ជាតិ
សេដ្ឋកិច្ច
ឆ្នាំ២០១៤ ទំហំពាណិជ្ជកម្មរវាងកម្ពុជា-អាមេរិកមានចំនួន ៣,១៧ ពាន់លានដុល្លារ
×
ទំហំពាណិជ្ជកម្មរវាងប្រទេសកម្ពុជា និងសហរដ្ឋអាមេរិក មានតម្លៃគិតជាទឹកប្រាក់ប្រមាណជា ៣,១៧ ពាន់លានដុល្លារ នៅក្នុងឆ្នាំ២០១៤ ដោយបានកើនឡើង ៥ ភាគរយធៀបទៅនឹងឆ្នាំ២០១៣ ដែលទំហំពាណិជ្ជកម្មរបស់ប្រទេសទាំងពីរ មានចំនួនតែ ៣,០១ ពាន់ដុល្លារនោះ។ នេះបើយោងតាមទីភ្នាក់ងារព័ត៌មាន Xinhua ។
ទីភ្នាក់ងារព័ត៌មានរដ្ឋចិនមួយនេះ បានដកស្រង់ទិន្នន័យពីក្រសួងពាណិជ្ជកម្មអាមេរិក ដែលបានចេញផ្សាយកាលពីសប្ដាហ៍មុន មកចុះផ្សាយថា ការនាំចេញពីកម្ពុជា ទៅកាន់សហរដ្ឋអាមេរិក គឺបានកើនឡើង ២,៦ ភាគរយ គិតជាទឹកប្រាក់ ២,៨៤ ពាន់លានដុល្លារ។ ខណៈពេលដែលការនាំចូលពីអាមេរិក ក៏បានកើនឡើងដល់ ៣៦ ភាគរយមានតម្លៃជាទឹកប្រាក់ប្រមាណជា ៣២៨ លានដុល្លារផងដែរ។
គួរបញ្ជាក់ថា សហរដ្ឋអាមេរិកគឺជាគោលដៅនាំចេញធំបំផុតរបស់កម្ពុជា ដែលក្នុងនោះទំនិញដែលកម្ពុជានាំចេញទៅអាមេរិក ច្រើនជាងគេគឺផលិតផលសម្លៀកបំពាក់ និងស្បែកជើង ព្រមទាំងផលិតផលកសិកម្មជាដើម។ ផ្ទុយមកវិញកម្ពុជា បាននាំចូលផលិតផលមួយចំនួនពីសហរដ្ឋអាមេរិក ដូចជារថយន្ត ម៉ាស៊ីន ថ្នាំពេទ្យ និងបរិក្ខារវេជ្ជសាស្ត្រជាដើម៕
© រក្សាសិទ្ធិដោយ thmeythmey.com