ជាតិ
សម្ដេច ហ៊ុន សែន៖ គ្មានអ្នកណាមានបំណងឱ្យខ្ញុំអវត្តមានក្នុងកិច្ចប្រជុំនៅឥណ្ឌូណេស៊ី និងថៃទេ
សម្តេច ហ៊ុន សែន ពេលត្រឡប់ពីឥណ្ឌូណេស៊ី មកដល់កម្ពុជាវិញ ក្រោយរកឃើញថាឆ្លងកូវីដ-១៩។ ក្នុងឋានៈជាប្រធានអាស៊ាន សម្តេច ត្រូវខកខានការចូលរួមកិច្ចប្រជុំ G20 ដែលរៀបចំនៅឥណ្ឌូនេស៊ី ពីថ្ងៃទី១៥-១៦ វិច្ឆិកា។
×![]()
ដោយ: ខន ចំប៉ា
សម្តេច ហ៊ុន សែន ស្នើកុំឱ្យមានការវិភាគណាមួយ ជុំវិញករណីដែលសម្តេច មានវិជ្ជមានកូវីដ-១៩ នៅពេលសម្តេច បានទៅដល់ប្រទេសឥណ្ឌូណេស៊ី ដើម្បីចូលរួមកិច្ចប្រជុំ G20។ ការស្នើនេះ ធ្វើឡើងតាមរយៈសារសំឡេងរបស់ប្រមុខរដ្ឋាភិបាលកម្ពុជា បន្ទាប់ពីសម្តេច និងប្រតិភូ បានវិលត្រឡប់ពីប្រទេស ឥណ្ឌូណេស៊ី មកដល់កម្ពុជាវិញ។
សម្តេចនាយករដ្ឋមន្ត្រីកម្ពុជា បានគូសបញ្ជាក់ថា គ្មានអ្នកណាមានចេតនារារាំងមិនឱ្យសម្តេច មានវត្តមាននៅក្នុងកិច្ចប្រជុំ G20 នោះទេ។ «គ្មានអ្នកណាមានបំណង ដើម្បីឱ្យខ្ញុំមិនមានវត្តមាន នៅក្នុងការប្រជុំ ទាំងការប្រជុំ G20 នៅក្នុងប្រទេសឥណ្ឌូណេស៊ី និងការប្រជុំ APEC នៅឯប្រទេសថៃនោះឡើយ។ ខ្ញុំសូមឱ្យបំបាត់ចោលនូវការភ័នច្រឡំ ឬការវិភាគណាដែលនាំទៅដល់ផ្លូវនេះតែម្តង»។
ទន្ទឹមនឹងការស្នើនេះ សម្តេច ហ៊ុន សែន ក៏ លើកឡើងពីក្តីបារម្ភរបស់ខ្លួន ដែលខ្លាចថា អាចមានមេដឹកនាំប្រទេស ដែលបានចាកចេញពីកម្ពុជា ទៅឥណ្ឌូណេស៊ី ដើម្បីចូលរួមកិច្ចប្រជុំ G20 មានឆ្លងជំងឺកូវីដ-១៩ ។
សូមជម្រាបថា ក្រៅពីខកខានចូលរួមកិច្ចប្រជុំ G20 ក្នុងឋានៈជាប្រធានអាស៊ាន ដែលរៀបចំនៅប្រទេសឥណ្ឌូណេស៊ី ប្រមុរដ្ឋាភិបាលកម្ពុជា ក៏ត្រូវខកខានជំនួបជាមួយប្រធានាធិបតីចិន និងប្រធានាធិបតីបារាំង នាទីក្រុងបាងកក ប្រទេសថៃ នាកិច្ចប្រជុំ APEC ដែលនឹងរៀបចំឡើងនៅថ្ងៃទី១៨-១៩ វិច្ឆិកានេះដែរ៕
Tag:
សម្តេច ហ៊ុន សែន
© រក្សាសិទ្ធិដោយ thmeythmey.com
