ជាតិ
សេដ្ឋកិច្ច
ទេសចរកូរ៉េចូលចិត្តទិញផ្សិតសូក្រំព្រោះជឿថាអាចព្យាបាលជំងឺ ![](https://image.thmeythmey.com/pictures/2015/01/19/mushrom.jpg)
×![]()
សៀមរាប៖ ក្រៅពីទិញត្បូង និងសម្ភារមួយចំនួន ភ្ញៀវទេសចរកូរ៉េ ត្រូវបានកក់សម្គាល់ឃើញថា ចូលចិត្តទិញផ្សិតពីប្រទេសកម្ពុជា ព្រោះពួកគេជឿថា អាចព្យាបាលជំងឺបានច្រើនមុខ។ ផ្សិតសូក្រំ ត្រូវបានប្រជាជនកូរ៉េ យកទៅត្រាំជាមួយនឹងស្រា ដើម្បីឲ្យចលនាឈាមរត់បានល្អ និងអាចឲ្យពួកគេកក់ក្តៅ ធននឹងអាកាសធាតុត្រជាក់ខ្លាំង។
ក្រុមមគ្គុទ្ទេសក៍ទេសចរណ៍កក់សម្គាល់ឃើញថា ភ្ញៀវជនជាតិកូរ៉េពេលដែលមកកម្សាន្តនៅខេត្តសៀមរាបម្តងៗ ពួកគេតែងរកទិញផ្សិតសូក្រំ ដែលជាប្រភេទផ្សិតថ្នាំ បង្កើនកំដៅនៅក្នុងខ្លួន។ ពួកគេនិយាយថា ក្នុងចំណោម២០នាក់ មានភ្ញៀវជនជាតិកូរ៉េ៥នាក់ ដែលបានទិញផ្សិតសូក្រំ ពីខេត្តសៀមរាប។
លោក គឹម សុវណ្ណ មគ្គុទ្ទេសក៍ទេសចរណ៍ភាសាកូរ៉េ បាននិយាយថា ជនជាតិកូរ៉េ យកផ្សិតសូក្រំ ទៅត្រាំលាយក្នុងស្រា សម្រាប់ផឹកកំដៅខ្លួន ខណៈដែលអាកាសធាតុប្រទេសនេះមានសភាពត្រជាក់ខ្លាំង។ អនុប្រធានសមាគមទ្រទ្រង់ក្តីសង្ឃឹមមគ្គុទ្ទេសក៍ភាសាកូរ៉េ រូបនេះបន្តថា ក្នុងភ្ញៀវម្នាក់ អាចទិញផ្សិតសូក្រំពី១គីឡូក្រាមឡើង ហើយផ្សិតនេះ ត្រូវគេដឹងថាមានតម្លៃលើសពីមួយពាន់ដុល្លារសហរដ្ឋអាមេរិក។
លោក គឹម សុវណ្ណ រៀបរាប់បន្ថែមថា៖« ភ្ញៀវកូរ៉េ អំឡុងពេលដើរកម្សាន្តខេត្តសៀមរាប ក្រុមហ៊ុនតែងយកចូលក្នុងចំនួន៣ ទី១ហាងលក់ផ្សិត ទី២ ហាងលក់ពូក សម្ភារៈបន្ទប់គេង និងទី៣ គឺហាងលក់ត្បូង។ ហាងផ្សិត និងហាងត្បូង ឃើញពួកគេទិញគួរសម»។
យ៉ាងណាក៏ដោយ ការនិយមទិញផ្សិតសូក្រំរបស់ជនជាតិកូរ៉េ មានការធ្លាក់ចុះ ព្រោះថា ការជឿលើថ្នាំបុរាណ ហាក់មានការថយចុះនាពេលបច្ចុប្បន្ន។ នេះជាការអះអាងរបស់លោក ម៉ី សីដា។ លោក សីដា ដែលជាមគ្គុទ្ទេសក៍ភាសាកូរ៉េមួយរូបដែរនោះ បានកក់សម្គាល់ឃើញថា ចរន្តការទិញផ្សិតរបស់ភ្ញៀវកូរ៉េ បានធ្លាក់ចុះច្រើន។ ការណ៍នេះលោកពន្យល់ថា ដោយសារកត្តា២យ៉ាង ទី១ ការអស់ជំនឿ និងជាទី២ គឺផ្សិតសូក្រំ មិនសូវសុទ្ធល្អ ដូចពីមុនទេ និយាយឲ្យខ្លី មានការនាំចូលផ្សិតក្លែងក្លាយ យកមកលក់នៅទីផ្សារសៀមរាប។
កាលពីបុរាណ ប្រជាជនខ្មែរមានជំនឿលើផ្សិតសូក្រំ ដែលក្នុងនោះស្ត្រីតែងតែផឹកវា ដើម្បីរំលាយឈាមចេញពីខ្លួននៅសេសសល់ ក្រោយពេលសម្រាលកូន។ បច្ចុប្បន្នផ្សិតនេះ មិនសូវសម្បូរទេ។ បើក្រុមមគ្គុទ្ទេសក៍ទេសចរណ៍ ទីផ្សារផ្សិតសូក្រំបច្ចុប្បន្នត្រូវគេនាំចូលពីប្រទេសវៀតណាម និងឡាវ ហើយទីផ្សារធំរបស់ផ្សិតសូក្រំ គឺភ្ញៀវជនជាតិកូរ៉េតែម្តង៕
© រក្សាសិទ្ធិដោយ thmeythmey.com