ក្រសួងធនធានទឹក និងឧតុនិយម បានជូនដំណឹងកាលពីថ្ងៃទី២ ខែកុម្ផៈ ថា ចាប់ពីខែកុម្ភៈ ដល់ ខែឧសភា ឆ្នាំ២០២២ កម្ពុជា នឹងរងឥទ្ធិពលបាតុភូតឡានីណា La Nina ប្រមាណ៨៥ភាគរយ។ បន្ទាប់ពីនោះឥទ្ធិពលនេះ នឹងថយចុះសន្សឹមៗឆ្ពោះទៅបាតុភូត Neutral ដែលជាបាតុភូតក្ដៅប្រមាណ១ ០ភាគរយ  និងឡានីណា La Nina ជាបាតុភូតត្រជាក់ ប្រមាន៧០ភាគរយ។

 

បើតាមការព្យាករ សម្រាប់រដូវប្រាំង នៅតំបន់ទំនាបកណ្ដាល សីតុណ្ហភាពអប្បបរមា អាចស្ថិតនៅចន្លោះ ២១-២៤អង្សា។ នៅតំបន់ខ្ពង់រាប និងតំបន់ជួរភ្នំ សីតុណ្ហភាពអប្បរមា អាចស្ថិតនៅចន្លោះ ១៨-២១ អង្សា។ ជាមួយគ្នានេះ នៅតំបន់មាត់សមុទ្រ សីតុណ្ហភាពអប្បបរមាអាចនៅចន្លោះ ២០-២៣អង្សា។

 

ទន្ទឹមនេះ  ចាប់ពីខែមេសា ដល់ខែឧសភា អាកាសធាតុ នឹងកើនកម្ដៅជាបន្ដបន្ទាប់។ ចំពោះបណ្ដាលខេត្តនៅតំបន់ទំនាបកណ្ដាល សីតុណ្ហភាពមធ្យមអតិបរមា អាចនឹងកើនឡើងចន្លោះ៣៥-៣៨អង្សា។ ជាមួយគ្នានេះ នៅតំបន់ខ្ពងរាប និងតំបន់ជួរភ្នំ សីតុណ្ហភាពមធ្យមអតិបរមា អាចនឹងកើនឡើងចន្លោះ ៣៤ ដល់៣៧អង្សា។

 

ដោយឡែក សម្រាប់តំបន់មាត់សមុទ្រ សីតុណ្ហភាពមធ្យមអតិបរមា អាចនឹងកើនឡើងចន្លោះពី៣២-៣៥ អង្សា។  នៅខែមេសា និងខែឧសភា  សម្រាប់កម្រិតសីតុណ្ហភាពអតិបរមាអាចនឹងកើនឡើងខ្ពស់បំផុតក្នុងរង្វង់ពី ៣៧-៣៩អង្សា។

 

តាមការព្យាករខាងលើ បរិមាណទឹកភ្លៀងនៅក្នុងឆ្នាំ២០២២ អាចនឹងមានកម្រិតខ្ពស់ជាងឆ្នាំ២០២១។ ចាប់ពីខែកុម្ភៈ រហូរដល់ដើមខែឧសភា នឹងអាចមានភ្លៀងកក់ខែពីមធ្យមទៅច្រើន។ ទន្ទឹមនោះក៏មានការកើតឡើងនូវបាតុភូតផ្គរ រន្ទះ  និងខ្យល់កន្ទ្រាក់ច្រើន។

 

បើទោះបីជានៅរដូវប្រាំង និងដើមរដូវវស្សា អាចនឹងមានភ្លៀងកក់ខែច្រើន តែបរិមាទឹកភ្លៀងដែលធ្លាក់មក មិនទាន់ល្មមក្នុងការប្រើប្រាស់ ឆ្លើយតបតាមតម្រូវការភ្លាមៗនោះទេ។ ក្រសួងធនធានទឹក និងឧតុនិយម បានសំណូមពរឱ្យពលរដ្ឋសូមបន្ដរក្សា និងប្រើប្រាស់ទឹកដោយសន្សំសំច័យ ជាពិសេសបណ្ដាតំបន់ជនបទដាច់ស្រយាល ដែលនៅឆ្ងាយពីប្រភពទឹក៕