លោកវេជ្ជបណ្ឌិត ស៊ុំ សត្ថា ប្រធានសមាគមបច្ចេកវិទ្យាទឹកនោមផ្អែម (CADET) បានបញ្ជាក់ថា កិច្ចសហការនេះ ធ្វើឡើងក្នុងគោលបំណងបង្កើនការអប់រំផ្នែកសុខភាព ពិសេសចំណេះដឹងជំងឺទឹកនោមផ្អែមប្រភេទ១ឱ្យកាន់តែទូលំទូលាយ។ ការបញ្ជ្រាបចំណេះដឹងពាក់ព័ន្ធជំងឺទឹកនោមផ្អែម នឹងធ្វើឡើងតាមបែបឌីជីថល ដើម្បីអ្នកជំងឺទឹកនោមផ្អែមងាយស្រួលស្វែងរកព័ត៌មាន និងកាត់បន្ថយក្ដីព្រួយបារម្ភសម្រាប់អ្នកជំងឺទឹកនោមផ្អែមប្រភេទ១នេះ។
 

អ្នកស្រី Anne-Charlotte Ficheroulle អ្នកគ្រប់គ្រងការច្នៃប្រឌិតឌីជីថលនៃអង្គការ Action4Diabetes បានបញ្ជាក់ថា កិច្ចសហការនេះកើតឡើងក៏ព្រោះ CADET និង Action4Diabetes មានគោលដៅបញ្ជ្រាបចំណេះដឹង និងការអប់រំផ្នែកសុខភាពដល់អ្នកជំងឺទឹកនោមផ្អែមប្រភេទ១ដូចគ្នា។ អ្នកស្រីយល់ថា ការបញ្ជ្រាបចំណេះដឹងដល់អ្នកជំងឺទឹកនោមផ្អែមតាមបែបឌីជីថល គឺពិតជាមានសារៈសំខាន់ និងងាយស្រួលសម្រាប់អ្នកជំងឺស្វែងរកព័ត៌មានពាក់ព័ន្ធនានា៕