អគ្គនាយកអង្គការសុខភាពពិភពលោក(WHO) អះអាងនៅថ្ងៃទី៨ មករាថា ពិភពលោកមានបញ្ហាមួយ នោះគឺប្រទេសកំពុងអភិវឌ្ឍ និងអភិវឌ្ឍតិចតួច មិនទាន់ទទួលបានវ៉ាក់សាំងបង្ការជំងឺកូវីដ-១៩។ លោក ក៏ទទូចផងដែរឲ្យប្រទេសអភិវឌ្ឍឈប់ចុះកិច្ចព្រមព្រៀងទ្វេភាគីជាមួយក្រុមហ៊ុនផលិតវ៉ាក់សាំង ដើម្បីបានវ៉ាក់សាំងប្រើប្រាស់តែក្នុងប្រទេសខ្លួន។
ខណៈប្រទេសអភិវឌ្ឍ ដូចជាកាណាដា អាមេរិក សិង្ហបុរី និងបណ្តារប្រទេសសហភាពអឺរ៉ុបចាប់ផ្តើមផ្តល់វ៉ាក់សាំងដល់ពលរដ្ឋខ្លួន ពលរដ្ឋនៃប្រទេសកំពុងអភិវឌ្ឍដែលមានចំនួនរាប់ពាន់លាននាក់ ពុំទាន់ទទួលបានវ៉ាក់សាំងឡើយ។ វិសមភាពក្នុងការទទួលបានវ៉ាក់សាំង គឺជាបញ្ហាប្រឈមដ៏ធំបំផុតរបស់WHO ជាពិសេសនៅពេលដែលប្រទេសអភិវឌ្ឍកក់វ៉ាក់សាំងទុកជាមុន។
«ប្រទេសអ្នកមាន មាន(វ៉ាក់សាំង)ច្រើនជាងពាក់កណ្តាលនៃចំនួនផ្គត់ផ្គង់»។ នេះជាការលើកឡើងរបស់លោក Tedros Adhanom Ghebreyesus អគ្គនាយកWHO ដោយប្រើពាក្យធ្ងន់ៗរិះគន់គំនិតជាតិនិយមវ៉ាក់សាំង ដោយស្តុក និងកក់វ៉ាក់សាំងទុក មិនឲ្យប្រទេសដទៃទៀតអាចទិញបាន។ លោកអះអាងថា គ្មានប្រទេសណាពិសេសជាងប្រទេសណាឡើយ ហើយក៏មិនគួរកាត់មុខកាត់មាត់ដណ្តើមវ៉ាក់សាំងគ្នាដើម្បីចាក់ឲ្យពលរដ្ឋខ្លួន ខណៈប្រទសឯទៀតគ្មានវ៉ាក់សាំងសោះ។
ក្នុងន័យនេះ លោកអំពាវនាវឲ្យប្រទេស និងក្រុមហ៊ុនផលិតវ៉ាក់សាំងទាំងអស់ឈប់ចុះកិច្ចព្រមព្រៀងទ្វេភាគីក្នុងការទិញវ៉ាក់សាំង និងអំពាវនាវឲ្យបង្វែរចំនួនវ៉ាក់សាំងដែលលើសតម្រូវការ ចូលទៅយន្តការពហុភាគីCOVAX ដើម្បីចែកចាយ។ ប្រមុខWHO លើកជាសំណួរថា៖ «តើយើងនឹងបណ្តោយឲ្យប្រជាជនដែលទន់ខ្សោយ និងអ្នកដែលប្រឈមនឹងការឆ្លងខ្ពស់ ឈឺ និងស្លាប់ដោយវីរ៉ុសនេះ ឬយ៉ាងណា?» នេះយោងតាមទីភ្នាក់ងារព័ត៌មានAFP។
យន្តការCOVAX បង្កើតឡើងដោយWHO ដើម្បីជួយប្រទេសដែលពុំមានលទ្ធភាពក្នុងការទិញវ៉ាក់សាំង។ មកទល់ពេលនេះ យន្តការCOVAX ទទួលបានប្រាក់៦ពាន់លានដុល្លារ នៃទឹកប្រាក់ត្រូវការក្នុងឆ្នាំ២០២១ ចំនួន៧ពាន់លានដុល្លារ ដើម្បីជួយដល់ប្រទេសចំនួន៩២ដើម្បីទទួលបានវ៉ាក់សាំង។
ដូចគ្នានេះដែរ លោកMike Ryan ប្រធានផ្នែកកិច្ចការអាសន្នរបស់WHO សង្កត់ធ្ងន់ថាវ៉ាក់សាំងត្រូវផ្តល់ទៅក្រុមមនុស្សងាយរងគ្រោះ និងមន្ត្រីសុខាភិបាលជួរមុខជាមុនសិន បើទោះបីជាពួកគេរស់នៅទីណាក៏ដោយ។
កាលពីសប្តាហ៍កន្លងទៅ សហភាពអឺរ៉ុបសម្រេចបានកិច្ចព្រមព្រៀងជាមួយក្រុមហ៊ុនPfizer និងBioNTech ដើម្បីទទួលវ៉ាក់សាំង៣០០លានដូសបន្ថែមទៀត។ ការសម្រេចកិច្ចព្រមព្រៀងនេះ នាំឲ្យសហភាពអឺរ៉ុបដែលមានប្រទេសចំនួន២៧ នឹងទទួលបានវ៉ាក់សាំងចំនួនពាក់កណ្តាល នៃបរិមាណវ៉ាក់សាំងដែលក្រុមហ៊ុនទាំងពីរអាចនឹងផលិតបានក្នុងឆ្នាំ២០២១ទាំងមូល។
បន្ថែមពីនេះ ការលេចឡើងនូវជំងឺកូវីដ-១៩បម្លែងខ្លួន ក៏បណ្តាលឲ្យប្រទេសទាំងអស់ពន្លឿនការទិញវ៉ាក់សាំងផងដែរ ដើម្បីបង្ការកុំឲ្យមានចំនួនឆ្លងច្រើនជ្រុល ដល់កម្រិតមួយដែលមន្ទីរពេទ្យលែងអាចទទួលពិនិត្យព្យាបាលបាន។មកទល់ពេលនេះ អង់គ្លេស សហភាពអឺរ៉ុប អាមេរិក ស្វីស និងអ៊ីស្រាអែលជាប្រទេសដែលទិញវ៉ាក់សាំងច្រើនបំផុតពីក្រុមហ៊ុនPfizer និងBioNTech ក្រុមហ៊ុនModerna និងក្រុមហ៊ុនAstraZeneca៕