ជាតិ
សេដ្ឋកិច្ច
ក្រុមហ៊ុនផ្លូវដែកធំទី ៦ របស់ចិនស្វែងរកលទ្ធភាពសាងសង់ផ្លូវដែកនៅកម្ពុជា ![](https://image.thmeythmey.com/pictures/2015/02/02/222015174642sun_chanthol.jpg)
×![]()
ក្រុមហ៊ុនសាងសង់ផ្លូវដែកអន្តរជាតិរបស់ប្រទេសចិនChina Railway International គឺជាសហគ្រាសរដ្ឋដ៏ធំបំផុតទីប្រាំមួយ នៅប្រទេសចិនបានមកស្វែងរកលទ្ធភាព និងកំពុងសំឡឹងមើលសក្ដានុពល ក្នុងការសាងសង់ផ្លូវដែកនៅក្នុងប្រទេសកម្ពុជា។ នេះបើយោងតាមសេចក្ដីប្រកាសព័ត៌មានរបស់ក្រសួងពាណិជ្ជកម្ម។
បើតាមសេចក្ដីប្រកាសព័ត៌មាននោះ ក្រុមហ៊ុន China Railway International ដែលមានបទពិសោធន៍យ៉ាងច្រើនលើការសាងសាង់ផ្លូវដែក នៅក្នុងប្រទេសចិន និងនៅក្នុងពិភពលោកនិងមានចំណែកទីផ្សារភាគច្រើន លើវិស័យសាងសង់ផ្លូវដែក មានបំណងស្វែងរកលទ្ធភាព សាងសង់ផ្លូវដែកនៅកម្ពុជាដោយឈរលើគោលការណ៍ កសាង ប្រតិបត្តិ ផ្ទេរ (BOT) ។
ក្នុងជំនួបជាមួយលោក Lu Bo ប្រធានក្រុមហ៊ុនផ្លូវដែកចិន លោក ស៊ុន ចាន់ថុល បានសម្តែងការគាំទ្រ យ៉ាងមុតមាំរបស់ខ្លួនចំពោះការវិនិយោគរបស់ចិន លើគម្រោងហេដ្ឋារចនាសម្ព័ន្ធ នៅកម្ពុជាដោយឈរលើគោលការណ៍ កសាង ប្រតិបត្តិ ផ្ទេរ (BOT)។ លោករដ្ឋមន្ត្រីក៏បានគូសបញ្ជាក់ថា ការសាងសង់ផ្លូវដែកនេះ នឹងជួយដល់ការបន្ធូរបន្ថយថ្លៃដើម នៃការដឹកជញ្ជូនយ៉ាងច្រើន នៅក្នុងប្រទេសកម្ពុជា។
លោករដ្ឋមន្ត្រីក៏បានជំរុញ ឲ្យក្រុមហ៊ុនដាក់សំណើគម្រោងទាក់ទងនឹងផែនការសាងសង់ផ្លូវដែកនេះ ទៅក្រសួងសាធារណៈការ និងដឹកជញ្ជូននិងក្រុមប្រឹក្សាអភិវឌ្ឍន៍កម្ពុជា ដើម្បីសុំការពិនិត្យសម្រេចផងដែរ៕
© រក្សាសិទ្ធិដោយ thmeythmey.com