តុលាការភ្នំពេញ បន្តជំនុំជម្រះលើក្រុមអ្នកប្រឆាំងជាង៥០នាក់ តែមិនទាន់សម្រេចអ្វីឡើយ

ច្បាប់ / សិទិ្ធមនុស្ស / តុលាការ

ជាតិ

តុលាការភ្នំពេញ បន្តជំនុំជម្រះលើក្រុមអ្នកប្រឆាំងជាង៥០នាក់ តែមិនទាន់សម្រេចអ្វីឡើយ

14, Jan 2021 , 6:29 pm

រូបភាព

មន្រ្តីពន្ធនាគារ ដឹកអ្នកជាប់ឃុំ ទៅតុលាការភ្នំពេញ នៅព្រឹកថ្ងៃទី១៤ ខែមករា ឆ្នាំ២០២១ ដោយក្នុងនោះ មានសមាជិកអតីតគណបក្សប្រឆាំង២នាក់ គឺលោក កាក់ កុម្ភា និង លោក ហេង ច័ន្ទសុទ្ធី។ រូបពី AFP

ដោយ: សារព័ត៌មានថ្មីៗ

នៅព្រឹកថ្ងៃទី១៤ ខែមករា ឆ្នាំ២០២១ តុលាការភ្នំពេញ បានបន្តបើកសវនាការលើក្រុមអ្នកប្រឆាំងជាង៥០នាក់ ពីបទរួមគំនិតក្បត់ [ជាតិ] និង បទញុះញង់បង្កឲ្យមានភាពវឹកវរដល់សន្តិសុខសង្គម។ ប៉ុន្តែ លោក សំ សុគង់ មេធាវីរបស់ពួកគេ ប្រាប់សារព័ត៌មានថ្មីៗថា ក្នុងចំណោមជាង៥០នាក់នោះ មានតែ១១នាក់ប៉ុណ្ណោះ ដែលបានចូលរួមសវនាការ។

លោកមេធាវី សំ សុគង់ លើកឡើងថា ក្នុងចំណោមកូនក្តី១១នាក់របស់លោក ដែលទៅចូលរួមសវនាការ មាន៩នាក់ រស់នៅក្រៅឃុំ និង២នាក់ គឺលោក កាក់ កុម្ភា និង លោក ហេង ច័ន្ទសុទ្ធី កំពុងជាប់។ អ្នកទាំង២ ត្រូវបានមន្ត្រីពន្ធនាគារ ដឹកទៅកាន់តុលាការភ្នំពេញ ដើម្បីចូលរួមសវនាការ។

លោកមេធាវី អះអាងថា អ្នកខ្លះ មិនបានចូលរួមសវនាការ គឺដោយសារតែកំពុងស្ថិតនៅឯក្រៅប្រទេស ហើយអ្នកផ្សេងទៀត ដែលកំពុងនៅស្រុក បានទៅចូលរួមសវនាការដែរ តែត្រូវសមត្ថកិច្ចហាមឃាត់ ដោយសារតែពួកគេ មិនមានឯកសារគ្រប់គ្រាន់។ លោក បន្តថា ក្នុងសវនាការ លោក បានស្នើឲ្យតុលាការ ចេញដីកាកោះហៅ ទៅកូនក្តីរបស់លោកឲ្យបានគ្រប់គ្នា ដើម្បីពួកគេ មានឯកសារផ្លូវច្បាប់ បង្ហាញសមត្ថកិច្ច ពេលទៅចូលរួមសវនាការលើកក្រោយ ជៀសវាងការហាមឃាត់ពីសំណាក់សមត្ថកិច្ចម្តងទៀត។ លោក មានប្រសាសន៍ថា៖«ខ្ញុំ ចង់ពួកគាត់ បានចូលរួមសវនាការទាំងអស់គ្នា»។

ក្នុងចំណោមពួកគេ មានអ្នកខ្លះ មិនមានឯកសារឬដីកាជាប់ខ្លួន គឺដោយសារកន្លងមក តុលាការ មិនបានចេញដីកា ជូនទៅពួកគេម្នាក់ៗឡើយ ដោយចេញដីកាអម ដែលមានឈ្មោះពួកគេ នៅរួមគ្នាតែម្តង ដើម្បីជូនដំណឹងដលពួគេ ពីការបើកសវនាការ។ ដីកាអម ត្រូវសមត្ថកិច្ច យកទៅបិទនៅទីស្នាក់ការកណ្តាលរបស់អតីតគណបក្សប្រឆាំង ស្ថិតនៅសង្កាត់ចាក់អង្រែលើ ខណមានជ័យ។

លោកមេធាវី បន្ថែមថា ក្នុងសវនាការពេញមួយព្រឹកនេះ ចៅក្រម បានសួរកូនក្តីរបស់លោកតែ២នាក់ប៉ុណ្ណោះ ខណៈ៩នាក់ មិនបានសួរឡើយ។ បើតាមលោកមេធាវី ក្រោយចប់សវនាការ ចៅក្រម មិនបានសម្រេចអ្វីឡើយ ដោយគ្រាន់តែប្រកាសថា សវនាការនេះ នឹងត្រូវបន្ត នៅថ្ងៃទី២៨ ខែមករា ឆ្នាំ២០២១។

លោក សម រង្ស៊ី មេដឹកនាំកំពូលរបស់ក្រុមប្រឆាំង និងថ្នាក់ដឹកនាំជាន់ខ្ពស់របស់លោក៦នាក់ទៀត រួមមាន អ្នកស្រី មូរ សុខហួរ លោក អេង ឆៃអ៊ាង លោក នុត រំដួល លោក ហូរ វ៉ាន់ លោក អ៊ុំ សំអាន និង លោក ឡុង រី ក៏ជាជនជាប់ចោទ ក្នុងចំណោមមនុស្សជាង៥០នាក់នោះដែរ ដែលត្រូវចោទពីបទរួមគំនិតក្បត់ [ជាតិ] និងបទញុះញង់បង្កឲ្យមានភាពវឹកវរដល់សន្តិសុខសង្គម។ ពួកគាត់ទាំង៧នាក់ សុទ្ធតែស្ថិតនៅក្រៅប្រទេស។

តាមពិត សំណុំរឿងខាងលើ មិនមែនមានមនុស្សតែជាង៥០នាក់ទេ គឺមានដល់ទៅជាង១០០នាក់ ដែលភាគច្រើន ជាសមាជិកនិងជាអ្នកគាំទ្រអតីតគណបក្សប្រឆាំង។ កាលពីថ្ងៃទី២៦ ខែវិច្ឆិកា ឆ្នាំ២០២០ តុលាការភ្នំពេញ បានបើកសវនាការលើកទី១ លើមនុស្សជាង១០០នាក់នោះ ប៉ុន្តែ មានតែជាង៣០នាក់ប៉ុណ្ណោះ ដែលបានចូលរួមសវនាការ ដោយជិត១០០នាក់ទៀត អវត្តមាន ដ្បិតភាគច្រើន គឺពួកគេ នៅក្រៅប្រទេស។

សវនាការនាកាលនោះ តុលាការ ក៏មិនបានសម្រេចសេចក្តីអ្វីដែរ ដោយគ្រាន់តែច្របាច់សំណុំរឿងចូលគ្នាជា២សំណុំរឿង។ តុលាការ កំណត់ថា សំណុំរឿងទី១ មានមនុស្សជាង៥០នាក់ ត្រូវបន្តសនាការ នៅថ្ងៃទី១៤ ខែមករា ឆ្នាំ២០២១ និងសំណុំរឿងទី២ មានមនុស្សជាង៧០នាក់ នឹងត្រូវបន្តនៅថ្ងៃទី៤ ខែមីនា ឆ្នាំ២០២១។ នៅព្រឹកថ្ងៃទី១៤ ខែមករា ឆ្នាំ២០២១នេះ តុលាការភ្នំពេញ បានបើកសវនការលើមនុស្សជាង៥០នាក់ តាមការគ្រោងទុកមែន។

មនុស្សជាង១០០នាក់ខាងលើ ត្រូវចោទពីបទរួមគំនិតក្បត់ [ជាតិ] និងបទញុះញង់ ដោយសារតែពួកគេ បង្ហាញការគាំទ្រគម្រោងធ្វើមាតុភូមិនិវត្តរបស់លោក សម រង្ស៊ី កាលពីថ្ងៃទី៩ ខែវិច្ឆិកា ឆ្នាំ២០១៩ ប៉ុន្តែលោក សម រង្ស៊ី ពុំបានធ្វើមាតុភូមិនិវត្តតាមការគ្រោងទុកឡើយ។ រដ្ឋាភិបាល ចាត់ទុក គម្រោងធ្វើមាតុនិវត្តរបស់លោក សម រង្ស៊ី នាកាលនោះ ថាដើម្បីធ្វើរដ្ឋប្រហារ៕