កម្ពុជា មានអ្នកជំងឺម្នាក់ទៀតបានស្លាប់ ដោយសារកូវីដ-១៩។ ការស្លាប់នេះ បានធ្វើឱ្យចំនួនអ្នកស្លាប់នៅកម្ពុជាកើន ដល់ ៣០២៣នាក់ បន្ទាប់ពីមានអ្នកស្លាប់ជាបន្តបន្ទាប់ នារយៈពេល៤ថ្ងៃចុងក្រោយ។ នេះបើយោងតាមការប្រកាសរបស់ក្រសួងសុខាភិបាលនៅថ្ងៃទី២៣កុម្ភៈ ដោយបានបញ្ជាក់ថា កម្ពុជាក៏បន្តរកឃើញអ្នកឆ្លង«អូមីក្រុង» ៥៥៨នាក់ទៀត តាមរយៈម៉ាស៊ីនតេស្ត PCR។
ក្នុងចំណោមអ្នកជំងឺថ្មី ចំនួន៥៥៨នាក់ ដែលក្រសួងសុខាភិបាលប្រកាសនេះ គឺមាន៥៥៤នាក់ ជាករណីឆ្លងក្នុងសហគមន៍ និង៤នាក់ទៀត ជាករណីនាំចូល។
មកទល់ពេលនេះ ចំនួនអ្នកឆ្លងកូវីដ-១៩ នៅកម្ពុជាកើនដល់ ១២៨ ១៣៣នាក់ ដោយក្នុងនោះ ករណីអូមីក្រុងក្នុងសហគមន៍ មាន៦៩៣២នាក់។ ដោយឡែក អ្នកសះស្បើយពីជំងឺនេះ ក៏ដល់ ១២១ ៥៥៣នាក់ ផងដែរ៕