ជាតិ
សុខភាព
ជប៉ុនផ្តល់ជាង១៨ម៉ឺនដុល្លារសម្រាប់គម្រោងពង្រឹងការថែទាំសុខភាពសហគមន៍នៅកំពង់ចាម
× រដ្ឋាភិបាលជប៉ុន បានឯកភាពផ្តល់ថវិកាសរុបចំនួន ១៨២ ០៣៥ ដុល្លារអាមេរិក ដល់អង្គការមូលនិធិជប៉ុន (PHJ) ដើម្បីអនុវត្តគម្រោង «ពង្រឹងការថែទាំសុខភាពសហគមន៍ និងបណ្តាញគាំទ្រសម្រាប់កុមារក្នុងខេត្តកំពង់ចាម (ឆ្នាំទី២)»។ កិច្ចសន្យាផ្តល់ជំនួយ ត្រូវបានចុះហត្ថលេខា នៅថ្ងៃទី១៣ ខែមករា ដោយលោកឯកអគ្គរាជទូតជប៉ុន មិកាមិ ម៉ាសាហ៊ីរ៉ូ និងលោកស្រី កាណាកុ អ៊ីហ្ស៊ីយ៉ាម៉ា នាយិកាប្រចាំប្រទេសនៃអង្គការ PHJ។
គម្រោង «ពង្រឹងការថែទាំសុខភាពសហគមន៍ និងបណ្តាញគាំទ្រសម្រាប់កុមារក្នុងខេត្តកំពង់ចាម» នឹងចូលរួមកាត់បន្ថយអត្រាមរណភាពនៃកុមារអាយុក្រោម៥ឆ្នាំ និងលើកកម្ពស់សុខភាពកុមារ តាមរយៈការភ្ជាប់បណ្តាញរវាងបុគ្គលិកសុខាភិបាល និងអ្នកស្ម័គ្រចិត្តសុខភាពនៅក្នុងសហគមន៍។
តាមសេចក្តីប្រកាសព័ត៌មានរបស់ស្ថានទូតជប៉ុនប្រចាំកម្ពុជា គម្រោងនេះ ក៏រួមបញ្ចូលវគ្គបណ្តុះបណ្តាល ស្តីពីការលើកកម្ពស់អាហារូបត្ថម្ភទៅដល់ក្រុមទ្រទ្រង់សុខភាពភូមិ (VHSG) ផងដែរ។
ឱកាសនោះ ឯកអគ្គរាជទូតជប៉ុន លោក មិកាមិ ម៉ាសាហ៊ីរ៉ូ បានរំលឹកថា ជប៉ុនបានចាប់ផ្តើមហិរញ្ញប្បទានឥតសំណងសម្រាប់អង្គការក្រៅរដ្ឋាភិបាលជប៉ុនចាប់តាំងពីឆ្នាំ២០០២មក ដើម្បីជួយដល់គម្រោងអភិវឌ្ឍសេដ្ឋកិច្ច និងសង្គមក្នុងប្រទេស ឬតំបន់កំពុងអភិវឌ្ឍន៍។
លោកបានបន្ថែមថា រហូតមកដល់ពេលនេះ ស្ថានទូតជប៉ុន បានផ្តល់ជំនួយជាង១៣០គម្រោងនៅកម្ពុជា ដោយគម្រោងនីមួយៗ រួមចំណែកក្នុងការលើកកម្ពស់គុណភាពជីវភាពរបស់ប្រជាជនកម្ពុជា។
ចាប់ពីឆ្នាំ២០០៣មក អង្គការមូលនិធិជប៉ុន (People Hope Japan) ចូលរួមក្នុងការណែនាំបច្ចេកទេសដល់បុគ្គលិកមណ្ឌលសុខភាព ឆ្មបមូលដ្ឋាន ព្រមទាំងការអប់រំសម្រាប់សហគមន៍នីមួយៗ។ «ខ្ញុំសូមសម្តែងនូវការកោតសរសើរចំពោះការចូលរួមចំណែកដល់ការកសាងទំនាក់ទំនងនៃការជឿទុកចិត្តគ្នារវាងមណ្ឌលសុខភាព និងប្រជាជន និងការពារការស្លាប់របស់មាតា និងទារក»។ នេះជាការគូសបញ្ជាក់របស់លោកឯកអគ្គរាជទូត។
សម្រាប់គម្រោងជាង១៨ម៉ឺនដុល្លារនេះ លោក ម៉ាសាហ៊ីរ៉ូ វាយតម្លៃថា វានឹងបន្តពង្រឹងបណ្តាញបុគ្គលិកមណ្ឌលសុខភាព និងអ្នកស្ម័គ្រចិត្តសុខភាពមូលដ្ឋាន កាត់បន្ថយជំងឺដែលអាចការពារបាន និងការស្លាប់របស់កុមារអាយុក្រោម៥ឆ្នាំ រួមទាំងលើកកម្ពស់ការលូតលាស់កុមារឲ្យសុខភាពល្អ៕
© រក្សាសិទ្ធិដោយ thmeythmey.com