សេដ្ឋកិច្ច
AFD កំពុងក្លាយជាដៃគូផ្តល់ជំនួយទ្វេភាគីធំជាងគេដល់កម្ពុជា ក្នុងចំណោមបណ្តាស្ថាប័នមកពីអឺរ៉ុប
× កាលពីថ្ងៃទី១២ ខែមីនា ក្រសួងសេដ្ឋកិច្ច និងហិរញ្ញវត្ថុ និងទីភ្នាក់ងារអភិវឌ្ឍន៍បារាំង (AFD) បានរៀបចំការប្រជុំប្រចាំឆ្នាំលើកទី៧ស្តីពីការត្រួតពិនិត្យឡើងវិញលើគម្រោង ដែលផ្តល់ហិរញ្ញប្បទានដោយ AFD នៅកម្ពុជា។ កិច្ចពិភាក្សានេះបានប្រព្រឹត្តទៅក្រោមអធិបតីភាពលោក ហែម វណ្ណឌី អនុរដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ និងលោក ហ្សង់-ក្លូដ ពាំប៊ឹហ្វ (Jean-Claude Poimboeuf) ឯកអគ្គរដ្ឋទូតបារាំងប្រចាំកម្ពុជា ដោយមានវត្តមានលោកស្រី ហ្វ្រង់ស៊័រ សាលីយេ (Françoise Charlier) អនុប្រធាននាយកដ្ឋានអាស៊ីរបស់ទីភ្នាក់ងារ AFDនៅប៉ារីស៍។ ស្ថាប័នដៃគូ និងភាគីពាក់ព័ន្ធដទៃទៀតក៏បានចូលរួមក្នុងកិច្ចប្រជុំនេះផងដែរ។
អ្នកចូលរួមទាំងអស់បានធ្វើការពិភាក្សាផ្លាស់ប្តូរយោបល់ និងពិនិត្យឡើងវិញអំពីវឌ្ឍនភាពរបស់គម្រោងនិមួយៗ ព្រមទាំងស្វែងយល់កាន់តែច្បាស់អំពីតម្រូវការ និងបញ្ហាប្រឈមនានាក្នុងការអនុវត្តគម្រោងទាំងនោះ។ ការត្រួតពិនិត្យឡើងវិញនេះបានឆ្លុះបញ្ចាំងអោយឃើញពីប្រសិទ្ធភាពនៃអន្តរាគមន៍របស់ ទីភ្នាក់ងារ AFD ក្នុងការរៀបចំ និងពង្រឹងវិស័យសេដ្ឋកិច្ចសង្គមសំខាន់ៗរបស់កម្ពុជា។ ការប្រជុំនេះក៏បានបង្ហាញផងដែរពីតួនាទីលេចធ្លោរបស់ AFD ក្នុងការផ្តល់ឥណទានដល់ប្រទេសកម្ពុជា។ ជាមួយនឹងកំណើននៃហិរញ្ញប្បទានសន្យាកន្លងមក ទីភ្នាក់ងារអភិវឌ្ឍន៍បារាំងកំពុងក្លាយជាដៃគូផ្តល់ជំនួយទ្វេភាគីធំជាងគេដល់កម្ពុជាក្នុងចំណោមបណ្តាស្ថាប័នមកពីអឺរ៉ុប ។
ឆ្នាំ២០១៤បានក្លាយទៅជាឆ្នាំប្រវត្តិសាស្ត្រសម្រាប់ប្រតិបត្តិការហិរញ្ញវត្ថុរបស់ទីភ្នាក់ងារ AFD ដែលបានសន្យាផ្តល់ជំនួយជាង១០០លានដុល្លារអាមេរិកដល់កម្ពុជា។ ស្ថានភាពនេះនឹងបន្តនៅឆ្នាំ២០១៥ទៀត ដោយហេតុថា AFD មានគម្រោងបង្កើនការផ្តល់កម្ចីទ្វេដងនៅឆ្នាំនេះ។ ជារួម ចាប់តាំងពីដំណើរការសកម្មភាពរបស់ខ្លួនក្នុងប្រទេសកម្ពុជានៅឆ្នាំ១៩៩៣មក ទីភ្នាក់ងារAFDបានសន្យាផ្តល់ហិរញ្ញប្បទានជិត៤០០លានដុល្លារ ក្នុងនោះបានផ្តល់ជូនរួចហើយចំនួន១៧០លានដុល្លារ។
កាលពីឆ្នាំកន្លងទៅ ទីភ្នាក់ងារអភិវឌ្ឍន៍បារាំងក៏បានបង្កើនការផ្តល់ប្រាក់កម្ចីគ្មានការធានាពីរដ្ឋផងដែរ ពោលគឺជាកម្ចីដែលផ្តល់អោយផ្នែកឯកជន ស្ថាប័នសាធារណ: ឬពាក់កណ្តាលសាធារណ:ជាដើម។ ជាក់ស្តែងនៅឆ្នាំ២០១៤ ទីភ្នាក់ងារAFDបានចុះហត្ថលេខាលើកិច្ចព្រមព្រៀងហិរញ្ញប្បទានជាច្រើនជាមួយស្ថាប័នមីក្រូហិរញ្ញវត្ថុនិងធនាគារពាណិជ្ជកម្ម ក្នុងក្របខ័ណ្ឌនៃគម្រោងទទួលបានទឹកស្អាត និងអគ្គិសនីនៅតាមទីជនបទ ដែលមានទឹកប្រាក់សរុបចំនួន២១លានដុល្លារ (ក្នុងនោះឥណទាន១៥លានដុល្លារត្រូវបានផ្តល់អោយធនាគារពាណិជ្ជកម្មក្រៅប្រទេសនៃកម្ពុជា និង៦លានដុល្លារទៀតអោយស្ថាប័នមីក្រូហិរញ្ញវត្ថុក្រេឌីត ធនាគារភូមិ និងវីសិនហ្វាន់)។ គម្រោងទាំងនេះមានលក្ខណ:ថ្មីសម្រាប់កម្ពុជា ដោយសារវាផ្សំបញ្ចូលគ្នានូវឧបករណ៍ហិរញ្ញវត្ថុជាច្រើន មានដូចជាកម្ចី ហិរញ្ញប្បទានសម្បទាន និងការធានា) ព្រមទាំងមានការចូលរួមទាំងពីផ្នែកឯកជន និងសាធារណ:ផងដែរ៕
© រក្សាសិទ្ធិដោយ thmeythmey.com