យោងតាមធម្មនុញ្ញរបស់គណៈកម្មាធិការអូឡាំពិកអាស៊ី (OCA ) អូឡាំពិកអន្ដរជាតិ (IOC) ក៏ដូចជាលក្ខន្ដិកៈរបស់ NOCC គ្រោងនឹងរៀបចំមហាសន្និបាតបញ្ចប់អាណត្តិ៤ឆ្នាំម្ដង ដើម្បីរៀបចំនូវសមាជិកគណៈកម្មាធិការប្រតិបត្តិអាណត្តិថ្មី។ អ្វីដែលសំខាន់គឺពិនិត្យទៅលើនិរន្តរភាពការងាររបស់គណៈកម្មាធិការជាតិអូឡាំពិកកម្ពុជា ត្រៀមសម្រាប់អាណត្តិថ្មី។

 

លោក វ៉ាត់ ចំរើន អគ្គលេខាធិការNOCC លើកឡើងថា៖«យើងបានធ្វើការទំនាក់ទំនងជាមួយប្រព័ន្ធច្បាប់។ គេហៅថា ក្រុមច្បាប់របស់ IOC និង OCA ដោយយើងសុំការណែនាំថា ចំពេលយើងធ្វើម្ចាស់ផ្ទះស៊ីហ្គេម-អាស៊ានប៉ារ៉ាហ្គេម តែដល់ពេលយើងបញ្ចប់អាណត្តិនេះ តើយើងត្រូវធ្វើម៉េច? អ៊ីចឹងតាមការណែនាំ គឺយើងត្រូវតែធ្វើមហាសន្និបាត និងបោះឆ្នោតធម្មតា តែការបោះឆ្នោតជាសេចក្ដីទុកចិត្ត។ ដូច្នេះយើងនឹងរៀបចំឲ្យមានការបោះឆ្នោតជាសេចក្ដីទុកចិត្តនេះ ទៅតាមការណែនាំ ដោយគោរពតាមធម្មនុញ្ញដដែល»។ 

 

ជាមួយគ្នានោះដែរលោក ថោង ខុន ប្រធានគណៈកម្មាធិការជាតិអូឡាំពិកកម្ពុជាបានជំរុញក្នុងការរៀបចំមហាសន្និបាតអាណត្តិថ្មីឱ្យបានចប់សព្វគ្រប់នាចុងខែតុលា ខាងមុខ ដើម្បីបំពេញកាតព្វកិច្ចក្នុងនាមជាសមាជិក OCA ដើម្បីឱ្យអាណត្តិទី៨ បានដើរតួជាស្នូលក្នុងការជំរុញការរៀបចំព្រឹត្តិការកីឡាអន្តរជាតិជាប្រវត្តិសាស្រ្តនាឆ្នាំ២០២៣ ទទួលបានជោគជ័យ៕