កីឡាជាតិ
លោក Daisuke បកស្រាយថាខ្លូនមិនបានវាយជំនួយការឡើយ គ្រាន់តែជាការអប់រំប៉ុណ្ណោះ ![](https://image.thmeythmey.com/pictures/2014/02/13/daisuke_yoshioka.jpg)
×![]()
គ្រូបង្វឹក Daisuke Yoshioka នៃក្លិបត្រាយអេស៊ីភ្នំពេញ បានទទួលរងនូវការរិៈគន់យ៉ាងខ្លាំងពីសំណាក់អ្នកទស្សនាកីឡាបាល់ទាត់ បន្ទាប់ពីលោកបានវាយទៅលើជំនួយការម្នាក់ដែលជាជនជាតិជប៉ុនដូចគ្នា ក្រោយក្រុមរបស់លោកចាញ់អគ្គស្នងការដ្ឋាននគរបាលជាតិ ១-០ នាការប្រកួតជម្រុះក្នុងពូល D នៃពានរង្វាន់សម្តេច ហ៊ុន សែន នៅទីលានស្តាតចាស់កាលពីថ្ងៃម្សិលមិញ។ អតីតគ្រូបង្វឹកក្រុមជម្រើសជាតិអាយុក្រោម១៦ឆ្នាំរបស់រូបនេះ បានអះអាងថា នេះមិនមែនជាការវាយតប់នោះឡើយ ប៉ុន្តែគ្រាន់តែជាការអប់រំប៉ុណ្ណោះ។
សាក្សីដែលបានមើលឃើញផ្ទាល់ភ្នែកបានរៀបរាប់ថា លោក Daisuke បានវាយជាច្រើនលើកច្រើនសារទៅលើជំនួយការរបស់ខ្លួនម្នាក់ជាជនជាតិជប៉ុនដូចគ្នា ខណៈដែលកំពុងដើរចេញពីទីលានប្រកួតក្រោយ ត្រាយអេស៊ីមិនអាចទទួលបានកៅអីដោយស្វ័យប្រវត្តិនៅវគ្គ១/៤ផ្តាច់ព្រ័ត្រ។
ទោះបីជាយ៉ាងណាក៏ដោយ គ្រូបង្វឹកវ័យជាង៤០ឆ្នាំរូបនេះ បានអះអាងថា កាយវិការរបស់លោកមិនមែនជាការវាយតប់នោះឡើយ វាគ្រាន់តែជាការអប់រំដើម្បីឲ្យមានការកែខ្លួនប៉ុណ្ណោះ។ លោកបានពន្យល់ថា៖ «គាត់ភ្លេចយកឯកសណ្ឋាន និងលុយ ហើយនៅពេលដែលការប្រកួតបានបញ្ចប់ គាត់ហាក់ដូចជាមិនមានអារម្មណ៍នៅក្នុងខ្លួនឡើយ។ គាត់គឺជាជំនួយការជនជាតិជប៉ុន ដូច្នេះគាត់ដឹងច្បាស់ថា នេះជាវប្បធម៌របស់ជប៉ុនក្នុងការអប់រំមនុស្សឲ្យមានការកែប្រែ។ ពេលនេះ គាត់កំពុងធ្វើការជាមួយខ្ញុំ សូមកុំមានការបារម្ភអ្វី!» ។
អតីតគ្រូបង្វឹកជម្រើសជាតិនៃឈុត U-16 របស់កម្ពុជារូបនេះ បានពន្យល់ថា រូបលោកមិនមានភាពតានតឹងអ្វីឡើយក្រោយការប្រកួតកាលពីថ្ងៃពុធ ពីព្រោះពានរង្វាន់សម្តេច ហ៊ុន សែន មិនមែនជាគោលដៅរបស់លោកឡើយនៅឆ្នាំនេះ។ លោក Daisuke បានពន្យល់ថា៖ «ខ្ញុំមិនបារម្ភពីការចាញ់ ឬឈ្នះឡើយ។ ខ្ញុំបានផ្តល់ឱកាសដល់កីឡាករវ័យក្មេងឲ្យបានចូលលេងយកបទពិសោធន៍»។
លោកបានបញ្ជាក់បន្ថែមថា លោកបានផ្លាស់ប្តូរកីឡាករជម្រើសដំបូងរហូតដល់ទៅ៧នាក់ ហើយដាក់កីឡាករបម្រុងឲ្យចូលលេងជាមួយភ្នំពេញក្រោន។ ទោះបីជាយ៉ាងណាក៏ដោយ លោកពេញចិត្តចំពោះការលេងរបស់កីឡាករខ្លួន។
លោក Daisuke បានអះអាងថា គោលដៅសំខាន់របស់ត្រាយអេស៊ី គឺឈរឲ្យបានក្នុងចំណោម៤ក្រុមកំពូលនារដូវកាលនេះ និងចូលលេងក្នុងយុទ្ធនាការ AFC នៅក្នុងឆ្នាំ២០១៥ ៕
© រក្សាសិទ្ធិដោយ thmeythmey.com