ជាតិ
សេដ្ឋកិច្ច
លោកសុន ឆ័យ៖ ចំណូលតំបន់អង្គរមានភាពមិនប្រក្រតី និងមានការលាក់បាំងឯកសារច្រើន
× អនុប្រធានគណៈកម្មាការទី២នៃរដ្ឋសភា លោក សុន ឆ័យ មានប្រសាសន៏ថា ចំណូលនៅតំបន់អង្គរមានភាពមិនប្រក្រតី និងមានការលាក់បាំងឯកសារពិតជាច្រើន។ ការអះអាងរបស់លោក សុន ឆ័យបែបនេះ គឺធ្វើឡើងក្រោយពីជំនួបសាកសួរអាជ្ញាធរជាតិអប្សរានៅខេត្តសៀមរាបនៅថ្ងៃ២២ធ្នូនេះ ទាក់ទងការគ្រប់គ្រងប្រាសាទអង្គរវត្ត និងចំណូលពីការលក់សំបុត្រចូលទស្សនាប្រាសាទ អង្គរវត្ត។
ក្រោយពីជំនួបសាកសួរអាជ្ញាធរជាតិអប្សរា ទាក់ទងការគ្រប់គ្រងប្រាសាទអង្គរវត្ត និងចំណូលពីការលក់សំបុត្រចូលទស្សនាប្រាសាទអង្គរវត្តរួចមក។ លោក សុន ឆ័យ អនុប្រធានគណៈកម្មាការទី២នៃរដ្ឋសភាមានប្រសាសន៏ថា ការគ្រប់គ្រងនិងចំណូលនៅតំបន់អង្គរមានភាពមិនប្រក្រតី និងមានការលាក់បាំងឯកសារពិតជាច្រើន។ លោកបានបញ្ជាក់ទៀតថា នៅក្នុងការបង្ហាញរបស់អាជ្ញាធរអប្សរា គឺមានភាពមិនច្បាស់លាស់ និងមិនត្រឹមត្រូវដូចជាអ្វីដែលក្រុមការងារលោកបានសិក្សាកន្លងមកនោះទេ។ ហើយលោកនឹងបន្ដការស៊ើបអង្កេត ដាក់ការសង្ស័យបន្ថែមទៀតចំពោះបញ្ហានេះ។
លោកសុន ឆ័យពន្យល់ថា៖«បើតាមឯកសារមួយចំនួន ដែលខ្ញុំទទួលបានគឺមានភ្ញៀវទេសចរ មកកម្ពុជាមានចំនួនជិត៥លាននាក់ ប៉ុន្ដែអាជ្ញាធរថាមានតែជាង១លាននាក់។ តែមិនមានឯកសារបង្ហាញឲ្យច្បាស់ដល់ខ្ញុំទេ។ ពេលសួរពីបញ្ហាជួលដីតំបន់អង្គរ គេថាជួលឲ្យក្រុមហ៊ុនឯកជន(ឧកញាសុខ គង់) តែ២៣ហិចតាទេ ហើយដីនេះជួលមួយឆ្នាំ៩លានដុល្លា។ តែមិនមានឯកសារបញ្ជាក់ឲ្យច្បាស់ឲ្យខ្ញុំសោះ។ ហើយមានការបែងចែកលុយមានភាពមិនប្រក្រតី។ តែពួកគេថាបានចំណាយប្រាក់ចំនូល១៥ភាគរយទៅការអភិវឌ្ឍន៍។ នៅពេលសុំមើលឯកសារក៏មានការលាក់បាំងមិនផ្ដល់ឲ្យខ្ញុំទេ។ តែយើងនឹងធ្វើការស៊ើបអង្កេតពីបញ្ហានេះបន្ដទៀត»។
លោក សុន ឆ័យ បញ្ជាក់ទៀតថា លោកនឹងយកឯកសារដែលប្រមូលបានទាំងនេះ យកទៅផ្ទៀងផ្ទាត់ជាមួយឯកសារដែលលោកបានសិក្សាកន្លងមក។ ហើយលោកនឹងបន្ដពិភាក្សា និងពិចារណាបន្ថែមទៀតចំពោះបញ្ហានេះ ជាមួយលោក ជាម យៀប ប្រធានគណៈកម្មាការទី២នៃរដ្ឋសភា។
លិខិតរបស់អាជ្ញាធរជាតិអប្សរា ចុះថ្ងៃទី២៥ខែវិច្ឆិកាកន្លងមកបានឲ្យដឹងថា ក្រោយពេលដែលការប្រមូលចំណូលពីការលក់ប័ណ្ណចូល ទស្សនាអង្គរវត្តស្ថិតនៅក្រោមការគ្រប់គ្រងផ្ទាល់ពីស្ថាប័នរដ្ឋអស់មួយរយៈពេល ដោយលទ្ធផលបង្ហាញឲ្យឃើញនូវប្រសិទ្ធភាពទន់ខ្សោយ ទើបរាជរដ្ឋាភិបាលបានធ្វើការសម្រេចជួលឲ្យក្រុមហ៊ុនឯកជនគ្រប់គ្រង ការប្រមូលចំណូលពីការលក់ប័ណ្ណចូលទស្សនាអង្គរជំនួសស្ថាប័នរដ្ឋវិញ ។ ប៉ុន្តែអាជ្ញាធរអប្សរាមិនបានដាក់បញ្ចាំ ឬជួលប្រាសាទអង្គរវត្តទៅឲ្យ ក្រុមហ៊ុនឯកជន ឬបរទេសរយៈពេល៩៩ឆ្នាំ ដូចការលើកឡើងឡើយ។
អាជ្ញាធរអប្សរាបញ្ជាក់ថាប្រាក់ចំណូលទាំងនោះបានទៅដល់រតនាគារជាតិ ក្រសួងសេដ្ឋកិច្ច និងហិរញ្ញវត្ថុ គឺមិនមានការឆ្លងកាត់អាជ្ញាធរអប្សរាទេ។ អាជ្ញាធរបញ្ជាក់ថាការជួលទៅ ក្រុមហ៊ុនឯកជនប្រមូលចំណូលនេះ ត្រូវបានធ្វើឡើងតាមរយៈកិច្ចសន្យារៀងរាល់៥ឆ្នាំម្តង ហើយចំណែកនៃចំណូលត្រូវបង់ពន្ធលើតម្លៃបន្ថែម(VAT១០ភាគរយ) បង្កើតមូលនិធិអភិរក្ស និងអភិវឌ្ឍតំបន់អង្គរ(១៥ភាគរយ) ដកចំណែករបស់ក្រុមហ៊ុន១៥ភាគរយ ហើយប្រាក់នៅសល់បង់ចូលថវិការដ្ឋទាំងស្រុង។
បើតាមអាជ្ញាធរជាតិអប្សរា ចំណូលបានមកពីការចូលទស្សនា ប្រាសាទអង្គរវត្តនៅឆ្នាំ២០១៤ ក្នុងរយៈពេល១០ខែ មានទៅជាង៤៧លានដុល្លារ។ ចំណែកនៅក្នុង២០១៣ ចំណូលសរុបពីការលក់សំបុត្រទស្សនាទៅដល់៥៧លានដុល្លារ។ ចំពោះបញ្ហាចំណូលនេះ លោកសុន ឆ័យបញ្ជាក់ថា មិនត្រឹមត្រូវនោះទេ។ បើតាមលោក សុន ឆ័យ ចំណូលពីការលក់សំបុត្រតាមទិន្នន័យដែលលោកទទួលបាន គឺមានចំនួនយ៉ាងតិច១៦០លានដុល្លារក្នុងមួយឆ្នាំ៕
© រក្សាសិទ្ធិដោយ thmeythmey.com