត ក្រោយពីការបញ្ជូនបាល់របស់ Marcus Rashford ។
Man Utd ត្រូវជួប Man City ដែលជាម្ចាស់ជើងឯកចាស់ នៅវគ្គពាក់កណ្ដាលផ្ដាច់ព្រ័ត្រនៃពានរង្វាន់ League Cup នាម៉ោង១២៖០០ យប់រំលងអធ្រាតឈានចូលថ្ងៃទី៥ មករា ឆ្នាំ២០២១។ ក្រៅពីពានរង្វាន់ League Cup នេះ Man Utd នៅមានឱកាសប្រជែងពាន FA Cup, Europa League និងពានក្របខណ្ឌ Premier League ជាដើម។ បច្ចុប្បន្ននេះ មានឈរនៅលេខ៣ក្នុងពូលក្របខណ្ឌ Premier League ដោយមាន២៦ពិន្ទុ តាមពីក្រោយក្រុមលេខ២ និងលេខ១ តែ៥ពិន្ទុប៉ុណ្ណោះ សម្រាប់ការប្រកួត១៤សប្ដាហ៍កន្លងមក៕
Tag:
Man Utd
League Cup
បាល់ទាត់
© រក្សាសិទ្ធិដោយ thmeythmey.com