«ចំពោះបាល់ទាត់ទូទៅ តែងតែមានការរិះគន់។ ចំពោះខ្ញុំវាជាសញ្ញាមួយដ៏ល្អដែលពួកគាត់ចាប់ផ្តើមមានប្រតិកម្ម មានន័យថាពួកគាត់មិនត្រឹមតែគាំទ្រនោះទេតែចាប់ផ្តើមស្រលាញ់ និងចាប់អារម្មណ៍នឹងវិស័យកីឡាបាល់ទាត់ជាពិសេសចង់បានលទ្ធផលឈ្នះផងដែរ»។ លោក អ៊ុក សុធី ប្រាប់សារព័ត៌មានថ្មីៗយ៉ាងដូច្នេះ។

 

ការលើកឡើងរបស់គ្រូជំនួយក្រុមបាល់ទាត់ជម្រើសជាតិកម្ពុជារូបនេះ ធ្វើឡើងបន្ទាប់ពីមានមតិមហាជនអ្នកស្នេហាវិស័យកីឡាបាល់ទាត់កម្ពុជា បញ្ចេញមតិរិះគន់ចំពោះការដឹកនាំក្រុម និងការលេងរបស់កីឡាករនៅលើទីលានក្រោយក្រុមជម្រើសជាតិកម្ពុជា ទាំងឈុតអាយុក្រោម ២៣ឆ្នាំ ចាញ់ជប៉ុន U23 ជប៉ុន ៣-១ និងឈុតធំចាញ់ បង់ក្លាដែស ១-០។ ទោះយ៉ាងណាលោក សុធី សម្តែងអារម្មណ៍អរគុណចំពោះអ្នកគាំទ្រ និងមហាជនដែលចាប់អារម្មណ៍ចំពោះបាល់ទាត់ ខណៈការរិះគន់តែងតែកើតមានពេលក្រុមបរាជ័យ។

 

គ្រូជំនួយជម្រើសជាតិកម្ពុជារូបនេះបន្ថែមទៀតថា៖«បាល់ទាត់ត្រូវការអ្នកគាំទ្រ។ បើសិនជាអ្នកគាំទ្រមិនសប្បាយចិត្តគាត់រិះគន់ ពិតណាស់វាអាចជះលទ្ធផលមួយចំនួនដល់ការដឹកនាំដែរ។ សម្រាប់ខ្ញុំ ដូចខ្ញុំបាននិយាយអ៊ីចឹង វាជាសញ្ញាវិជ្ជមានសម្រាប់បាល់ទាត់កម្ពុជា ដែលអ្នកគាំទ្រចាប់ផ្តើមមានប្រតិកម្ម ហើយក្រុមការងារនឹងប្រឹងប្រែងឱ្យខ្លាំងបន្ថែមទៀត»។

 

សូមរំឭកថា សម្រាប់ជំនួបមិត្តភាពអន្តរជាតិរបស់ក្រុមកម្ពុជា ឈុតអាយុក្រោម ២៣ឆ្នាំ ចាញ់ជប៉ុន ៣-១ នាពហុកីឡដ្ឋានមរតកតេជោធ្វើឡើងកាលពីថ្ងៃទី២០ ខែកញ្ញា និងពហុកីឡដ្ឋានដដែល ជម្រើសជាតិឈុតធំកម្ពុជា ចាញ់បង់ក្លាដែស ១-០ កាលពីថ្ងៃទី២២ ខែកញ្ញា ក្នុងជំនួបមិត្តភាពអន្តរជាតិ MinebeaMitsumi៕