ជាតិ
ប្រជាជនភូមិបង្កោងក្នុងតំបន់អង្គរ បន្តប្រពៃណីចាប់ត្រីរួមគ្នាសម្រាប់យកធ្វើបុណ្យភូមិ ![រូបភាព៖ អាជ្ញាធរជាតិអប្សរា](https://image.thmeythmey.com/pictures/2022/02/22/ab__1_.jpg)
រូបភាព៖ អាជ្ញាធរជាតិអប្សរា
×![]()
រៀងរាល់ខែមាឃ ឬខែកុម្ភៈក្នុងឆ្នាំនីមួយៗ ប្រជាជននៅតំបន់អង្គរ ក្នុងភូមិបង្កោងនាំគ្នាចាប់ត្រី ដើម្បីជាការជួបជុំគ្នា និងយកត្រីទាំងនោះសម្រាប់ធ្វើម្ហូបបុណ្យភូមិ ក្រោយរដូវច្រូតកាត់រួច។
ប្រជាជនស្ទើរតែមួយភូមិ នាំគ្នាយកសម្ភារៈដូចជា សំណាញ់ ឈ្នាង អង្រុត ពីផ្ទះរៀងៗខ្លួនដើម្បីទៅចាប់ត្រីជុំគ្នា នៅបឹងបុរាណមួយខាងជើងភូមិ ដែលមានទំហំជាង១ហិកតា។ ប្រជាជនក្នុងភូមិបង្កោង ឃុំអំពិល ស្រុកប្រាសាទបាគង ខេត្តសៀមរាប តែងតែធ្វើបែបនេះរៀងរាល់ឆ្នាំ ដោយកំណត់ពេលវាលាក្នុងខែមាឃ។ នាពេលទឹកស្រក ប្រជាជន នឹងធ្វើពិធីចាប់ត្រីនៅដើមខែ តែបើសិនទឹកមិនទាន់ស្រកប្រជាជននឹងចាប់ត្រីនៅចុងខែ។ ពួកគេកម្រធ្វើពិធីនេះហួសខែមាឃណាស់។
![](https://image.thmeythmey.com/pictures/2022/02/22/thumb2/ab__2_.jpg)
លោក ពេជ្រ ឃិន ប្រធានភូមិ បង្កោង ។ រូបភាព៖ អាជ្ញាធរជាតិអប្សរា
លោក ពេជ្រ ឃិន មេភូមិបង្កោង បានប្រាប់សារព័ត៌មានThmeyThmey25 ថាទម្លាប់នៃការធ្វើបុណ្យភូមិ ឬបុណ្យឡើងអ្នកតា គឺមានយូរណាស់មកហើយ ។ តែពិធីចាប់ត្រីជុំគ្នារបស់អ្នកភូមិទើបតែមានជាង១០ឆ្នាំនេះប៉ុណ្ណោះ។ « ឆ្នាំនេះត្រីសម្បូរតែទឹកមិនទាន់ស្រកខ្លាំង។ អ៊ីចឹងអ្នកភូមិ ចាប់ត្រីមិនបានច្រើនទេ។ តែពួកគាត់មិនខ្វល់ថាបានមិនបានទេ។ គាត់មកនេះដើម្បីជួបជុំគ្នាសប្បាយ។ អ្នកខ្លះគាត់សុខចិត្តមកពីណាណីឱ្យទាន់ពេលចាប់ត្រីជុំគ្នា »។ នេះជាការបញ្ជាក់បន្ថែមរបស់លោក ពេជ្រ ឃិន។
![](https://image.thmeythmey.com/pictures/2022/02/22/thumb2/ab__3_.jpg)
រូបភាពពីអាជ្ញាធរជាតិអប្សរា
សម្រាប់ពិធីចាប់ត្រីជុំគ្នានៅថ្ងៃដែលគណៈកម្មាការភូមិ បង្កោងបានកំណត់ គឺអនុញ្ញាតឱ្យតែអ្នកភូមិបង្កោងប៉ុណ្ណោះចូលចាំត្រី ដោយកាលពីឆ្នាំកន្លងៗទៅប្រជាជនអាចចាប់ត្រីរួមគ្នាបានប្រមាណ ១០០គីឡូក្រាម។ ចំណែកអ្នកនៅភូមិផ្សេងអាចមកចាប់ត្រីនៅបឹងបុរាណនេះនៅថ្ងៃបន្តបន្ទាប់ទៀត។ នេះបើតាមទំព័រហ្វេសប៊ុកអាជ្ញាធរជាតិអប្សរា៕
© រក្សាសិទ្ធិដោយ thmeythmey.com