ជាតិ
សេដ្ឋកិច្ច
ទំហំពាណិជ្ជកម្មរកម្ពុជា-ថៃបានកើនដល់៥ពាន់លានដុល្លារ នៅឆ្នាំ២០១៤
× ពិព័រណ៍ពាណិជ្ជកម្មកម្ពុជា-ថៃ ឆ្នាំ២០១៥ នឹងរៀបចំធ្វើធ្វើរយៈពេល៤ថ្ងៃ ចាប់ពីថ្ងៃទី៥ដល់ទី៨ខែ កុម្ភៈ នៅមជ្ឈមណ្ឌលពិព័រណ៍កោះពេជ្រ។ ពិព័រណ៍នេះ រៀបចំឡើងក្នុង បំណងផ្សព្វផ្សាយផលិតផលថៃ ដែលមានគុណភាពល្អតម្លៃសមរម្យដល់អតិថិជន និងអាចឲ្យ អតិថិជនទិញទំនិញពីម្ចាស់រោងចក្រដោយផ្ទាល់ ក្នុងតម្លៃថោកជាងទីផ្សារ។
ក្រុមហ៊ុនចំនួន២៥០ នឹងចូលរួមការតាំងពិព័រណ៍លើកនេះ និងមាន ស្តង់ពិព័រណ៍ចំនួន២៥០ស្តង់ នឹងដាក់បង្ហាញ និងលក់ផលិតផលរបស់ខ្លួន រួមមានសម្ភារសំណង់ និងគ្រឿងបន្លាស់ម៉ាស៊ីន អាហារ និងភេសជ្ជៈ សម្លៀកបំពាក់ និងវាយនភណ្ឌ គ្រឿងសម្អាង សម្ភារប្រើប្រាស់ក្នុងផ្ទះ សម្ភារអគ្គិសនី និងអេឡិចត្រូនិក រួមទាំងសម្ភារជាច្រើនផ្សេងទៀត។
ថ្លែងនៅក្នុងសន្និសីទសារព័ត៌មាន កាលពីថ្ងៃទី២៦មករា ភារធារីស្ថានទូតថៃប្រចាំនៅកម្ពុជា លោក Surapol Maneepong បានមានប្រសាសន៍ថា ការរៀបចំតាំងពិព័រណ៍នេះវាជាឱកាសជំនួបពិភាក្សារវាងថ្នាក់ដឹកនាំ នៃប្រទេសទាំងពីរ ហើយលោកបានប្តេជ្ញានឹងជំរុញឱ្យទំហំពាណិជ្ជកម្មរវាងប្រទេសទាំងពីរកើនឡើងប្រមាណជា៣០ភាគរយក្នុងមួយឆ្នាំ។ ទំហំពាណិជ្ជកម្មរវាងកម្ពុជា-ថៃ ក្នុងឆ្នាំ២០១៤ បានកើនដល់ទឹកប្រាក់៥ពាន់លានដុល្លារ កើនឡើងប្រមាណជា១២ភាគរយធៀបនឹងឆ្នាំ២០១៣ ដែលមានចំនួន៤.៦០០លានដុល្លារ។
សូមបញ្ជាក់ថា សិក្ខាសាលាដើម្បីផ្តល់ចំណេះដឹងដល់ពាណិជ្ជករថៃ ដែលចាប់អារម្មណ៍ទីផ្សារកម្ពុជា ក៏នឹងរៀបចំធ្វើឡើង នៅមុនមួយថ្ងៃ នៃការបើកពិព័រណ៍នេះដែរ។ ជាមួយគ្នានោះ នឹងមានការរៀបចំកម្មវិធីចាប់ដៃគូពាណិជ្ជកម្ម និងស្វែងរកដៃគូពាណិជ្ជកម្មជាមួយពាណិជ្ជករកម្ពុជា និងការសម្តែងសិល្បៈរួមគ្នារវាងតារាសម្តែងរបស់កម្ពុជា និងថៃ នឹង រៀបចំនៅពេលរាត្រីផងដែរ៕
© រក្សាសិទ្ធិដោយ thmeythmey.com