អន្តរជាតិ
ការសិក្សា៖ កាហ្វេ អាចជួយកាត់បន្ថយហានិភ័យនៃជំងឺថ្លើម
× ជាធម្មតា មនុស្សគ្នាប្រាកដជាដឹងថា ការទទួលទានកាហ្វេ អាចរំខានដំណេក និងបង្កផលប៉ះពាល់ដល់សុខភាពមួយចំនួន។ ប៉ុន្តែវាមិនមែនបែបនោះទាំងស្រុងទេ គ្រប់យ៉ាងតែងមានគុណសម្បត្តិ និងគុណវិបត្តិរបស់វា។ ការទទួលទានកាហ្វេ ក៏មានអត្ថប្រយោជន៍ដែរ។ វាអាចជួយសុខភាពអ្នកទទួលទាន បានយ៉ាងច្រើន ជាពិសេសអាចកើតបន្ថយការវិវឌ្ឍនៃជំងឺថ្លើម ប្រសិនបើអ្នកទទួលទាន ក្នុងបរិមាណត្រឹមត្រូវ។
ការសិក្សាថ្មីមួយ ដែលចេញផ្សាយនៅថ្ងៃទី២១ ខែមិថុនា លើទិនានុប្បវត្តិសុខភាពសាធារណៈ BMC បានបង្ហាញថា ការទទួលទានកាហ្វេពី៣ពែង ទៅ៤ពែង ដែលស្មើនឹង៣០០ទៅ៤០០មីលីក្រាមក្នុងមួយថ្ងៃ អាចជួយកាត់បន្ថយហានិភ័យនៃការកើត និងស្លាប់ដោយសារជំងឺថ្លើមរ៉ាំរ៉ៃ។
អំណះអំណាងខាងលើ គឺផ្អែកលើការសិក្សាមួយដែលមានអ្នកចូលរួមជិត៥០ម៉ឺននាក់។ ជាលទ្ធផល ក្រុមអ្នកជំនាញ បានរកឃើញថា អ្នកទទួលទានកាហ្វេ អាចកាត់បន្ថយអត្រាវិវដ្តទៅរកជំងឺថ្លើមរ៉ាំរ៉ៃបានប្រមាណ២១ភាគរយ និងជំងឺខ្លាញ់រុំថ្លើមបានចំនួន២០ភាគរយ។ លើសពីនេះ អ្នកបរិភោគកាហ្វេ អាចកាត់បន្ថយហានិភ័យនៃការស្លាប់ដោយជំងឺថ្លើមរ៉ាំរ៉ៃបានដល់៤៩ភាគរយ បើធៀបនឹងអ្នកមិនទទួលទានកាហ្វេសោះ។
នេះមិនមែនជាការសិក្សាដំបូង ដែលបង្ហាញពីគុណសម្បត្តិរបស់កាហ្វេឡើយ។ វាមានការសិក្សាជាច្រើនទៀត ដែលធ្លាប់បានធ្វើឡើងកន្លងមក និងបង្ហាញថាការទទួលទានកាហ្វេបានរួមចំណែកជួយកាត់បន្ថយហានិភ័យជំងឺខ្សោយបេះដូងដែរ។ ទន្ទឹមនឹងនេះ កាហ្វេក៏អាចជួយកាត់បន្ថយលទ្ធភាពនៃការកើតជំងឺផ្សេងទៀតដូចជា ទឹកនោមផ្អែមប្រភេទ២ មហារីកក្រពេញប្រូស្តាត ជំងឺវង្វេង និងជំងឺមហារីកស្បែកជាដើម។ នេះបើតាមការចុះផ្សាយរបស់ទំព័រសុខភាពទូរទស្សន៍ CNN ។
មិនត្រឹមតែអាចជួយកាត់បន្ថយហានិភ័យនៃជំងឺជាច្រើននោះទេ កាហ្វេក៏អាចជួយការពារការកើនឡើងអត្រាការស្លាប់ដោយជំងឺមហារីក ឬស្លាប់ដោយស្ទះសរសៃឈាមបេះដូងឡើយ បើទោះជា អ្នកទទួលទានកាហ្វេដល់ទៅ ៦ពែងក្នុងមួយថ្ងៃក៏ដោយ។ នេះបើតាមការលើកឡើង របស់លោកវេជ្ជបណ្ឌិត Rob van Dam នៃសាលាសុខភាពសាធារណៈរបស់សកលវិទ្យាល័យ Harvard។
តែទោះយ៉ាងណា កាហ្វេផ្តល់អត្ថប្រយោជន៍ដល់សុខភាពមនុស្សលុះត្រាតែទទួលទានក្នុងបរិមាណមួយត្រឹមត្រូវ។ មនុស្សម្នាក់ៗ មានបញ្ហាសុខភាពខុសៗគ្នា។ ជាការល្អ អ្នកជំងឺដែលមានមានបញ្ហាដំណេក និងមានបញ្ហាទឹកនោមផ្អែម គួរតែពិគ្រោះជាមួយគ្រូពេទ្យជំនាញ ដើម្បីដឹងពីសុខភាពផ្ទាល់ខ្លួនមុនទទួលទានកាហ្វេ។
សូមបញ្ជាក់ថា កាហ្វេមិនអាចផលល្អដល់សុខភាពសម្រាប់មនុស្សទាំងអស់នោះទេ។ ចំពោះស្ត្រីមានផ្ទៃពោះ ការទទួលទានកាហ្វេច្រើនហួសកម្រិត នឹងងអាចបណ្តាលឱ្យកូនកើតមិនគ្រប់គីឡូ ឬកើតមិនគ្រប់ខែ និងអាចស្លាប់ក្នុងផ្ទៃជាដើម។ ចំណែកកុមារ ក៏មិនត្រូវបានណែនាំឱ្យទទួលទានកាហ្វេ ឬភេសជ្ជៈប៉ូវកម្លាំងមានសារជាតិកាហ្វេអ៊ីនដែរ៕
© រក្សាសិទ្ធិដោយ thmeythmey.com