អន្តរជាតិ
នយោបាយអន្តរជាតិ
×![]()
ជនល្មើសជួញដូរគ្រឿងញៀនអូស្ត្រាលីទាំងពីរនាក់បរាជ័យក្នុងការស្នើអោយប្រធានាធិបតីឥណ្ឌូនេស៊ីថ្មីផ្តល់ការលើកលែងទោសប្រហារជីវិត។ប្រធានាធិបតីឥណ្ឌូនេស៊ីបានប្រការហើយថាគ្មានការសម្រុះសម្រួលណាមួយធ្វើឡើងដើម្បីបន្ថយទោសដល់ជនល្មើសអូស្ត្រាលីឡើយព្រោះឥណ្ឌូនេស៊ីកំពុងប្រឈមមុខបញ្ហាដោយសារការជួញដូរគ្រឿងញៀននេះ។យ៉ាងណាមិញការកំណត់កាលបរិច្ឆេទប្រហារជីវិតអាចធ្វើឡើងក្រោយបញ្ចប់នីតិវិធីតុលាការសព្វគ្រប់ហើយ។
លោក មុំ ពិទូរ្យ លម្អិតព័ត៌មាននេះ
គ្មានសញ្ញាណាមួយដែលបង្ហាញថាប្រមុខរដ្ឋឥណ្ឌូនេស៊ីJokoWidodoផ្តល់ការលើកលែងទោសប្រហារជីវិតដល់អ្នកទោសជួញដូរគ្រឿងញៀនទាំងពីរនាក់Andrew Chan និងMyuranSukumaranនោះឡើយ។រដ្ឋាភិបាលអូស្ត្រាលីតូនីអាបូតបានបន្តដង្ហើយអោយរដ្ឋាភិបាលក្រុងហ្សាកាតាពិចារណាជាថ្មីលើការកាត់ទោសប្រហារជីវិតអ្នកទោសទាំងពីរនាក់នេះ។នាយករដ្ឋមន្ត្រីអូស្ត្រាលីបានថ្លែងថាជនល្មើសទាំងពីរនាក់ពិតជាប្រព្រឹត្តកំហុសធ្ងន់ធ្ងរមែនប៉ុន្តែការកាត់ទោសប្រហារជីវិតនេះប្រហែលជាមិនសក្តិសមសម្រាប់ពួកគេទេព្រោះអ្នកទាំងពីរក៏បានរៀនសូត្រច្រើនពីកំហុសរបស់គេដែរ។
រដ្ឋាភិបាលក្រុងកង់បេរ៉ាធ្លាប់ស្នើសុំអោយរដ្ឋាភិបាលឥណ្ឌូនេស៊ីពិចារណាជាថ្មីចំពោះការសម្រេចកាត់ទោសប្រហារជីវិតនេះព្រោះវាអាចធ្វើអោយប៉ះពាល់ដល់ទំនាក់ទំនងប្រទេសទាំងពីរហើយអ្វីដែលសំខាន់នោះអូស្ត្រាលីព្យាយាមរំលឹកពីគុណបំណាច់របស់ខ្លួនដែលបានធ្វើកន្លងមកដើម្បីជួយដល់ឥណ្ឌូនេស៊ីផងដែរ។
មេធាវីការពារជនល្មើសទាំងពីរនាក់បានដាក់ពាក្យបណ្តឹងបន្តប្រឆាំងការសម្រេចរបស់ប្រធានាធិបតីJokoWidodoដែលមិនផ្តល់ការលើកលែងទោសប្រហារជីវិតដល់ពួកគេនោះ។កាលពីថ្ងៃម្សិលមិញនេះតុលាការរដ្ឋបាលរដ្ឋឥណ្ឌូនេស៊ីបានទទួលស្គាល់ថាខ្លួនគ្មានយុត្តាធិការគ្រប់គ្រាន់ដើម្បីបើកសវនាការលើបណ្តឹងប្រឆាំងការសម្រេចចិត្តរបស់ប្រធានាធិបតីឥណ្ឌូនេស៊ីឡើយ។ក្រោយមានការប្រកាសរបស់តុលាការមេធាវីជនល្មើសបានរិះគន់តុលាការរដ្ឋបាលប៉ុន្តែមេធាវីរូបនេះបានបញ្ជាក់ថាខ្លួនគោរពការសម្រេចរបស់តុលាការ។
យ៉ាងណាក៏ដោយមេធាវីជនល្មើសគ្រោងនឹងដាក់ពាក្យស្នើសុំអោយតុលាការធម្មនុញ្ញបកស្រាយពីកាតព្វកិច្ចរបស់ប្រធានាធិបតីក្នុងការផ្តល់ការលើកលែងទោសប្រហារជីវិតដល់អ្នកស្នើសុំ។អ្នកនាំពាក្យការិយាល័យរដ្ឋអាជ្ញាឥណ្ឌូនេស៊ីTonySpontanaបានថ្លែងថាការផ្តល់ការលើកលែងទោសប្រហារជីវិតឬអត់វាជាបុព្វសិទ្ធិរបស់ប្រធានាធិបតីក្នុងនាមជាប្រមុខរដ្ឋបើទោះជាមានការដាក់ពាក្យប្តឹងក៏តុលាការនៅតែទាត់ចោលដែរ។
ជុំវិញការផ្តល់ការលើកលែងទោសដល់អ្នកជួញដូរគ្រឿងញៀននេះប្រធានាធិបតីឥណ្ឌូនេស៊ីខាងលើបានថ្លែងបញ្ជាក់ជាថ្មីថាគ្មានអ្វីត្រូវសម្រុះសម្រួលឬលើកលែងទោសដល់អ្នកជួញដូរគ្រឿងញៀននេះឡើយ។លោកបានបន្ថែមថាឥណ្ឌូនេស៊ីស្ថិតក្នុងភាពប្រកាសអាសន្ននិងរងគ្រោះខ្លាំងដោយសារការជួញដូរគ្រឿងញៀននេះ។តាមពិតទៅលោកJokoWidodoព្យាយាមបំពេញតួនាទីរបស់លោកក្នុងនាមជាប្រធានាធិបតីនិងបំពេញតាមអ្វីដែលលោកបានសន្យានៅពេលលោកឡើងកាន់តំណែងតែប៉ុណ្ណោះ។បើសិនជាលោកហ៊ានផ្តល់ការលើកលែងទោសប្រហារជីវិតដល់អ្នកទោសជួញដូរគ្រឿងញៀនទាំងពីរនាក់លោកប្រហែលជាត្រូវប្រឈមមុខនឹងការប្រឆាំងនិងសម្ពាធនៅក្នុងស្រុកជាមិនខាន៕
© រក្សាសិទ្ធិដោយ thmeythmey.com
