ជាតិ
សេដ្ឋកិច្ច
កម្ពុជាមានឱនភាពជញ្ជីងពាណិជ្ជកម្ម ២,៧ ពាន់លានដុល្លារក្នុងឆ្នាំ២០១៤
× ប្រទេសកម្ពុជា នៅតែបន្តមានឱនភាពនៃជញ្ជីងពាណិជ្ជ ដែលបណ្ដាលមកពីការនាំចូលច្រើនជាងការនាំចេញ សម្រាប់ឆ្នាំ២០១៤ នេះ ដែលមានទំហំគិតជាទឹកប្រាក់ប្រមាណជា ២,៧ ពាន់លានដុល្លារ។ នេះបើយោងតាមរបាយការណ៍ ប្រចាំឆ្នាំរបស់ក្រសួងពាណិជ្ជកម្ម។
បើតាមរបាយការណ៍ដដែលនោះ ក្នុងឆ្នាំ២០១៤ កម្ពុជាបាននាំចេញទំនិញគិតជាទឹកប្រាក់ប្រមាណជា ៧,៦៩ ពាន់លានដុល្លារ ខណៈពេលដែលការនាំចូលមានទំហំប្រមាណជា ១០,៤៣ ពាន់លានដុល្លារ។
ក្រសួងពាណិជ្ជកម្មក៏បានឲ្យដឹងផងដែរថា ក្នុងឆ្នាំ២០១៤ ទំហំនៃការធ្វើពាណិជ្ជកម្មក្រៅប្រទេសរបស់កម្ពុជា គឺមានចំនួន ១៨,១ ពាន់លានដុល្លារ ដែលបានកើនឡើង ១៣,៨ ភាគរយធៀបទៅនឹងឆ្នាំ២០១៣ ដែលទំហំពាណិជ្ជកម្មកម្ពុជាមានចំនួន ១៥,៩ ពាន់លានដុល្លារ។
ផលិតផលសំខាន់ៗដែលកម្ពុជានាំចេញគឺ មាន ៨០ ភាគរយជាសម្លៀកបំពាក់ និងស្បែកជើង វាយនភណ្ឌ ក្រៅពីនោះគឺជាផលិតផលកសិកម្ម។ ដោយឡែកផលិតផលសំខាន់ៗដែលកម្ពុជាបាននាំចូល គឺរួមមាន វត្ថុធាតុដើម និងសម្ភារៈបម្រើឲ្យការផលិតសម្លៀកបំពាក់ ប្រេង សម្ភារសំណង់រថយន្តម៉ូតូអាហារភេសជ្ជៈឱសថនិងគ្រឿងសំអាងជាដើម។
ដៃគូពាណិជ្ជកម្មសំខាន់របស់កម្ពុជា គឺមាន សហភាពអឺរ៉ុប សហរដ្ឋអាមេរិក ចិនកូរ៉េខាងត្បូងជប៉ុនថៃវៀតណាមសិង្ហបុរីនិងម៉ាឡេស៊ីជាដើម៕
© រក្សាសិទ្ធិដោយ thmeythmey.com