ជាតិ
សេដ្ឋកិច្ច
ឆ្នាំ២០១៤ កម្ពុជានាំចូលរថយន្តថ្មីនិងជជុះជិត ២ ម៉ឺនគ្រឿងពីសហរដ្ឋអាមេរិក
×![]()
ដោយ: ថ្មីៗ
ក្នុងរយៈពេលពេញមួយឆ្នាំ ២០១៤ ការនាំចូលរថយន្តថ្មី និងជជុះ ពីសហរដ្ឋអាមេរិកមកក្នុងប្រទេសកម្ពុជា គឺមានការកើនឡើង ៦៩ ភាគរយធៀបទៅនឹងការនាំចូលរថយន្ត កាលពីឆ្នាំ២០១៣ ពោលគឺមានចំនួនជិត ២ ម៉ឺនគ្រឿង។ នេះបើយោងតាមរបាយការណ៍របស់ក្រុមហ៊ុនផ្ដល់សេវាដឹកជញ្ជូន West Coast Shipping របស់អាមេរិក។
បើតាមរបាយការណ៍របស់ក្រុមហ៊ុនខាងលើនេះ ក្នុងឆ្នាំ២០១៤ កម្ពុជាបាននាំចូលរថយន្តថ្មី និងជជុះសរុប ១៩ ២៦៣ គ្រឿងពីសហរដ្ឋអាមេរិក។ កំណើននៃការនាំចូលរថយន្តនេះ គឺដោយសារតែទីផ្សារនៃលក់រថយន្តទាំង ថ្មី និងប្រណីត ជាពិសេសគឺរថយន្តជជុះ មានការកើនឡើងខ្លាំងធៀបនឹងឆ្នាំមុនៗ ។
West Coast Shipping ក៏បានបញ្ជាក់នៅក្នុងរបាយការណ៍នោះផងដែរថា ថ្វីត្បិតតែការនាំចូលមានកំណើនពិតមែន ក៏ប៉ុន្តែគេក៏ត្រូវរង់ចាំមើល ការសម្រេចចិត្តរបស់រដ្ឋាភិបាលកម្ពុជាថា តើរដ្ឋនឹងបន្តអនុញ្ញាតឲ្យមានការនាំចូលរថយន្ត ដោយគ្មានអាជ្ញាប័ណ្ណពីក្រុមហ៊ុនដើមឬក៏ត្រូវចាប់ផ្ដើមការពារអ្នកលក់រថយន្ត ដែលទទួលបានសិទ្ធិចែកចាយស្របច្បាប់ក្នុងប្រទេស និងតម្រូវឲ្យប្រជាជនត្រូវទិញរថយន្តថ្មី ឬយ៉ាងណានោះទេ។
សូមបញ្ជាក់ផងដែរ បើតាមរបាយការណ៍ដដែលនោះ កម្ពុជាស្ថិតក្នុងចំណោមប្រទេសដែលបាននាំចូលរថយន្តពីអាមេរិកច្រើនជាងគេលំដាប់ទី៦ បន្ទាប់ពីប្រទេសអារ៉ាប់រួម ចិន ហ្សកហ្ស៊ី អាឡឺម៉ង់ និងនីហ្សេរីយ៉ា៕
© រក្សាសិទ្ធិដោយ thmeythmey.com
