លោក សេង សាលីប្រធានមន្ទីរទេសចរណ៍ខេត្តកំពង់ឆ្នាំង បានបញ្ជាក់ប្រាប់សារព័ត៌មានThmeyThmey25 តាមទូរស័ព្ទដូច្នេះថា  អាជ្ញាធរ និងមន្ទីរទេសចរណ៍កំពុងចងក្រងប្រជាពលរដ្ឋក្នុងភូមិគិរីអភិវឌ្ឍន៍នេះ ឱ្យក្លាយជាសហគម៍ទេសចរណ៍មួយ។ការបង្កើតសហគមន៍គឺត្រូវផ្ដើមពីការផ្ដល់វគ្គបណ្ដុះបណ្ដាល ផ្នែកបដិសណ្ឋារកិច្ចដល់ប្រជាពលរដ្ឋក្នុងតំបន់។ 
 

លោក សេង សាលី បន្ថែម៖«ភូមិគិរីអភិវឌ្ឍន៍មានសក្ដានុពលធម្មជាតិស្រសបំព្រង ហើយថែមទាំងមានថ្មផុស ហើយបើភ្ញៀវឡើងលើភ្នំ អាចមើលឃើញបឹងអន្លង់ជ្រៃដែលនៅខេត្តកំពង់ស្ពឺ។ដូច្នេះហើយបានយើង មានគម្រោងបង្កើតភូមិនេះ ជាភូមិទេសចរណ៍។យើងនឹងផ្ដល់វគ្គបណ្ដុះបណ្ដាលប្រជាជនក្នុងភូមិ ឱ្យចេះទទួលភ្ញៀវជាមុនសិន ហើយយើងនឹងចងក្រងជាសហគមន៍»។ 
 

នៅជើងភ្នំថ្មផុសនេះ មានប្រជាជនលក់ម្ហូបអាហារនិងមានទីតាំងសម្រាប់អង្គុយលេងប្រមាណ ២០-២៤ តូបដែរ។ រាល់ចុងសប្តាហ៍ ទេសចរជាតិជាពិសេសប្រជាជនក្នុងខេត្តកំពង់ឆ្នាំង ក៏តែងទៅកម្សាន្តនៅតំបន់នេះជារឿយៗដែរ។សម្រាប់ទេសចរ ដែលចង់ទៅបោះតង់សម្រាកក្នុងតំបន់គិរីអភិវឌ្ឍន៍ត្រូវសុំអនុញ្ញាតពីអាជ្ញាធរ និងប្រជាជននៅទីនោះជាមុនសិនព្រោះដីក្នុងភូមិនេះជារបស់ឯកជន។ នេះបើតាមប្រធានមន្ទីរទេសចរណ៍ខេត្តកំពង់ឆ្នាំង។
 

ដ្បិតជាតំបន់សម្បូរដោយ ភ្នំនិងថ្មប៉ុន្តែផ្លូវទៅភូមិគិរីអភិវឌ្ឍន៍ គឺមិនលំបាកធ្វើដំណើរនោះទេដោយផ្លូវចូលមានក្រាលកៅស៊ូ និងតំបន់ខ្លះជាផ្លូវក្រួសក្រហម ។ សូមជម្រាបដែរថាភូមិគិរីអភិវឌ្ឍន៍ ស្ថិតក្នុងឃុំឈានឡើង ស្រុកសាមគ្គីមានជ័យត្រូវបានបង្កើតឡើងចុងក្រោយគេបង្អស់នៅខេត្តកំពង់ឆ្នាំង ក្នុងឆ្នាំ២០១៥។ភូមិនេះបច្ចុប្បន្នមានប្រជាជនរស់នៅជាង ២០០គ្រួសារ៕

 

 រូបភាពពី លោក សេង សាលី ប្រធានមន្ទីរទេសចរណ៍ខេត្តកំពង់ឆ្នាំង