ភ្ញៀវដើរកម្សាន្តទូទាំងប្រទេសជាង ៨០ម៉ឺននាក់នេះ មិនទាន់រាប់បញ្ចូលភ្ញៀវទេសចរសម្រាប់ថ្ងៃឈប់សម្រាកព្រះរាជ្យពិធីបុណ្យអុំទូក បណ្តែតប្រទីប និងសំពះព្រះខែអកអំបុកនោះទេ។ 
 

យោងតាមទិន្នន័យភ្ញៀវទេសចរ របស់ក្រសួងទេសចរណ៍ គោលដៅទេសចរណ៍សំខាន់ៗ ដែលមានភ្ញៀវទៅកម្សាន្តច្រើនជាងគេរួមមាន ខេត្តកំពតមានទេសចរចំនួន ២០៧ ២៤៥នាក់, ខេត្តព្រះសីហនុមានចំនួន ១៦០ ៤៦០នាក់, ខេត្តបន្ទាយមានជ័យមានចំនួន ១២៣ ៨៥៦នាក់, ខេត្តកំពង់ធំមានចំនួន ១០៧ ៩០៤នាក់, ខេត្តសៀមរាបមានចំនួន ៤៣ ៤៩២នាក់ ខេត្តតាកែវមានចំនួន ២៩ ១៥៥នាក់ និងទេសចរដែលមកកម្សាន្តនៅភ្នំពេញមានចំនួន ២២ ៩៥៤នាក់។ 
 

សូមរំលឹកដែរថា ចុងសប្តាហ៍ទី៤នៃខែតុលា ភ្ញៀវទេសចរប្រមាណ១លាននាក់ បានដើរកម្សាន្តទូទាំងប្រទេស ស្របពេលបណ្តាខេត្តមួយចំនួន ដូចជាខេត្តកំពង់ធំ បន្ទាយមានជ័យ និងកំពត បានរៀបចំពិធីប្រណាំងទូក បណ្តែតប្រទីប អុជកាំជ្រួច ការតាំងពិព័រណ៍ និងព្រឹត្តិការណ៍កម្សាន្តជាច្រើនទៀត។ ប្រជាពលរដ្ឋបានចាកចេញពីរាជធានីភ្នំពេញទៅស្រុកកំណើត ក៏ដូចជាផ្តើមដំណើរកម្សាន្តតាំងពីថ្ងៃសៅរ៍មកម្ល៉េះ និងបន្តរហូតដល់ថ្ងៃឈប់សម្រាកព្រះរាជពិធីបុណ្យអុំទូក និងអាចបន្តរហូតដល់ចុងសប្តាហ៍នេះផងដែរ៕